‘Di bakunadong health workers, bawal sa France

ni Ronalyn Seminiano Reonico | July 13, 2021

Hindi papayagan ng pamahalaan ng France na magtrabaho ang mga health workers na hindi pa nababakunahan laban sa COVID-19.

Saad ni Health Minister Olivier Veran, "By Sept. 15, all health workers must have had their second dose.”

Ayon naman kay President Emmanuel Macron, kailangang magpabakuna na ang publiko dahil sa patuloy na pagtaas ng kaso ng COVID-19.

Aniya, "We must go towards vaccination of all French people, it is the only way towards a normal life.”

Ayon kay Macron, simula sa Agosto ay kailangan nang magpakita ng health pass o negative COVID-19 test result at proof of vaccination ang sinumang nais magpunta sa mga bar, restaurant, cinemas at theaters. Kailangan na ring magpakita nito kung sasakay sa mga “long-distance trains and planes” simula sa nasabing buwan.

Saad pa ni Macron, "We will enforce restrictions on those who are not vaccinated rather than on everyone.”

2.8 M Pinoy, fully vaccinated na kontra-COVID-19

ni Lolet Abania | July 5, 2021

Umabot na sa mahigit 2.8 milyong indibidwal ang naitalang nakatanggap ng kumpletong dalawang doses ng bakuna hanggang nu'ng Hulyo 4 matapos ang higit na apat na buwan mula nang simulan ng bansa ang vaccination program kontra-COVID-19.

Batay sa latest bulletin ng National Task Force Against COVID-19, umabot sa 11,708,029 doses ng COVID-19 vaccines na ang kanilang na-administer mula sa 1,197 vaccination sites sa buong bansa.

Ayon din sa NTF, noong nakaraang linggo, humigit-kumulang sa 254,141 doses kada araw ang nabigyan nila ng COVID vaccines.

Nasa kabuuang 8,839,124 katao ang nakatanggap ng unang dose ng COVID-19 vaccine habang 2,868,905 indibidwal ang fully vaccinated na matapos na makumpleto ang dalawang doses ng bakuna.

Kabilang sa mga nabakunahang indibidwal ng unang dose ay nasa mahigit 1.7 milyon na mga health workers, 2.5 milyong senior citizens, 2.9 milyon na persons with comorbidities, 1.3 milyon na mga essential workers at 256,431 na mga indigents.

Habang ang mga fully vaccinated na Pinoy ay nasa mahigit sa 1.1 milyon na mga health workers, 788,630 mga senior citizens, 897,719 persons with comorbidities, 26,109 mga essential workers, at 227 mga indigents.

Target ng pamahalaan na tapusing mabakunahan kontra-COVID-19 ang 50 milyon hanggang 70 milyong indibidwal ngayong taon.

“The government is urging eligible populations belonging to priority groups A1 to A5 to register with their local government units, get vaccinated, and complete the required number of doses as scheduled,” pahayag ng task force.

“Regardless of vaccination status, everyone is urged to continue practicing the minimum public health standards as you may still get infected with COVID-19 and infect other people,” dagdag ng NTF.

1 milyong Pinoy, natuturukan kada linggo — Galvez

ni Lolet Abania | June 15, 2021

Mahigit sa 7 milyong doses ng COVID-19 vaccines na ang na-administer sa mga mamamayan hanggang nitong Hunyo 14, ayon kay Vaccine Czar Secretary Carlito Galvez, Jr..

“As of yesterday, June 14, we have already breached 7 million jabs administered,” ani Galvez sa isang Senate hearing ngayong Martes.

Sa kanyang presentasyon, binanggit ni Galvez na may kabuuang 7,045,380 doses ang naibigay sa mga kababayan natin simula Marso 1 hanggang Hunyo 14.

Kabilang dito ang 980,471 medical frontliners, 486,945 senior citizens, 429,301 person with comorbidities, at 7,067 essential workers na fully vaccinated na may kabuuang 1,903,784 doses ng COVID-19 vaccines ang naibakuna.

Samantala, may 5,141,596 indibidwal naman ang na-administer ng first doses ng COVID-19 vaccine kabilang ang 1.452 milyong medical workers, 1.753 milyong senior citizens, 1.754 milyon sa persons with comorbidities, at 182,130 sa essential workers.

Sa kasalukuyan, mayroong 3,944 vaccination sites ang nailatag na ng pamahalaan.

Sa 12,705,870 COVID-19 vaccines, nasa 10,374,850 ang nai-deploy ng gobyerno sa mga vaccination sites.

Sa parehong presentation, sinabi ni Galvez na nakamit na ng gobyerno ang isang milyong jabs kada isang linggo na nangyari nitong magkasunod na linggo.