Qualified na si Diaz sa Olympics; Gymnast Yulo, hinahasa na

ni ATD / VA - @Sports | April 20, 2021

Humakbang palapit sa inaasam niya at ng sambayanang Filipino na unang gintong medalya sa Olympics si Filipina weightlifter Hidilyn Diaz matapos pormal na mag-qualify sa naantalang 2020 Tokyo Olympics.

Pormal na nag-qualify si Diaz makaraang lumahok sa women's 55 kg event ng Asian Weightlifting Championships na idinaos sa Tashkent, Uzbekistan noong Linggo.

Pumang-apat ang 2016 Rio de Janeiro Olympics silver medalists sa binuhat nitong kabùuang 212 kg. kasunod ng Chinese athletes na sina Qiuyun Liao (222 kg) at Yajun Li (221 kg) na siyang kumopo ng gold at silver medal ayon sa pagkakasunod at Muattar Nabieva ng Uzbekistan (213 kg) na nagwagi ng bronze.

Bago ang pagdaraos ng Asian championships, isang torneo na lang ang kailangang salihan ni Diaz para makumpleto ang kailangang dami ng bilang ng mga torneo para mag-qualify sa pinakamalaking sporting event sa buong mundo.

Ang Tokyo Games ang ika-apat na sunod na Olympics stint na para kay Diaz. Pampito si Diaz sa mga Filipino athlete na nagkamit ng slot sa Tokyo Games kasunod nina pole vaulter EJ Obiena, gymnast Carlos Yulo at mga boxers na sina Eumir Marcial, Irish Magno, Nesthy Petecio at Carlo Paalam.

Samantala, hinahasa na ni national gymnast Carlos Edriel Yulo ang isa sa kanyang pangunahing armas na triple backflip. Posibleng ito ang magbigay ng unang gintong medalya sa Pilipinas sa Olympics.

Kumpiyansa si Gymnastics Association of the Philippines (GAP) president Cynthia Carrion na kapag nahasa ni Yulo ang kanyang triple backflip ay malaki ang tsansang maiuwi ang mailap na gold medal sa Olympics. “Sure gold if he does the triple backflip well,” sabi ni Carrion.

Sinabi rin ni Carrion na puspusan ang pagsasanay ni Yulo sa nasabing matinding armas.

Naging susi sa tagumpay ni Yulo ang triple backflip nang masilo ang gold medal sa 2019 FIG World Championships sa Stuttgart, Germany. Hindi masyadong nakasali sa torneo si Yulo dahil sa pamiminsala ng COVID-19 pero maganda naman ang takbo ng kanyang training ayon kay Carrion.

Tulong ng LGU's hiningi ng PSC-POC para sa atletang pa-SEAG

ni Gerard Peter / VA - @Sports | April 17, 2021

Nagkasundo ang Philippine Sports Commission (PSC) at ang Philippine Olympic Committee (POC) na humingi ng tulong sa mga local government units (LGUs) para sa paghahanda ng Team Philippines sa 31st Southeast Asian Games na gaganapin sa Vietnam bago matapos ang taon. Naghahangad na maidepensa ang overall championship o kaya'y tumapos sa top 3 sa gitna ng kinakaharap na global health crisis, nahaharap sa matinding hamon ang mga national athletes.

