Ilang bar sa QC, ipinasara sa paglabag sa quarantine protocols

ni Ronalyn Seminiano Reonico | July 15, 2021

Ipinag-utos ng lokal na pamahalaan ng Quezon City ang pagpapasara sa ilang bar matapos lumabag sa ipinatutupad na health and safety protocols.

Ayon sa Quezon City Government, kasama sina Quezon City Business Permits and Licensing Department (BPLD) Head Margie Santos, BPLD Task Force Enforcement Head Ret Col Marcelino Pedrozo at City Attorney Nino Casimiro, ipinasara ni Mayor Joy Belmonte ang Baia Luna KTV at Chaparral KTV Ventures Inc..

Sa isinagawang inspeksiyon ng QC Task Force Disiplina, napag-alaman na hindi lamang lumalabag sa quarantine protocols at guidelines ang mga naturang bar kundi, saad ng QC LGU, “Natuklasan din na walang business permit ang Chaparral KTV Ventures habang expired naman ang business permit ng Baia Luna KTV.”

Samantala, saad pa ng QC LGU, “Ipinasara rin ang En Route Distillery dahil sa mga paglabag sa local at IATF guidelines.

“Ayon sa GCQ guidelines ng lungsod, hindi pa pinapayagang magbalik-operasyon ang mga bars, clubs, concert halls at ilang entertainment at leisure centers.”

Pagala-galang COVID positive, kakasuhan ng murder

ni Ronalyn Seminiano Reonico | June 8, 2021

Posibleng kasuhan ng murder ang mga indibidwal na kahit alam nilang positibo sila sa COVID-19 ay papasyal-pasyal pa, ayon kay Pangulong Rodrigo Duterte noong Lunes.

Sa isang taped message ni Chief Legal Counsel Salvador Panelo na iniere sa speech ni P-Duterte, iminungkahi niya na kasuhan ang mga pasaway sa COVID-19 protocols.

Aniya, “Meron pong puwedeng ihain laban doon sa mga lumalabag sa mga health protocols.”

Ang mga pagsuway sa awtoridad ay maaaring panagutin.

Saad pa ni Panelo, “Kung ito pong tao na ‘to, despite the fact na alam niya na nga ang ipinagbabawal, eh, ganu’n pa rin ang gagawin niya, puwede po siyang idemanda ng pag-resist o hindi pagsunod sa mga persons in authority o ru’n sa mga agents ng mga persons of authority while in the performance of their duty.”

Dagdag pa niya, “Kung alam n’yo na ngang meron kayong sakit na Coronavirus at hindi ninyo ini-report ito, eh, talagang lalabagin ninyo ang Republic Act 11332. Eh, ganu’n din po ‘yung mga taong dapat na nakakaalam at hindi rin po ini-report, aba’y, papasok din po ‘yun sa batas na RA 11332.

“Alam po ba ninyo na sa ating batas, ‘pag po ‘yung… halimbawa, ‘yung isang tao, alam niya na meron siyang sakit na Coronavirus, alam niya, pumunta po siya sa isang lugar na merong mga pagpupulong at ‘yung kanyang sakit ay nailipat at nakahawa sa isang tao o ilang tao, at ito ay namatay, aba, ibang usapan na ‘yun.

“Kung hindi niya alam na may sakit siya, baka nahawa lang siya, ‘yun kung namatay ay papasok lamang ‘yun sa homicide. Kung ito naman ay maselan na sugat o injury, maging reckless imprudence resulting to serious physical injury or depende nga kung hindi naman serious.

"Pero kung alam niya po, pumunta siya sa isang lugar, alam niyang may sakit siya ng Coronavirus at nakahawa siya at namatay, ‘yan po ay talagang sadyang pagpatay na. Papasok po ‘yan sa murder sapagkat intentional. Alam mo na ngang makakahawa ka, alam mo na ‘pag may nahawahan ka lalo na ‘yung mga may comorbidities, eh, talagang sadyang may pagpatay.”

Sinang-ayunan ni P-Duterte si Panelo at aniya, “For as long as the people do not honor the protocols, kung ayaw nilang sumunod, ayaw nilang maniwala, walang katapusan ang COVID.”

Aniya, kahit marami na ang nabakunahan laban sa COVID-19, marami pa rin ang mga naiwan at hindi pa bakunado.

Hirit pa ng pangulo, “‘Yan ang problema sa mga tao na hindi nakakaintindi… nakakaintindi pero ayaw sumunod and ‘yung sinabi mong murder, although medyo malayo masyado sa isip ng tao ‘yan, but it is possible.

“If he knows that he is sick with COVID-19 and he goes about nonchalant, papasyal-pasyal ka lang diyan, you are maybe, if it is intentional, malayo ‘yan pero it could be murder, sabi nga ni Sal.

“At kung hindi, iyang reckless imprudence would really mas swak doon sa sitwasyon na ‘yon.”

Walang face mask, bawal saktan — Eleazar

ni Ronalyn Seminiano Reonico | May 9, 2021

Inatasan ni Philippine National Police (PNP) Chief Lt. Gen. Guillermo Eleazar ang mga kapulisan na hulihin ang mga walang face mask, gayundin ang mga mali ang pagsusuot nito alinsunod sa utos ni Pangulong Rodrigo Duterte.

Kaakibat nito, pinaalalahanan ni Eleazar ang mga pulis na ‘wag saktan ang mga mahuhuling face mask violators.

Saad ni Eleazar, “We can arrest them but we should not punish them and most of all, we should not hurt them. If you do that, you will be answerable to me.”

Matatandaang una nang sinabi ni Interior Secretary Eduardo Año na warning-an ang mga lalabag sa naturang kautusan at kung tatangging sumunod ay saka arestuhin.

Aniya, “I have instructed the PNP that the apprehension of violators shall always be in accordance with law and local ordinances where violators will be warned and instructed by police and local authorities to wear the face mask or face shield properly.” Ayon din kay A؜ño, maaaring makulong nang hanggang 12 oras ang mga face mask violators.