Duterte at mga dating pangulo ng 'Pinas, joint forces sa WPS

ni Ronalyn Seminiano Reonico | May 20, 2021

Planong makipagpulong ni Pangulong Rodrigo Duterte sa mga dating lider ng bansa upang pag-usapan ang sigalot sa West Philippine Sea (WPS), ayon kay Presidential Spokesperson Harry Roque.

Una nang hiniling ni dating Senador Rodolfo Biazon kay P-Duterte na makipagpulong sa National Security Council (NSC) upang linawin at pag-usapan ang posisyon ng pangulo sa WPS.

Pahayag naman ni Roque, “Actually, nabanggit po sa akin iyan ni Presidente. Ang problema roon sa NSC, sa personal niyang karanasan na nakaka-attend siya, iyong NSC, walang nare-resolve. So, kung kinakailangan, iniisip niyang imbitahin ang mga dating presidente, ilang mga personalidad para magkaroon ng isang pagpupulong, ‘no, to discuss the issue.

“'Yung mga issue na tinatalakay kasama ang NSC, wala namang resolusyon na nangyayari kaya bakit pa kung puwede naman ‘yang gawin sa informal consultation?”

Iginiit din ni Roque na mananatili ang posisyon at polisiya ni P-Duterte sa usapin sa WPS at sisiguraduhin din umano ng pangulo na walang mawawalang teritoryo ng Pilipinas sa kanyang panunungkulan.

Aniya, “Wala pong confusing sa stand ng presidente sa WPS. Ang hindi pupuwedeng mapagkasunduan, isasantabi muna, isusulong ang mga bagay-bagay na puwedeng maisulong kagaya ng kalakalan at pamumuhunan.

"Pero hinding-hindi tayo mamimigay ng teritoryo at paninindigan at pangangalagaan natin ang pang-nasyonal na soberanya at ang ating mga sovereign rights.”

WPS, bawal nang pag-usapan — Duterte

ni Ronalyn Seminiano Reonico | May 18, 2021

Pinagbawalan ni Pangulong Rodrigo Duterte ang mga opisyal ng bansa na maglabas ng sariling pananaw tungkol sa sigalot sa West Philippine Sea (WPS) sa pagitan ng Pilipinas at China.

Pahayag ni P-Duterte, "So, this is my order now to the Cabinet and to all - all and sundry... talking for the government to refrain discussing West Philippine Sea with...anybody.

"If we have to talk, we talk and it would just be among us and there is one spokesman - (Presidential Spokesman) Secretary Harry (Roque) will do it. Now you get the picture."

Sa naganap naman na press briefing ni Roque, kinumpirma niya na tanging sila lamang ni Department of Foreign Affairs (DFA) Secretary Teodoro Locsin Jr. ang maaaring maglabas ng pahayag tungkol sa isyu sa WPS.

Aniya, "That’s the decision of the president... And as I said, it’s covered by traditional exception to freedom of information."

Madalas maglabas ng updates ang National Task Force (NTF) WPS tungkol sa presensiya ng mga barko ng China, kabilang na ang mga militia vessels sa WPS.

Nang matanong si Roque tungkol sa pag-a-update ng NTF-WPS, aniya, “Well, you know, reports of the NTF are forwarded to the DFA and they would determine if they will file diplomatic protest. So, these are matters, facts, which are relevant to diplomatic communications covered by executive privilege.

"So, although there is transparency, an exception to transparency are diplomatic communications and that includes also inputs which form the basis of diplomatic communication.”

Samantala, nilinaw naman ni P-Duterte na mananatili pa rin ang pagpapatrolya ng awtoridad sa WPS.

Aniya pa, “Our agencies have been directed to do what they must and should to protect and defend our nation’s interest.

“We will not waver in our position.”

Pag naniwala kay PDu30... Maoonse lang uli tayo — Trillanes

ni Mary Gutierrez Almirañez | May 15, 2021

Ayaw nang maniwala ni dating Senator Antonio Trillanes IV sa statement ni Pangulong Rodrigo Duterte na hindi nito isusuko ang West Philippine Sea (WPS) sa China, magmula nang sabihin nitong biro lamang ang pagdye-jet ski.

Kamakailan lamang ay nagbitaw na naman ng bagong pahayag ang Pangulo at sinabi sa China, "Hindi talaga ako aatras. Patayin mo man ako kung patayin mo ako, dito ako. Dito magtatapos ang ating pagkakaibigan."

Hirit naman ni Trillanes, “Naku, jet ski scam na naman 'yan! Ewan ko lang kung magpapaloko pa mga Pilipino d'yan.”

Dagdag pa niya, “May tawag d'yan sa kalye, ang tawag d'yan, pang-oonse na 'yan. Naisahan ka na nu’ng una, naloko ka, naisahan ka uli. Maoonse ang Pilipino n'yan kung paniniwalaan pa nila si Mr. Duterte.”

Kaugnay iyon sa sinabi ni Pangulong Duterte na panahon lamang ng pangangampanya noon kaya nito nasabing magdye-jet ski, dala ang Philippine flag papuntang China at ipaglalaban ang WPS.

Sa ngayon ay hindi pa rin daw malinaw kung kailan nga ba nagbibiro si Pangulong Duterte at kung kailan ito seryoso sa mga sinasabi.

Matatandaan na ilang pahayag na rin nito ang nabigyan ng ibang kahulugan ng iba’t ibang kritiko. “Kung naniwala kayo sa kabila, I would say that you are really stupid," sabi pa ng Pangulo.