Voter registration sa MECQ, balik na, hanggang Sept. 30 na lang

ni Lolet Abania | September 1, 2021

Inaprubahan ng Commission on Elections en banc ngayong Miyerkules ang pagsasagawa ng voter registration sa mga lugar na nasa ilalim ng modified enhanced community quarantine (MECQ) simula Setyembre 6, 2021.

Sa anunsiyo sa Twitter ni Comelec spokesperson James Jimenez, ang voter registration sa MECQ areas ay magsisimula ng alas-8:00 ng umaga hanggang alas-5:00 ng hapon.

Ang mga lugar naman na nasa ilalim ng MECQ ay Luzon — Metro Manila, Apayao, Ilocos Norte, Bulacan, Bataan, Cavite, Lucena City, Rizal, at Laguna; Visayas — Aklan, Iloilo Province, Iloilo City, Lapu-Lapu City, Cebu City, Mandaue City sa Region 7, at Mindanao — Cagayan de Oro City.

Gayundin, pinayagan na ng Comelec en banc ang voter registration na isagawa sa loob ng mga malls. Ayon kay Jimenez, maglalabas sila ng iba pang detalye hinggil dito sa susunod na mga araw. Sinabi rin ng opisyal na hanggang Setyembre 30, 2021 ang voter registration.

Matatandaang sinuspinde ang mga aktibidad para sa voter registration sa mga lugar na nasa ilalim ng enhanced community quarantine (ECQ), ang pinakamahigpit na quarantine status, at MECQ, ang transition phase naman sa pagitan ng ECQ at ng mas relax na community quarantine.

Tinanggihan naman ng ahensiya ang hiling na ekstensiyon ng voter registration ng hanggang Oktubre 31, 2021, sa halip, ayon sa Comelec, pinalawig nila ang registration hours simula noong Agosto 23. Nitong Biyernes, nakapagtala na ang Comelec ng bilang ng mga registered voters para sa May 2022 polls na umabot sa 61.06 milyong indibidwal.

Oras ng voter registration, extended — Comelec

ni Ronalyn Seminiano Reonico | August 20, 2021

Pahahabain na ang voter registration hours simula sa Agosto 23, ayon sa Commission on Elections.

Mula sa dating 8 AM hanggang 5 PM na registration schedule, magiging 8 AM na ito hanggang 7 PM tuwing Lunes hanggang Biyernes, ayon sa Comelec.

Samantala, tuwing Sabado at holidays ay maaari na ring magparehistro simula 8 AM hanggang 5 PM.

Wala nang pila, isang click lang… Mobile app para sa voter registration, inilunsad

ni Lolet Abania | June 14, 2021

Nakatakdang ilunsad ng Commission on Elections (Comelec) ang isang mobile application na layong mapabilis ang pagpoproseso ng voter registration na gaganapin bukas, Martes.

Sa isang press statement ngayong araw, tinawag ito ng Comelec na Mobile Registration Form App na ilulunsad sa Tagum City, Davao del Norte. “This mobile app can be accessed with any smartphone even when offline,” pahayag ng Comelec.

Si Commissioner Marlon Casquejo ang nag-conceptualize ng naturang proyekto. “The launch of the mobile app is very timely in the face of mobility restrictions brought about by COVID-19, because you will only need a smartphone to accomplish the form. This will save time, effort and money that will otherwise be spent on going to a computer shop to download and print the form, or getting the form at the local COMELEC to fill it out manually,” ani Casquejo.

“A QR Code is generated upon successful accomplishment of the form. You must save the QR Code on your smartphone, and afterwards, you may visit your local COMELEC office to have your QR Code scanned and your biometrics taken,” dagdag ni Casquejo.

Maaaring i-download ang Mobile Registration Form App sa pamamagitan ng link na bit.ly/MobileFormApp. Puwedeng ring i-share kahit offline mula sa isang Android smartphone sa isa pa gamit naman ang SHAREit o anumang file-sharing application.

Kapag na-install na, ang isang user ay maaari nang mag-apply para sa voter registration nang hindi nangangailangan ng internet connectivity. Ayon pa sa Comelec, ang app ay inilunsad na sa mga piling lugar nito lamang Hunyo. Kasalukuyan na itong ipinatutupad sa mahigit 500 lungsod at munisipalidad sa buong bansa, kabilang na ang National Capital Region (NCR), Cebu City at Davao City.

Naglabas din ang Comelec ng steps para sa paggamit ng Mobile Registration Form App, ayon sa mga sumusunod:

1. Open the mobile app, and tap “Get Started.”

2. Select the desired type of application and tap “Proceed.”

3. Input all the necessary personal information.

4. Confirm your personal information by ticking the checkbox.

5. Tap “Generate QR Code” and “Save” to save it in your phone gallery.

6. Bring a valid ID upon visiting your local COMELEC office for your QR Code scanning.”

“For any question or clarification about the mobile app, our Voter Care Center hotlines on mobile (+63 927 5595 926), Facebook and Twitter are open to the public,” ayon naman kay Comelec Spokesperson James Jimenez.