2.2 M doses ng Pfizer, sa June 11 pa ang dating

ni Lolet Abania | June 1, 2021

Darating na ang karagdagang 2.2 milyong doses ng Pfizer-BioNTech COVID-19 vaccine sa bansa sa Hunyo 11, ayon kay Vaccine Czar Secretary Carlito Galvez, Jr..

“At ngayon, June 11 ay ia-announce ko na po na ‘yung 2.2 million ay darating po dito ngayon sa ating bansa,” ani Galvez sa Palace briefing ngayong Martes.

“At ito po ay… diretso na po sa mga bayan natin sa Cebu, sa Davao, at saka dito sa Metro Manila,” dagdag niya.

Matatandaang sinabi ni Galvez na ang mga doses ay nakatakdang dumating bago matapos ang Mayo.

Sa ngayon, ayon kay Galvez, ang Pilipinas ay may matatag nang supply ng bakuna mula sa COVAX Facility, kung saan mahigit sa dalawang milyong doses kada buwan ang kanilang ibibigay.

“‘Yung vaccine supply natin will be stabilized on the month of July, lalo na ‘yung AstraZeneca, Moderna, Sinovac, at saka Sputnik,” sabi ng vaccine czar.

Kahapon, nabanggit ng Malacañang, tinatayang 3.4 milyong doses ng COVID-19 vaccines ang inaasahang i-deliver sa Pilipinas ngayong Hunyo.

Samantala, nitong Mayo 30, umabot na sa 1.2 milyong indibidwal ang fully vaccinated kontra-COVID-19.

Novavax, sa July pa ang dating

ni Lolet Abania | May 28, 2021

Nakatakdang matanggap ng Pilipinas ang 13 milyong doses ng Novavax vaccines sa ikatlong quarter pa ng taon, ayon sa opisyal ng vaccine expert panel.

“Novavax is found to be efficacious against the original strain, the UK variant and the south African strain,” ani Dr. Nina Gloriani, head ng Vaccine Development Expert Panel, sa isang online forum ngayong Biyernes.

“We are sourcing this from the Serum Institute of India. It’s taking some time because they still have to apply for an emergency use authorization,” sabi pa ni Gloriani.

Nabatid na noong March, sinabi ni Vaccine Czar Carlito Galvez, Jr. na pumirma sa kasunduan ang pamahalaan para sa supply ng 30 milyong Novavax doses ng COVID-19 vaccine na mula sa pinakamalaking vaccine manufacturer sa buong mundo.

Nakapaloob din sa supply deal ang pag-awtorisa sa Pilipinas na kumuha ng karagdagang 10 milyong bakuna kapag kinailangan pa ito ng bansa.

Maraming mga bansa ang nagnanais na makatanggap ng Novavax jabs sa dahilang maaari itong ma-store o ilagay sa regular refrigeration temperatures at hindi tulad ng ibang brands na nangangailangan ng below zero temperatures para mapanatili ang efficacy ng vaccine.

Matatandaang nito lamang buwan, sinabi ng Novavax na posibleng maantala ang kanilang aplikasyon para sa emergency use authorization (EUA) sa United States at Europe hanggang sa third quarter ng 2021.

Nabakunahan kontra COVID-19, 4 M na

ni Mary Gutierrez Almirañez | May 23, 2021

Mahigit 4 milyong indibidwal na ang nabakunahan kontra COVID-19, kung saan 162,513 jabs ang naging daily average, ayon sa National Task Force (NTF) against COVID-19 ngayong araw, May 23.

Batay pa sa datos ng NTF, 4,097,425 na ang kabuuang bilang ng mga nabakunahan, kabilang ang 969,939 na nakakumpleto sa dalawang dose at ang 3,147,486 na nabigyan ng unang dose.

Dagdag pa ng NTF, "Based on the Bloomberg report, in terms of total number of anti-COVID vaccines administered, the Philippines ranks second out of 10 ASEAN Member States; 13th out 47 countries in Asia; and 37th out of 196 countries worldwide."

Matatandaan namang naitala kahapon ang pinakamaraming nabakunahan sa loob lamang ng isang araw sa ‘Pinas.

Gayunman, malayo pa rin ang mga nabanggit na bilang sa tinatarget na 50 hanggang 70 million na fully vaccinated, upang tuluyang maabot ng bansa ang herd immunity.

Sabi pa ni Vaccine Czar Carlito Galvez, Jr., "We need to maintain this momentum and remain focused on building up our vaccine supply, ramping up our vaccination rate, and encouraging more of our countrymen to get the jab."

Giit pa niya, "I am confident that as we start inoculating our economic frontliners and indigenous population by June, we will be able to double this figure and vaccinate more than four million people as long there is a steady supply of vaccines."

Sa ngayon ay 8,279,050 doses ng COVID-19 vaccines na ang dumating sa ‘Pinas.

Inaasahan namang darating ang iba pang suplay ng bakuna sa Hunyo.