Emergency use ng Sinopharm, aprub sa WHO

ni Ronalyn Seminiano Reonico | May 8, 2021

Inaprubahan na ng World Health Organization (WHO) ang emergency use ng Sinopharm COVID-19 vaccine ng China noong Biyernes.

Ito ang kauna-unahang Chinese vaccine na binigyan ng WHO ng emergency use approval laban sa infectious disease.

Pahayag ni WHO Director-General Tedros Adhanom Ghebreyesus, "This expands the list of COVID-19 vaccines that COVAX can buy, and gives countries confidence to expedite their own regulatory approval, and to import and administer a vaccine."

Kabilang din sa mga COVID-19 vaccines na nakatanggap na ng emergency approval ng WHO ay ang Pfizer-BioNTech, AstraZeneca, Johnson & Johnson, at Moderna.

Noong April 26 nagkaroon ng pagpupulong ang technical advisory group ng WHO kung saan ni-review ang clinical data at manufacturing practices ng Sinopharm.

Saad pa ng WHO, "Its easy storage requirements make it highly suitable for low-resource settings.”

Ayon kay Tedros, inirekomenda naman ng Strategic Advisory Group of Experts (SAGE) ang pagbabakuna ng two doses ng Sinopharm sa mga edad 18 pataas.

Saad ng WHO, "On the basis of all available evidence, WHO recommends the vaccine for adults 18 years and older, in a two-dose schedule with a spacing of three to four weeks."

Tinatayang aabot naman sa 79% ang efficacy rate ng Sinopharm na dinevelop ng Beijing Biological Products Institute.

Samantala, pahayag din ng WHO, "Few older adults (over 60 years) were enrolled in clinical trials, so efficacy could not be estimated in this age group."

Noong Miyerkules naman, nagsagawa ng review ang mga eksperto ng WHO sa Sinovac Biotech na gawa rin ng China.

Pahayag ni WHO Technical Advisory Group Chair Arnaud Didierlaurent, "We have started to review the report from Sinovac. We actually requested additional information to the manufacturer... which we hope to receive very soon to make a decision."

Sa 24-oras lang… 'Pinas, top 1 sa dami ng may COVID-19

ni Lolet Abania | March 9, 2021

Naitala ang Pilipinas na may pinakamataas na bilang ng bagong kaso ng COVID-19 sa loob lamang ng 24-oras sa Western Pacific Region, ayon sa data ng World Health Organization (WHO).

Base sa datos ng WHO, nanguna ang bansa sa listahan na may 3,351 bagong kaso ng COVID-19, kasunod ang Malaysia na may 1,529 at Japan na mayroong 679.

Ayon sa Department of Health (DOH), nitong Lunes, ang dagdag na 3,356 bagong infected ng virus ay nakapagtala sa buong bansa ng kabuuang bilang na 597,763 cases habang 545,912 ang nakarekober at 12,521 ang namatay dahil sa COVID-19.

Ipinakita rin sa data na ang Pilipinas ang nai-report na may pinakamaraming kabuuang bilang ng tinamaan ng COVID-19 sa Western Pacific countries na may 597,763 kaso.

Kasunod ang Japan na may 440,671 cases at Malaysia na may 314,989 kaso.

Samantala, ang Republic of the Marshall Islands at Samoa ang may pinakakaunting bilang ng COVID-19 cases na may apat lamang bawat isa, kasunod ang Lao na may 47 cases.

Sinopharm, may aplikasyon na ng EUA sa FDA

ni Lolet Abania | March 2, 2021

Kinumpirma ng Food and Drug Administration (FDA) ngayong Martes na naghain na ang Chinese firm na Sinopharm ng kanilang aplikasyon para sa emergency use authorization (EUA) sa COVID-19 vaccine.

“There was an online application filed yesterday afternoon. Our officers are now checking the contents of the submission,” ani FDA Chief Eric Domingo.

Kahapon, inanunsiyo ni Presidential Spokesman Harry Roque na isinumite na ng Sinopharm ang kanilang application subalit ayon kay Domingo, hindi pa niya ito makumpirma.

Matatandaang sinabi ni FDA chief na kinakailangan ng ahensiya ng apat hanggang anim na linggo para ma-evaluate ang Sinopharm vaccine dahil sa kakulangan nito ng approval mula sa stringent regulatory authorities (SRAs) gaya ng US FDA o ng World Health Organization (WHO).

“Depende na lang kung in the meantime, kung in between ng application nila ay magkaroon sila ng ganu’n, ng US FDA (approval) o kaya sa UK o kaya itong mga Asian countries na alam nating stringent sila o sa WHO,” ani Domingo sa isang interview.

Binanggit naman kamakailan ni Roque na mas gusto ni Pangulong Rodrigo Duterte na maturukan ng Sinopharm vaccine.

Gayundin, sa naganap na ceremony ng pagdating ng 600,000 Sinovac doses noong Linggo, sinabi ni Pangulong Duterte na personal niyang hiniling ang supply ng isang COVID-19 vaccine subalit hindi niya binanggit ang pangalan nito.

Ayon pa sa 75-anyos na Pangulo, nais din ng kanyang doktor na isang Chinese vaccine brand ang ibigay sa kanya subalit hindi siya kuwalipikadong tumanggap ng Sinovac shot dahil sa maaari lamang itong gamitin ng mga malulusog na indibidwal na nasa edad 18 hanggang 59.

“Ako naghingi ako, personal. Wala silang stock. Nanghingi ako para sa pamilya ko pati sa akin. I do not know if we would have enough vaccines for everybody, but I think I can accommodate itong Cabinet members,” ani P-Duterte.