Lahat ng kandidato puwedeng mangampanya sa Pasig — Mayor Vico

ni Jasmin Joy Evangelista | March 24, 2022

Bukas ang Pasig City sa campaign activities ng lahat ng kandidato, national man o local, ayon kay Mayor Vico Sotto.

“As I’ve said before, Pasig is open for campaign activities of all candidates, national and local,” ani Sotto sa isang Facebook post.

Nag-post si Sotto matapos mapag-alamang mayroong kumakalat na isyu online na hindi umano siya nagbigay ng permit sa kampanya ng kandidato.

“May mga gumawa ng kwento na hindi daw ako nagbigay ng permit, pero meron naman talaga. (Mukhang HINDI sa nasyonal nagmula ang kwento kundi dito lang sa lokal. Sana honest mistake lang.)”, paliwanag nito.

Ayon kay Sotto, awtomatiko ang approval ng permits ng city administrator “as long as the venue is allowed and it is properly coordinated for safety/security reasons.”

“KARAPATAN po ito ng mga kandidato at maganda rin pong nakikita at napakikinggan sila ng mamayang pasigueño”, ayon pa rito.

Naglabas ng pahayag si Sotto kasama ang larawan ng sulat mula sa city administrator kung saan makikitang nag-release ng permit ang Pasig para sa campaign rally ni former Sen. Ferdinand Marcos Jr. at Davao City Mayor Sara Duterte-Carpio.

Vico sa mga taga-Pasig: Iboto kung sino ang tingin n’yong ‘best’

ni Jasmin Joy Evangelista | March 22, 2022

“Choose who is the best, who we think will be the most effective,” payo ni Pasig Mayor Vico sa isinagawang flag raising sa city hall nitong Lunes.

“What we want for Pasig is for everyone to be given an opportunity. That what we fought for — the freedom of everyone to listen to all the candidates,” ani Sotto. “We want to be open to everyone. Then we will choose who is the best, who we think will be the most effective.”

“Let’s always just remember the rules and guidelines of Comelec and let’s abide by it,” pahayag pa ni Sotto.

“We need to work together to be sure that everything goes smoothly until the elections,” dagdag niya.

Ang national at local elections ay nakatakda sa May 9.

Samantala, sinabi naman ni Sotto na wala siyang dapat sabihin hinggil sa cyberlibel complaint na inihain laban sa kanya ni Vice Mayor Iyo Caruncho Bernardo, na siya ring kalaban niya sa mayoralty race.

“Parang pelikula, puro palabas”: Pasig Vice Mayor binanatan si Mayor Vico Sotto

ni Jasmin Joy Evangelista | January 19, 2022

Naglabas ng pahayag si Pasig Vice Mayor Iyo Bernardo nitong Martes ng gabi dahil umano sa mga paratang at paninira ni Mayor Vico Sotto sa pangalan ng Caruncho family sa lungsod.

Ayon kay Bernardo, puro palabas sa social media ang ginagawa ng alkalde. Tila isa umano itong movie actor na gumagawa ng palabas para sa mga manonood para matakpan ang mga pagkakamali at pagkukulang sa panunungkulan.

"Nakakalungkot na ang Pasig, naging isang pelikula na lamang. Puro palabas," ani Bernardo.

“Nakakalungkot na ngayon pilit na ginagamit ang internet para matabunan lahat ng pagkakamali at kakulangan sa serbisyo... Parang palabas sa TV. Alam mo (Sotto) ang formula para mapansin, sumikat at pag-usapan," pahayag pa niya.

Sinisira umano ni Sotto ang pangalan at reputasyon ng pamilya Caruncho sa naging pahayag nito sa flag raising ceremony last week.

“Suwerte ka sumikat ka ngayong panahon ng social media… Alam mo ang formula para mapansin, sumikat at mapag-usapan,” pahayag ng bise alkalde.

Si Sotto ay kasalukuyang naka-isolate matapos magpositibo sa COVID-19.

Sila ay magkatunggali sa pagka-alkalde ng Pasig ngayong 2022 elections.

Masuwerte raw si Sotto at sumikat ngayong panahon ng social media.

"Hindi mo naranasan noong panahon na sinusukat ang eleksyon sa husay ng paglilingkod," ani Bernardo.

"Sa kalye nasusukat ang tunay na serbisyo, ang tunay na pagmamalasakit," dagdag pa niya.

Sinagot din ni Bernardo ang mga pahayag ni Sotto sa flag raising ceremony kung saan hindi umano sumasagot ang vice mayor sa mga text at tawag ng alkalde para pag-usapan ang mga city-related matters.

"Ito ang telepono ko. Wala pong message o tawag si Mayor Vico Sotto," aniya.

"Para sadyain mong palabasin na ako ay nasa air-conditioned room lang at hindi nagtratrabaho, kailangan kong ipaalala sa iyo ang ambag ko at ng aking pamilya sa Pasig," dagdag pa niya.

Ipinaliwanag niya na siya ay nagtatrabaho at ginagawa niya ang kanyang mga tungkulin bilang vice mayor ng Pasig.

"Lahat po ng batas at budget na ikagagaang ng pamumuhay niyo ngayon, sa pamumuno ko, kasama ng buong city council, ay amin na pong naipasa," giit ni Bernardo.

Pinatawag pa raw ni Sotto ang mga miyembro ng city council at pinagalitan hinggil sa pagtataas ng cash aid ng tricycle drivers.

“Ang P3,000 budget para sa ating mga TODA (Tricycle Operators and Drivers Association) ay minabuti naming gawing P4,000 pero imbis na ikatuwa mo ito, pinatawag mo kasi sa 8th floor para pagalitan," ani Bernardo.

"Ako kasama ang buong city council ang direktor at cameraman. Hindi mabubuo ang isang pelikula na wala kami kung saan ang aktor ay umaarte lamang para mabigyang buhay ang kuwento pero sila ang sumisikat, pinapalakpakan," aniya pa.

Kinuwestiyon din ni Bernardo ang pag-appoint umano ni Sotto ng department heads na hindi naman taga-Pasig.

"Nakakalungkot isipin na sinakop na tayo. Wala ka bang bilib sa kakayahan ng mga Pasigueño?" aniya.

"Ano ang mayroon sa mga nakaupo ngayon na taga-Quezon City at San Juan na wala sa mga pinamumunuan mo?" tanong niya.

Sinabi rin ng bise alkalde na hindi sana siya maglalabas ng video statement kung hindi siya binanatan publicly ni Mayor Vico.

"Kaya ako magsasalita ngayon ay para proteksyunan ang pangalan ng pamilya Caruncho na pilit mong dinudumihan," ani vice mayor Bernardo, na apo ni former Pasig Mayor Emiliano Caruncho Jr.