Mga mangingisda, nagprotesta kontra China

ni Angela Fernando - Trainee @News | November 6, 2023

Naglayag ang isang grupo ng mga mangingisda sa San Salvador, Masinloc dala ang isang effigy na may katagang "Atin ang 'Pinas" bilang protesta sa ginawang paglabag ng China sa West Philippine Sea.

Nagdulot ng matinding gutom at galit sa mga mangingisda ang patuloy na panggigipit ng China, ayon sa asosasyon ng mga mangingisda ng Masinloc.

Ayon sa konsehal ng barangay at paparating na kapitan ng isla ng San Salvador na si Richard Pascual, umaasa ang kanilang mamamayan at ang isla sa karagatan.

Hindi naman kinalimutan ng mga mangingisdang magpasalamat sa lokal na pamahalaan, kay Presidente Bongbong Marcos, at sa PCG para sa patuloy na paglaban sa kanilang karapatan sa WPS.

Militar ng U.S. at 'Pinas, joint forces para sa WPS

ni Angela Fernando - Trainee @News | October 27, 2023

Pinaiigting ng Amerika at Pilipinas ang kanilang ugnayan matapos ang insidente ng umano'y pagbangga ng China sa mga barko ng 'Pinas sa West Philippine Sea.

Ayon sa Department of National Defense (DND), siniguro nina US Defense Secretary Lloyd Austin III at Filipino counterpart Gilberto Teodoro, Jr. na ang Mutual Defense Treaty ay para sa parehong bansa, sakop ang sasakyang pandigma hanggang 'South China Sea'.

Naglabas din ng pahayag ang DND na nagpakita ng kahandaan ang dalawang Kalihim at sinabing papabilisin ang pagmodernisa sa Armed Forces of the Philippines (AFP) at idiniin ang hindi matatawarang paninindigan ni Austin sa bansa.

Sa kabilang banda, nagbigay din ng paalala ang US President na si Joe Biden na suportado ng kanilang bansa ang Pilipinas.

China, naglagay ng floating barrier sa WPS, mga Pinoy 'di makatawid

ni Madel Moratillo @News | September 25, 2023

Naglagay ng floating barrier sa timog silangang bahagi ng Bajo de Masinloc shoal ang China Coast Guard.

Sa larawang ibinahagi ng Philippine Coast Guard, makikitang hindi makatawid ang mga mangingisdang Pinoy dahil sa harang.

Ang PCG at Bureau of Fisheries Aquatic Resources, mariin namang kinondena ang paglalagay ng China Coast Guard ng floating barrier.

Ayon kay Commodore Jay Tarriela, tagapagsalita ng PCG sa isyu sa West Philippine Sea, may habang 300 metro ang floating barrier na nadiskubre ng PCG at BFAR personnel na sakay ng BRP Datu Bankaw habang nagsasagawa ng maritime patrol noong September

22.

Batay umano sa kwento ng mga mangingisdang Pinoy, naglalagay ng floating barriers ang CCG tuwing may nakikitang malaking bilang ng mga Pinoy na nangingisda sa lugar.

Nagbigay naman ng ayuda ang PCG at BFAR sa mga apektadong mangingisda gaya ng grocery items pero nakaranas sila ng 15 radio challenges at tinangka silang paalisin.