Opisyal ng WHO, sibak sa pang-aabuso at diskriminasyon

ni Chit Luna @Brand Zone | March 21, 2023

Muling nasangkot sa kontrobersiya ang World Health Organization (WHO) matapos na ilantad ang mga reklamong "racist" at abusadong pagtrato ng isang mataas na opisyal sa mga empleyado, na humantong sa pagkasibak nito sa ahensya.

Makalipas ang halos dalawang taong imbestigasyon, inihayag kamakailan ng WHO ang pagtanggal kay Dr. Takeshi Kasai bilang regional director sa Western Pacific sa kabila ng mga reklamo sa kanya mula sa mahigit 50 empleyado.

Ikinalungkot naman ni Dr. Lorenzo Mata, pinuno ng grupong Quit for Good, ang pinakahuling iskandalo na kinasasangkutan ng WHO na naunang kinuwestiyon ang kredibilidad dahil sa hindi magandang pagtugon nito laban sa pandemya.

Binanggit din ni Dr. Mata ang pabagu-bagong paninindigan ng WHO sa mga smoke-free alternative sa sigarilyo tulad ng heated tobacco products at vapes.

Dalawang taon ang nakaraan, ipinahayag sa isang pagdinig sa Kongreso ng mga kinatawan ng WHO na parehas lamang ang pinsalang dulot ng sigarilyo at e-cigarettes, ngunit bigla naman nilang binawi ito at sinabing mas maliit ang dulot na panganib ng vapes o e-cigarettes kaysa sigarilyo.

Kilala si Dr. Mata bilang pangunahing tagapagsalita tungkol sa tobacco harm reduction sa Pilipinas at nakilahok na rin siya sa iba’t ibang diskusyon sa buong mundo tulad ng Asia Harm Reduction Forum at Scientific Summit on Tobacco Harm Reduction.

Nangangamba si Dr. Mata na ang kawalan ng transparency at kakayahan ng mga opisyal ng WHO ay manunumbalik sa Nobyembre ng taong ito kung saan gaganapin ang 10th Conference of Parties para sa Framework Convention on Tobacco Control o FCTC treaty.

Ang FCTC, na isinasagawa kada dalawang taon, ay pinangungunahan ng WHO. Isa sa mga kalahok ang Pilipinas, at ang magiging resulta ng diskuyson ay makakaapekto sa milyun- milyong Pilipino na umaasa sa industriya ng tabako.

Ayon kay Dr. Mata, hindi kailangan ng Pilipinas ang mga mapanghusgang opisyal ng WHO na manghahamak lamang sa mga magsasaka at mga naninigarilyo, sa halip na tulungan sila.

Ayon sa mga kawani ng WHO na nainterbyu ng Associated Press, paulit-ulit umanong sinabi ni Kasai sa kanila sa mga pulong na ang pagkukulang sa pagtugon sa COVID ay dahil sa "kakulangan ng edukadong mga tao sa Pacific".

Nagbitaw din diumano si Kansia ng mapanirang salita tungkol sa mga kawani batay sa kanilang mga nasyonalidad at sinisisi ang pagdagsa ng COVID-19 sa kanilang kakulangan ng kapasidad dahil sa mas mababang kultura, lahi at socio-economic status.

Kilala aniya ang WHO sa mabagal na pag-aksyon sa mga reklamo laban sa mga opisyal nito. Ito rin ang dahilan kung bakit lumiit na ang tiwala ng mga tao sa WHO.

Si Dr. Kasai ang kauna-unahang mataas na pinuno ng WHO na tinanggal sa puwesto sa kabila ng maraming ulat ng katulad na pang-aabuso ng ibang opisyal sa internasyonal na ahensya.

Bagong variant ng COVID-19 na nadiskubre sa South Africa, tatawaging Omicron

ni Jasmin Joy Evangelista | November 27, 2021

Idineklara ng World Health Organization (WHO) nitong Biyernes ang recently-discovered B.1.1.529 strain ng COVID-19 bilang variant of concern, at tatawaging Omicron.

"Based on the evidence presented indicative of a detrimental change in COVID-19 epidemiology... the WHO has designated B.1.1.529 as a variant of concern, named Omicron," pahayag ng UN health agency.

Ang Omicron na ang ikalimang deklaradong ‘variant of concern’ ng COVID-19 ng WHO.

Ang nasabing bagong variant ng COVID-19 ay unang nadiskubre sa South Africa kung saan aabot na sa 100 katao ang dinapuan nito.

Nauna nang nagpatupad ng travel restrictions ang maraming bansa dahil sa “Omicron” na mas nakakahawa umano kumpara sa Beta at Delta variant.

Sinuspinde na rin ng Pilipinas ang flights mula sa mga bansang South Africa, Botswana, Namibia, Zimbabwe, Lesotho, Eswatini, at Mozambique, hanggang Disyembre 15.

DOH, naghihintay pa sa report ng WHO sa bagong COVID variant

ni Lolet Abania | November 26, 2021

Naghihintay pa ang Department of Health (DOH) ng ipapahayag ng World Health Organization (WHO) hinggil sa bagong coronavirus variant na na-detect sa South Africa na pinaniniwalaang na mas nakahahawa.

Ayon kay DOH director Dr. Beverly Ho ngayong Biyernes, nakatakdang makipagpulong ang WHO ngayong araw at maaaring maglabas ng statement sa hapon o sa Sabado.

“Nagpapa-meeting po ‘yung WHO ngayong araw. Kakalabas lang ng kanilang advisory at malalaman natin later in the day or siguro tomorrow kung ano ‘yung hatol dito,” ani Ho tungkol sa updates ng bagong variant.

Ang B.1.1.529 variant ay nakitaan ng tinatayang 30 mutations kumpara sa dalawa para sa Delta o tatlo para naman sa Beta, at itinuturong dahilan ng pagtaas ng infections sa South Africa.

Ayon sa isang Reuters report, ang daily infections sa South Africa ay tumaas ng mahigit sa 1,200 nitong Miyerkules mula sa 100 noong una ngayong buwan lamang.

Nag-aalala naman ang mga eksperto abroad na ang variant ay maaaring magdulot sa mga bakuna na maging less effective dahil sa taglay nitong spike protein, at kakaiba ito mula sa orihinal na COVID-19, kung saan ang mga bakuna ay nakabase.

Subalit, ayon kay Dr. Edsel Salvana, isang infectious disease expert at miyembro ng DOH-Technical Advisory Group, ang mataas na bilang ng mutations ay hindi nangangahulugan na ang variant ay may mataas na ring transmissibility o resistance sa mga bakuna.

“So while nakakabahala ‘yung presence of certain mutations, hindi automatic na nakakamatay ito o mas natra-transmit o mas bumababa ‘yung epekto ng ating vaccines,” sabi ni Salvana sa Laging Handa briefing.

Tiniyak din ni Salvana sa publiko na ang anti-COVID-19 measures ay nananatiling ipinapatupad sa buong mundo.

“And the fact na na-detect na itong variant na ito at pinag-uusapan na ng WHO, ‘yung UK nga nag-travel ban na sila, it shows na ‘yung ating global genomic surveillance is working,” ani Salvana.

“Hopefully, we can prevent the spread of any new variants that come up,” dagdag pa niya.

Giit pa ni Salvana na ang pagsunod sa minimum health protocols ay nananatiling epektibo laban sa virus, at ang mga COVID-19 vaccines ay nagbibigay pa rin ng proteksiyon laban sa severe COVID-19.

Para sa OCTA Research group, patuloy nilang imo-monitor ang variant na maaaring magdulot ng seryosong isyu.