Hora Jr., champ sa Go-For-Gold Criterium men's elite race

ni VA @Sports | March 6, 2024

Rumatsada sa mga huling 75 metrong patawid ng finish line si Esteve Hora Jr. ng Standard Insurance upang pangibabawan ang men’s elite race ng Go For Gold Criterium Race Series 1 noong Linggo sa  Sacobia Bridge sa Clark, Pampanga. Nagtala si Hora ng tiyempong 53 minuto at 30.97 segundo para tanghaling kampeon ng karera. Inungusan nya sina Mervin Corpuz ng Excellent Noodles Pro Team (53:31.00) at Go For Gold Cycling Team rider Aidan James Mendoza (53:31.10) na tumapos na ikalawa at ikatlong ayon sa pagkakasunod.“Nagkaroon ako ng pagkakataon kaya sinamantala ko na.

Masaya ako kasi naipakita ko kung ano ang kaya ko," pahayag ng tubong San Manuel, Pangasinan na si Hora. Tumapos namang pang-apat ang beteranong si Ronald Oranza ng Standard Insurance na nagtala ng identical clocking kasama nina Mendoza.Nilahukan ng 400 mga siklista na nahati sa 10 magkakaibang kategorya, layunin ng kick-off leg ng 3-leg race series na ibalik ang sigla ng sport. “Quality races have significantly decreased here in the Philippines. We want to bring them back starting with this criterium series,” ayon kay Go For Gold founder Jeremy Go.

Nangibabaw naman sa women’s junior at open categories ang sprinter ng Team Bikexzone/Champbullies na si Kim Bonilla makaraang talunin ang kanyang beteranang teammate na si Jermyn Prado sa open. Naorasan si Bonilla sa open ng 49:06.07 kasunod si Prado (49:24.62) at Althea Campana (50:28.12).

Nagtala naman siya ng 40:24.48 sa junior race kung saan tinalo niya sina Maria Michaela Mandel (41:06.54) at Roselle Suarez (41:06.64).

Nanguna naman ang mga riders ng Go For Gold sa men’s junior makaraang nagtala ng 1-2 finish nina Marvic Mandac (36:38.52) at Mac BJ Arellano (36:42.67).

Ang susunod na yugto ng karera ay idaraos sa Cebu sa Hulyo para sa hangad ng Go For Gold na tumuklas ng mga bagong cycling talents sa Visayas region habang ang third leg ay gaganapin sa Mindanao sa Setyembre o Oktubre.

Obiena, pang-11 sa World Athletics Indoor C'ships

ni VA @Sports | March 5, 2024

Buhat sa dalawang sunod na gold medal finish, tila nalihis sa kanyang target ang Filipino pole vaulter na si EJ Obiena sa pagsabak nito sa World Athletics Indoor Championships nang tumapos itong kabilang sa bottom half ng 11 mga kalahok sa nasabing event.

Sa kabila ng kanyang kasalukuyang Estado, hindi maiiwasang magkaroon din ng off day si Obiena at sa kasamaang-palad ay natapat ito sa pagsalang niya sa world indoor championship.

Tumapos lamang na pang-siyam ang Paris-bound Filipino pole vaulter sa kompetisyong idinaos noong Linggo-Marso 3 sa Glasgow, Scotland.Target sana ni Obiena na maging unang Filipino na magwagi ng medalya kapwa sa indoor at outdoor world championships, hanggang 5.65 meters lamang nagawang matalon ni Obiena.

Nag-foul sa kanyang first vault, nakadalawang attempts si Obiena bago nalagpasan ang 5.65 meters at dun na siya nahirapang makabalik sa kontensiyon.Bigo sa kanyang sumunod na dalawang attempts sa taas na 5.85 meters, ipinataas niya ang baras sa 5.90 meters para sa huli niyang tsansa, subalit bigo pa rin siyang matalon ito.Nabigong dugtungan ng world ranked no.2 na si Obiena ang kanyang 5.83 meters na gold medal win sa Memorial Josip Gasparac sa Croatia at ang kanyang Asian indoor record breaking vault na 5.93 meters sa ISTAF Indoor Berlin sa Germany.Tagumpay namang naidepensa ng world record holder at reigning Olympic champion ang kanyang indoor crown sa kanyang naitalang  6.05 meters.

Pumangalawa sa kanya si Sam Kendricks ng US na nagwagi ng silver sa kanyang vault na 5.90 meters habang nagkamit ng bronze si Emmanouil Karalis ng Greece sa naitalang 5.85 meters.

Walo sa mga Paris Olympic-bound pole vaulters ang lumahok sa nasabing kompetisyon sa Glasgow na kinabibilangan nina Obiena, Duplantis,Karalis, ang Australian na si Kurtis Marschall, Thibaut Collet ng France.

Gilas angat ang world rankings, Rondina, PVL Player of the Week

ni VA @Sports | March 4, 2024

Dahil sa magandang performances na kanilang ginawa sa nakaraang first window ng 2025 FIBA Asia Cup Qualifiers, umangat ng isang baytang ang Gilas Pilipinas sa world rankings.

Buhat sa pagiging world’s 38th, umakyat ang Pilipinas sa No. 37 spot makaraang walisin ang kanilang dalawang laro sa qualifiers noong nakaraang buwan.

Sa ilalim ng kanilang permanent coach na si Tim Cone, ginapi ng Gilas sa una nilang laban ang Hong Kong, 94-64, sa Tsuen Wan Stadium bago isinunod ang Chinese Taipei, 106-53, sa larong idinaos sa PhilSports Arena sa Pasig City.

Nanatili naman silang No.8 sa Asian rankings.

Hindi naman natitinag sa top 3 ng world rankings ang United States of America (USA) Spain at Germany bilang no.1,2,3 ayon sa pagkakasunod-sunod.

Ang iba pang nasa Top 10 ay ang Serbia (4th) , Australia (5th) , Latvia(6th), Canada(7th), Argentina(8th), France (9th) at Lithuania(10th).

Samantala, hindi maipagkakaila ang matinding laro na ipinapakita ni reigning MVP Cherry Ann “Sisi” Rondina upang tanghaling PVL Press Corps Player of the Week nang paangatin ng maaga sa tuktok ng liderato ang Choco Mucho Flying Titans sa pagpapatuloy ng aksyon at hampasan sa 8th edisyon ng Premier Volleyball League (PVL) All-Filipino Conference.

Sa kabila ng kanilang kabiguan sa nakaraang All-Filipino Conference, kung saan kinapos itong matupad ang kagustuhang maibulsa ang kauna-unahang titulo na siya ring unang podium finish ng koponan laban sa kapatid na Creamline Cool Smashers, nananatiling pwersa sa atake ang reigning MVP sa pagkasa ang doble-doble pigura sa 24 puntos mula lahat sa atake kasama ang 22 excellent receptions para matakasan ang lipad ng Petro Gazz Angels sa 24-26, 25-22, 25-18, 24-26, 15-13 nung Pebrero 27.

Sinundan naman ito ng 23 puntos mula sa 21 atake at dalawang aces, kasama ang 13 excellent receptions kontra Crossovers.