LPA, namataan sa Surigao del Norte — PAGASA

ni Lolet Abania | October 21, 2021

Namataan ang isang low pressure area (LPA) sa bahagi ng Surigao del Norte kasabay ng nararanasang intertropical convergence zone (ITCZ) na nakakaapekto naman sa Palawan, Visayas, at Mindanao, ayon sa PAGASA ngayong Huwebes.

Sa daily weather bulletin ng PAGASA, bandang alas-3:00 ng hapon ngayong Huwebes namataan ang LPA na nasa layong 825 kilometro silangan ng Surigao City, Surigao del Norte. “It is embedded along ITCZ affecting Palawan, Visayas and Mindanao,” pahayag pa ng weather bureau.

Ayon sa PAGASA, makararanas ng maulap na papawirin na may kalat-kalat na mga pag-ulan at thunderstorms sa buong Caraga dahil ito sa ITCZ at LPA.

Pinapayuhan ng PAGASA ang mga residente sa naturang lugar na maghanda sa posibleng flash floods o landslides dahil sa severe thunderstorms.

Ang Metro Manila at ang natitirang bahagi ng bansa ay makararanas naman ng bahagyang maulap hanggang sa maulap na papawirin na may pulo-pulong pagbuhos ng ulan o thunderstorms dahil sa ITCZ at localized thunderstorms.

Ayon pa sa PAGASA, posibleng magdulot ito ng mga pagbaha o landslides dahil na rin sa severe thunderstorms.

Samantala, ang Batanes at ang Babuyan Islands ay makararanas ng bahagyang maulap hanggang sa maulap na papawirin na may kasamang pulo-pulo at mahinang pagbuhos ng ulan dahil sa tinatawag na northeasterly surface windflow.

Gayundin, katamtaman hanggang sa malakas na bugso ng hangin at katamtaman hanggang sa matinding coastal water conditions ang mararanasan sa buong Northern Luzon, habang mahina hanggang sa katamtamang bugso ng hangin at mahina hanggang sa moderate waters ang mararanasan naman sa natitirang bahagi ng bansa.

Bagyong Maring, inaasahang tatama sa extreme Northern Luzon

ni Jasmin Joy Evangelista | October 8, 2021

Naging tropical depression na ang low pressure area sa bahagi ng Daet, Camarines Norte at tatawagin itong bagyong Maring, ayon sa PAGASA.

Huling namataan ang sentro ng bagyo sa layong 505 km sa silangan ng Virac, Catanduanes.

Taglay nito ang lakas ng hangin na 45 kph at may pagbugsong 55 kph.

Sa ngayon ay sa Eastern Visayas ito magpapaulan pero dahil sa ITCZ ay may mga thunderstorm na magpapaulan sa iba’t ibang bahagi ng bansa.

27 barangay sa Capiz binaha dahil sa Bagyong Lannie

ni Jasmin Joy Evangelista | October 5, 2021

Binaha ang maraming lugar sa Capiz matapos ang walang tigil na ulan bunsod ng Bagyong Lannie.

Ayon kay Jing Pelaez ng Capiz Provincial Disaster Risk Reduction and Management Office, mas dumami ang barangay at munisipyo na apektado sa pagbaha.

"Kung kahapon ay 13 pa lang po yung binabaha, ngayon ay 27 barangays na at saka 4 na municipalities ang affected. Nasa 17 individuals o 7 pamilya ang inilikas sa bayan ng Mambusao dahil sa pagbaha," aniya.

Kabilang sa mga bayan na apektado ay ang Mambusao, Jamindan, Dumalag at Sigma.

Ayon sa PAGASA nitong Martes, makakaranas pa rin ng malakas na pag-ulan ang Western Visayas dahil sa epekto ng bagyo.