Buo na ang 4-team cast sa semis ng PVL Conference

ni VA - @Sports | August 07, 2021

Inangkin ng Petro Gazz ang 4th at last slot matapos nilang walisin ang kanilang laban kontra Sta. Lucia Lady Realtors noong Huwebes ng gabi. Humataw ng matitinding hits at blocks ang Petro Gazz upang makamit ang ika-apat na semifinals berth sa bisa ng straight sets-25-13, 25-21,25-22 panalo sa Sta. Lucia sa PCV Socio-Civic Cultural Center sa Bacarra, Ilocos Norte.

Tila hihirit pa ng 4th set ang Lady Realtors nang lamangan nila,17-15 ang Angels sa third set. Pero tumapos ng malakas ang Angels upang pigilin ang kanilang tangka.

Umarangkada ang Angels ng 10-5 run na natapos sa pamamagitan ng isang error ng Sta. Lucia para ganap na maangkin ang panalo,ang kanilang ika-6 sa loob ng walong laro.

Nanguna sa nasabing panalo ng Petro Gazz si Myla Pablo na umiskor ng 17 puntos kasunod si Riri Meneses na may 15 puntos tampok ang apat na kill blocks. Nalaglag naman ang Lady Realtors sa fifth spot taglay ang markang 5-4,panalo-talo. Sinamahan ng Petro Gazz ang mga naunang semifinalists Choco Mucho Flying Titans (6-1), Chery Tiggo Crossovers’ (6-2) at Creamline (7-1). Dahil dito,lahat ng natitirang mga laro sa eliminations ay magsisilbing tune-up matches na lamang para sa mga semifinalists at para sa final standings sa mga nabigong umusad sa semis.

Obiena handa sa bagong strategy at adjustments sa Olympic finals

ni Gerard Arce / VA - @Sports | August 03, 2021

Tatangkaing makamit ni 2019 Universiade gold medalist Ernest John “EJ” Obiena ang pinakamataas na talon sa 2020+1 Summer Olympic Games sa men’s pole vault finals ngayong araw, Martes, kontra sa 13 iba pa, na kinabibilangan nina defending champion Thiago Braz ng Brazil at kasalukuyang World titlist at record holder Arman Duplantis ng Sweden sa Olympic Stadium sa Tokyo, Japan.

Naging batayan ng halos lahat ng kwalipikado sa final event ang taas na 5.75meters, ngunit mas higit na magkakasukatan ng pataasan ng talon sa ere gamit ang pole vault ang mga nalalabing manlalaro na hangad na makamit ang gintong medalya sa Tokyo Olympics.

Inihayag ni Philippine Athletics Track and Field Association (PATAFA) President Dr. Philip Ella Juico na nangapa sa runway nung qualifying ang 2019 Southeast Asian Games champion dahil mayado umanong matalbog ang runway, habang nagkaroon rin ng miscommunication sa isang technical official sa naturang paligsahan.

“As coach Emerson (Obiena) said and even Mr. Capistrano, all the competitors are adjusting, all of them have flapped the first and even second attempt, even Duplantis and several others. In the case of EJ, he is getting used in the hard runway, matalbog daw, he’s adjusting to it then. There was also a difficulty with the technical official who block his view of his own marker, marker niya ng last 6 steps niya, because the technical official has kept on moving, kiti-kiti siguro, malikot. Those things, who would think that there was a problem. Some of them complaining to the same technical officials on the unnecessary movements,” pahayag ni Juico sa Radyo Pilipinas 2.

Bukod kina Braz at Duplantis, kabilang rin sa final round sina 2012 London Olympics champion at Rio Silver medalist Renaud Lavillenie ng France, World No.3 Piotr Lisek ng Poland, Christopher Nielsen ng US, Bo Kanda Lita Baehre ng Germany, KC Lightfoot ng US, Kurtis Marschall ng Australia, Menno Vloon ng Netherlands, Emmanuil Karalis ng Greece, Harry Coppell ng Great Britain, Ersu Sasma ng Turkey, at Oleg Zernikel ng Germany.

Sprinter Knott, bigo sa Semis; Sports Institute sa Summit

ni VA / MC - @Sports | August 03, 2021

Nabigo ang pambato ng Pilipinas na si Kristina Knott na makausad sa semifinal ng Women's 200-meter event sa Athletics sa Tokyo 2020+1 Olympics. Rumehistro si Knott ng oras na 23.80 seconds sa Heat 7 kung saan ito ang nagtapos na huli sa limang runners na sumabak sa Heat.

Bigo si Knott na magtapos bilang Top 3 sa kanyang Heat kaya hindi nakausad sa semis o talunin ang tiyempong 23.16 seconds. Malayo ang nagawang oras ni Knott sa kanyang personal best — at maging sa kanyang national record na 23.01 na nai-set nito sa 2019 SEAG. Malayo rin ang record nito sa Olympics kaysa sa kanyang best na 23.17.

Tinapos ni Knott ang kanyang unang kampanya para sa Olympics na ranked 37th sa event na nilahukan ng 42 runners. Isa sa runner -- Jamile Samuel – ang hindi nakatakbo kaya 41 participants lang ang nakalahok sa event.

Nanguna sa Heat 7 si Jenna Prandini ng Estados Unidos na naorasan ng 22.56 segundo, kasunod si Gina Bass ng Gambia na nagtala ng 22.74 segundo at pumangatlo ang Australian sprinter na si Riley Day na nagposte ng 22.94 segundo.

Samantala, ang mahalagang role ng Philippine Sports Institute (PSI) ang sentro ng talakayan sa pagsiklab ng Session 24 na pangalawa sa huling session ng online National Sports Summit 2021 sa Miyerkules, August 4.

Resource speaker ng isyu si PSC-PSI Grassroots Program Head Abigail Marie Rivera para sa two-hour program na dadaluhan ng mahigit 500 participants mula sa iba’t ibang local government units (LGUs), National Sports Associations (NSAs), sports educators, stakeholders, at iba pang private entities nationwide.

Binuhay at opisyal na inilunsad noong 2017 ni PSC Chairman William Ramirez ang PSI sa ilalim ng administrasyon ni President Rodrigo Duterte. “This is a great opportunity for us to present the role of the PSI to our participants since most of them are our partners in grassroots development,” ani PSI National Training Director at NSS Project Director Marc Edward Velasco.