Malakas na ulan humagupit sa Japan, 1 patay

ni Eli San Miguel @Overseas News | Sep. 22, 2024

Humagupit ang malakas na ulan sa northcentral region ng Noto sa Japan nitong Sabado, na nagdulot ng landslide at baha, na nag-iwan ng isang patay at ilang nawawala, ayon sa mga opisyal.

Naging sanhi ang pagbaha ng pag-apaw ng mga ilog, pagbaha sa mga tahanan, at pagka-stranded ng ilang mga residente sa rehiyon na patuloy pa ring bumabawi mula sa nakamamatay na lindol noong Enero 1.

Sa Suzu, isang tao ang nasawi at isa pa ang nawawala matapos tangayin ng rumaragasang baha. Isa pang tao ang naiulat na nawawala sa kalapit na bayan ng Noto, ayon sa prefecture. Sa Wajima, apat na tao ang nawawala matapos ang isang landslide sa isang construction site.

Isang lindol na may lakas na 7.6 magnitude ang yumanig sa rehiyon noong Enero 1, na pumatay ng mahigit 370 katao at sumira sa mga kalsada at iba pang mahahalagang imprastruktura. Ang epekto nito ay patuloy na nakakaapekto sa lokal na industriya, ekonomiya, at pang-araw-araw na buhay ng mga residente.

Bagyong Kabayan, next

ni Mai Ancheta @News | October 7, 2023

Isang low pressure area ang binabantayan ng Philippine Atmospheric, Geophysical and Astronomical Services Administration (PAGASA) dahil sa posibilidad na makapasok ito sa bansa sa araw ng Linggo.

Ang LPA ay naispatan malapit sa Guam at papalapit sa silangang bahagi ng Luzon, kumikilos pakanluran.

Agad namang nilinaw ng weather bureau na hindi ito makaaapekto sa panahon ngayong weekend.

Ayon sa PAGASA, kapag nabuo ang LPA na bagyo ay tatawaging "Kabayan".

Samantala, nakalabas na sa PAR ang bagyong Jenny subalit patuloy nitong hinahatak ang habagat na nakakaapekto sa sama ng panahon sa malaking bahagi ng Luzon.

Bagyong Jenny at habagat, joint forces

ni Mai Ancheta @News | October 2, 2023

Lalong lumakas ang tropical storm Jenny na magdadala ng mga pag-uulan sa ilang bahagi ng Central at Southern Luzon, Visayas at Mindanao sa susunod na tatlong araw.

Batay sa inilabas na abiso at pagtaya ng Philippine Atmospheric, Geophysical and Astronomical Services Administration (PAGASA), magpapatuloy ang pagpapalakas ng

Bagyong Jenny sa habagat na magdadala ng pag-ulan.

Naispatan ang bagyo sa silangang bahagi ng Tuguegarao City sa Cagayan na may lakas na hanging 95 kilometers per hour hanggang 115 kph.

Posibleng itaas ang wind signal sa Northern Luzon sa sandaling maabot ni Jenny ang typhoon category.

Nilinaw naman ng PAGASA na hindi direktang tatama ang bagyo sa bansa subalit aasahang magdadala ito ng malakas na mga pag-ulan sa Batanes, Babuyan Islands, at hilagang bahagi ng Cagayan at Apayao sa Martes o Miyerkules.

Ayon sa PAGASA, palalakasin ng Bagyong Jenny ang habagat na magdadala ng mga pag-ulan sa bahagi ng Palawan at Occidental Mindoro sa susunod na tatlong araw, habang malakas na hangin naman ang mararanasan sa Romblon at sa Visayas.