Mga anak ni VP Leni, binu-bully dahil kay P-DU30

ni Ronalyn Seminiano Reonico | November 20, 2020

Nakararanas ng pambu-bully ang mga anak ni Vice-President Leni Robredo kaugnay ng mainit na isyu sa pagitan nito at ni Pangulong Rodrigo Duterte.

Ayon kay Presidential Spokesperson Harry Roque, nagkaroon umano ng posts sa Twitter ang mga anak ni Robredo na sina Tricia at Aika na tila pasaring kay P-Duterte.

Saad ni Robredo, “Ngayon, ang binu-bully, mga anak ko. I have always been proud of the persons my daughters have become. They are their own persons. What they have accomplished, so far, are all borne out of their hard work. They never used our name or whatever little influence we have to get what they want.

“They’re all adults now. They’re not in government. They are not politicians and they don’t plan to be. Totoo, they’re outspoken and rightfully so. We have trained them to stand up for themselves and what they believe in.”

Lorenzana at Panelo, nagsori na kay VP Leni sa fake news

ni Thea Janica Teh | November 18, 2020

Nilinaw ni Defense Secretary Delfin Lorenzana na hindi gumamit si Vice-President Leni Robredo ng government plane papuntang Catanduanes upang mamahagi ng relief goods. Humingi rin ito ng pasensiya kay VP Leni matapos maglabas ng pahayag si Presidential Chief Legal Counsel Salvador Panelo na nakatanggap umano ito ng text message kay Lorenzana na naglalaman ng maling impormasyon.

“I requested the Philippine Air Force to confirm through their flight manifest and they reported that there was no instance that Vice-President Robredo boarded any military aircraft in going to Catanduanes,” bahagi ni Lorenzana.

Samantala, sinabi rin nito na nagkaroon ng misyon ang Air Force UH-1H helicopter na nagdala ng relief goods sa Catanduanes galing sa opisina ni VP Leni noong Nobyembre 3.

Nitong Martes, sinabi ng kampo ni Robredo na nagkakalat ng “fake news” si Panelo at nilinaw na hindi nito ginamit ang C-130 sa pagdadala ng relief goods.

Ayon naman kay Panelo, humingi na rin umano ito ng pasensiya at nilinaw na hindi totoo ang una niyang sinabi. Bukod pa rito, sinabi rin nito na ang naging reaksiyon niya ay sariling opinyon lamang.

VP Leni sa kontrobersiyal na public speech: Suggestion lang ‘yun, ‘di kontra-gobyerno

ni Thea Janica Teh | August 30, 2020

Sa inilabas na address ni Vice-President Leni Robredo tungkol sa responde sa COVID-19, sinabi nitong ito lamang ay isang suggestion dahil sa kakulangan ng gobyerno sa problemang ito.

Aniya, kaya ito nagbigay ng suggestion dahil ang unang maaapektuhan sa paglubog ng pamahalaan ay ang mga mamamayang mahihirap at ito ang kinatatakutan ng lahat. Sama-sama aniyang lulubog ang bansa kung hindi marerespondehan agad ang problemang ito.

Dinepensahan naman ni VP Leni na hindi ito laban sa pamahalaan kundi ito ay para makatulong sa krisis pangkalusugan na nararanasan ng buong bansa.

Ito rin umano ay humingi ng rekomendasyon at konsultasyon sa mga health expert, economist, data analyst at educator bago ito magsalita at magbigay ng suhestiyon.

Naglabas ng public address si VP-Leni upang sabihin ang kaniyang proposal at report patungkol sa COVID-19. Kinuwestiyon niya rin rito ang ilang gawain ng pamahalaan sa pagsosolusyon ng krisis pangkalusugan at ito umano ay hindi sapat. Nagsalita rin umano ito dahil nakita niyang mali pa rin ang ginagawa ng pamahalaan simula pa noong Marso.

Binanggit niya rin dito na isa na ang Pilipinas sa pinakamataas na kaso ng COVID-19 sa Southeast Asia countries.

Dagdag ni Robredo, limang buwan na, hindi aniya puwedeng nakikita natin ang kakulangan ng wala tayong sasabihin.