Maganda ang panahon sa May 9 elections — PAGASA

ni Lolet Abania | May 4, 2022

Asahan na magiging maganda ang panahon o fair weather sa maraming bahagi ng bansa sa Election Day, batay sa tala ng PAGASA ngayong Miyerkules.

Ayon kay weather forecaster na si Ana Clauren-Jorda sa isang interview, wala silang namo-monitor na anumang sama ng panahon o weather disturbance na maaaring makaapekto sa bansa sa Mayo 9.

“Mataas lamang po ‘yung tsansa ng mga pag-ulan po natin sa bahagi ng Mindanao, pero overall sa umaga ay magiging maganda at maaliwalas naman po ang ating panahon,” sabi ni Clauren-Jorda.

Sa Lunes, Mayo 9, ang mga Pilipino ay nakatakdang bumoto para sa mga bagong lider ng bansa sa unang pagkakataon sa gitna ng pandemya ng COVID-19.

Ayon sa Commission on Elections (Comelec), ang mga botante ay kailangang nakasuot ng face masks at dapat na sumunod sa mga minimum public health standards sa mga polling precincts sa araw ng eleksyon.

PAGASA: Maulap na kalangitan at panaka-nakang ulan sa buong bansa ngayong araw

ni Jasmin Joy Evangelista | January 14, 2022

Asahan ngayong araw ang maulap na kalangitan at panaka-nakang ulan, ayon sa Philippine Atmospheric Geophysical and Astronomical Services Administration (Pagasa).

Ayon sa Pagasa, makararanas ng maulap na kalangitan at pag-ulan ang ilang parte ng Mindanao dahil sa shear line o tail-end ng cold front.

“Ito pong shear line ay nagdadala ng pag-ulan sa eastern section ng Mindanao,” ani Pagasa weather specialist Samuel Duran.

Makararanas din ng pag-ulan ang Caraga region, Northern Mindanao, at Davao region.

Maulap na kalangitan at pag-ulan bunsod naman ng northeast monsoon o “amihan” ang posibleng maranasan sa Cagayan Valley, Apayao, Kalinga, Ifugao, Mountain Province, Aurora, Quezon, Camarines Norte, Camarines Sur at Catanduanes. 

Samantala, ang Metro Manila at Visayas at Luzon ay makararanas ng generally fair weather condition na may maulap na kalangitan ag isolated light rains dala ng northeast monsoon.

LPA, namataan sa Davao City — PAGASA

ni Lolet Abania | December 6, 2021

Namataan ang isang low pressure area (LPA) na malapit sa Davao City ngayong Lunes, ayon sa PAGASA.

Sa daily weather bulletin ng PAGASA, ang LPA ay natagpuan sa layong 735 kilometro silangan ng Davao City bandang alas-3:00 ng hapon ngayong Lunes.

Magdudulot ang LPA at ang tinatawag na shear line ng maulap na papawirin na may kalat-kalat na pag-ulan at thunderstorms sa buong Eastern Visayas, Northern Mindanao, Caraga, Davao Region, at Bohol.

Pinayuhan naman ng PAGASA ang mga apektadong residente na maghanda sa posibleng mga pagbaha o landslides mula sa katamtaman, at minsang malakas na pagbuhos ng ulan.

Samantala, ang Cagayan Valley, Cordillera Administrative Region, Aurora, at ang northern portion ng Quezon kabilang na ang Polillo Islands ay makararanas ng maulap na papawirin na may mahinang pag-ulan dahil sa Northeast Monsoon.

Ang Northeast Monsoon ay magdudulot naman ng bahagyang maulap hanggang sa maulap na papawirin na may kasamang isolated light rains sa buong Metro Manila, natitirang bahagi ng Luzon, at natitirang bahagi ng Visayas.

Makararanas naman ang natitirang bahagi ng Mindanao ng bahagyang maulap hanggang sa maulap na papawirin na may kasamang isolated rain showers dahil sa localized thunderstorms.

Posible ring magkaroon ng flash floods o landslides na idudulot ang matinding thunderstorms.

Gayundin, makararanas ng katamtaman hanggang sa malakas na bugso ng hangin at katamtaman hanggang sa maalon ang kondisyon ng coastal water sa buong Luzon, Visayas, at ang eastern section ng Mindanao.

Habang ang natitirang bahagi ng Mindanao ay makararanas ng mahina hanggang sa katamtamang bugso ng hangin at bahagya hanggang sa katamtamang kondisyon ng katubigan.