Sa kanilang naging pagpupulong noong nakaraang Huwebes, tinanong ni POC president Rep. Abraham Tolentino ang mga kapwa sports officials kung sasapat ang inilaang P200 milyon para sa preparasyon at partisipasyon ng bansa sa biennial meet. Batay sa tinatayang magiging gastos, kalahati ng nasabing budget ay para sa aktuwal na pagsabak ng halos 700-man Philippine delegation. Pagkaraan ng mga naging diskusyon, nagkasundo ang mga spots officials na hingin ang tulong ng mga LGUs na handang mag-ampon ng teams at tumulong sa ibang aspeto ng gagawin nilang training gaya ng venue, pagkain at tirahan. “Baka may gustong magninong muna sa ating mga atleta, we are very open to this,” ani PSC Commissioner Ramon Fernandez na siya ring Philippine team’s Chef de Mission sa SEAGames. Ayon kay Tolentino, kinakailangan nilang hilingin ang tulong ng Department of the Interior and Local Government upang mag-isyu ng direktiba hinggil sa “godfather-LGU program.” Nagboluntaryo rin si Tolentino na ampunin ang mga national cyclists at skateboarders sa kanyang distrito sa Cavite. “The joint secretariat for the SEAG is carefully working on the SEAG plan,” wika pa ni Fernandez.

Puntirya ang petsang Hulyo 1 para simulan ang training, may panahon pa umano para makipag- usap sa mga LGUs ayon pa kay Fernandez. Umaasa aniya sila na magiging positibo ang pagtugon ng mga tao sa programa bilang pagpapakita ng kanilang pagiging makabayan dahil para naman ito sa bansa.

Kabilang sa mga dumalo sa pulong kasama nina Tolentino at Fernandez sina POC Secretary-General Edwin Gastanes, POC Deputy Secretary-General Karen Caballero, PSC Executive Director Guillermo Iroy Jr., PSC Deputy Executive Directors Queenie Evangelista at Merlita Ibay at PSC National Training Director Marc Velasco.

Fil-Canadian Nelson, nagtala ng new record sa Hammer Throw

ni ATD / VA - @Sports | April 14, 2021

Isang bagong national record ang naitala sa athletics event na women's hammer throw ng Filipina-Canadian na si Shiloh Corrales-Nelson. Naitala ng 19-anyos na si Corrales-Nelson ang bagong Philippine record matapos ang gold winning performance sa Triton Invitational sa San Diego, California noong weekend.

Naibato ng first year student sa University of California Riverside (UCR) ang hammer sa layong 50.63 meters na bumura sa 8-taong rekord na 50.55 meters na ginawa ni Loralie Amahit-Sermona noong Asian Championships sa Pune, India.

Ayon kay UCR track coach Candace Fuller, nagawa ni Corrales-Nelson ang bagong rekord sa huli nitong pagbato. Si Shiloh at ang ate nitong si Zion,silver medalist noong 30th Southeast Asian (SEA) Games ay may dugong Pinoy dahil sa kanilang inang si Editha Corrales. Dahil bata pa, kumpara kay Amahit-Sermona na edad 29-anyos ng maitala ang dating rekord, inaasahang malayo pa ang mararating ni Corrales-Nelson.

Samantala, mahirap pero sisikapin ng Filipino triathletes na makasilo ng olympic berth kaya naman puspusan ang kanilang paghahanda para sa Asian Championships na gaganapin sa Hatsukaichi, Japan sa April 24 hanggang 25.

Puntirya nina Portugal-based Kim Mangrobang, Kim Remolino ng Cebu at Fil- Spanish Fernando Casares na makasikwat ng panalo laban sa mga tigasing katunggali para mahablot ang tig-isang slot sa men at women's division ng Tokyo Olympic Games.

Sa ABril 18 tutungo sina Mangrobang, Remolino at Casares sa Japan para magkaroon pa ng oras sa protocols at quarantine period.

Maliban sa Olympic slots, magsisilbing selection ang Asian Championships para sa Philippine team na sasabak sa Southeast Asian Games sa Hanoi, Vietnam.

Inamin ni SEA Games mixed relay gold medalist Casares sa Radyo Pilipinas na gagawin nito ang lahat para manalo sa Asian Championships.

May anim na Pinoy athletes pa lang ang may tiket sa quadrennial meet na ilalarga sa Hulyo 23 hanggang Agosto 9 sa Tokyo, Japan.

Dobleng pag-iingat ang ginagawa ng national athletes upang hindi makapitan ng mapanganib na coronavirus (COVID-19).