P216 M idineklarang gastos sa VP race ni Sara Duterte

ni Lolet Abania | June 8, 2022

Mahigit sa P216 million ang idineklara ni Vice President-elect Sara Duterte na kanyang nagastos para sa kampanya sa 2022 vice presidential race.

Batay sa kanyang Statement of Contributions and Expenditures (SOCE) na inihain sa Commission on Elections (Comelec), ang kabuuang mga nagastos o expenditures ay P216,190,935.06. Habang ang kabuuang kontribusyon na kanyang natanggap ay pareho ring P216,190,935.06.

Sa naturang halaga, P79,581,690.15 ay nanggaling sa mga in-kind contributions na natanggap mula sa ibang sources habang P136,609,244.91 ay in-kind contributions mula sa kanyang political party.

Base sa SOCE, si Duterte ay walang natanggap na cash contributions alinman sa ibang mga sources o sa kanyang political party. Nitong Martes, isinumite ni Duterte ang kanyang SOCE, isang araw bago ang June 8 deadline.

Inaasahan ng Campaign Finance Office ng Commission on Elections (Comelec) na matatanggap ang lahat ng SOCEs ng mga kandidato ngayong Miyerkules.

Ayon pa sa Comelec, lahat ng kandidato, nanalo man o natalo ay kailangang magsumite ng kanilang SOCEs sa Comelec, 30 araw matapos ang election day.

Base sa Comelec ang mga kandidato sa pagka-pangulo at pagka-bise presidente ay pinapayagang gumastos ng P674 million para sa kanilang kampanya, o P10 bawat isa para sa 67.44 million registered voters.

2K pulis, ide-deploy para sa inagurasyon ni VP-elect Sara Duterte sa Davao City

ni Lolet Abania | June 4, 2022

Nasa 2,000 personnel ang itatalaga ng pulisya para sa inagurasyon ni Vice President-elect Sara Duterte-Carpio sa Davao City sa Hunyo 19.

Ayon kay Davao City Police Offices spokesperson Police Major Maria Teresita Gaspan, nasa heightened alert na ang kanilang mga borders simula ng mga pambobomba sa ilang bahagi ng Mindanao nitong mga nakaraang linggo ng Mayo, habang ang kanilang

“Davao Defense System” security scheme ay kanilang in-activate. “Lahat ng mga passengers at saka vehicles subjected for inspection and then we have even recommended na ‘yung mga lalabas, isang sakayan lang doon sa Davao City... terminal so that no similar incident will happen like what happened in central Mindanao,” sabi ni Gaspan sa public briefing.

“So far, no direct threat for Davao City, however we won't be complacent about it considering sa nangyari na bombing sa central Mindanao kaya we always keep up our security measures,” dagdag niya.

Ayon pa kay Gaspan, sa ngayon ang Davao City aniya ay, “peaceful,” habang nagtakda na rin sila ng isang contingency plan. Gayundin, ang Philippine National Police (PNP) ay nasa “high alert” na sa buong bansa.

Canvass ng 2022 election votes para sa pangulo at VP, tapos na.. Marcos at Sara, iprinoklama — NBOC

ni Lolet Abania | May 25, 2022

Tinapos na ng Congress, tumatayong National Board of Canvassers (NBOC), ang opisyal na tallying of votes para sa pangulo at pangalawang pangulo sa 2022 national and local elections.

Idineklara ng Joint Canvassing Committee (JCC), na co-chaired nina Senate Majority Leader Juan Miguel Zubiri at House Majority Leader Martin Romualdez, ang completion ng proseso ng certificates of canvass (COCs) ng alas-3:33 ng hapon ngayong Miyerkules.

Ang canvassing ay tinapos na nila kahit wala pa ang canvassing ng overseas absentee voting (OAV) ng mga boto mula sa Argentina at Syria, kung saan ang mga ballot boxes sa naturang mga bansa ay hindi pa dumating.

Isang report ng canvass ang ihahanda ng JCC at isusumite ito sa Joint Public Session ng House of Representatives at ng Senate of the Philippines. Batay sa rules, “the JCC report shall be approved by a majority of votes of all its members, each panel voting separately. The report shall be signed by the majority of the members of each panel.”

Matapos nito, ang mga chairpersons ng JCC ay ipiprisinta at i-sponsor ang report, habang sinasamahan ito ng Resolution of Both Houses na magpoproklama sa duly-elected president at vice president.

Sa adoption ng Resolution of Both Houses, sina Senate President Vicente Sotto III at Speaker Lord Allan Velasco ay ipoproklama na ang mga nahalal at iluluklok na pangulo at pangalawang pangulo.

Base sa partial at unofficial tally, si dating Senator Ferdinand “Bongbong” Marcos Jr. ang nanguna sa 2022 elections sa presidential race na may 31,104,175 votes, kasunod ni Vice President Leni Robredo na may 14,822,051 votes.

Para sa vice-presidential race nanguna si Davao City Mayor Sara Duterte, ang anak ni outgoing President Rodrigo Duterte, na may 31,561,948 votes, kasunod si Senator Francis Pangilinan na may 9,232,883 votes.

Ayon sa GMA News Research, ang napipintong proklamasyon ni Marcos, ang pinakamabilis na presidential proclamation matapos ang 1986 EDSA Revolution.

Noong 1992, ang proklamasyon ni dating Pangulong Fidel V. Ramos ay inabot ng 42 araw matapos ang eleksyon; 18 araw para sa proklamasyon kay dating Pangulong Joseph Estrada noong 1998; 45 araw para sa proclamation ni dating Pangulo Gloria Macapagal-Arroyo; 30 araw para sa proklamasyon ng yumaong dating Pangulong Benigno Aquino III; at 21 araw para sa proklamasyon ni outgoing President Rodrigo Duterte. Umabot lamang ng 16 araw ang proklamasyon ni Marcos matapos ang May 9 national at local elections.