Hindi nakaabot sa finals si Yulo sa vault ng FIG

ni VA @Sports | March 10, 2024

Bigo ring umulit bilang vault champion ang Filipino gymnast na si Carlos Yulo sa ginaganap na Baku, Azerbaijan leg ng FIG Artistic Gymnastics World Cup Series.

Kasunod ng kabiguang umabot sa finals ng parallel bars, hindi rin nakaabot ng vault finals si Yulo makaraang tumapos lamang na pang-21 sa qualification noong Biyernes - Marso 8.

Nagtala lamang ang 2021 world champion sa vault at 2-time Asian titlist ng nasabing apparatus ng 13.933 points upang magtapos kasama ng bottom half ng kabuuang 36 na kalahok sa naturang event.

Bigo rin siyang makausad sa finals ng dalawa pang events na horizontal bar at pommel horse noong Biyernes pagkaraang pumuwesto lamang na pang-16 at pang-41 sa naitalang13.566 points at 11.566 points ayon sa pagkakasunod.

Tanging top 8 gymnasts lamang sa bawat apparatus ang qualified sa finals.

Gayunman, may pag-asa pang magwagi ng medalya ang 24-anyos na Olympian sa pagsabak niya sa finals ng floor exercise kung saan una siyang naging world champion noong 2019.

Samantala, makapasok naman sa women's floor exercise final ang Pinay gymnast na si Emma Malabuyo makaraang tumapos na pang-anim sa qualification sa naitala nitong 13 points.

Silver medalist sa  floor exercise sa nakalipas na Cairo, Egypt leg noong Pebrero, target ni Malabuyo na palakasin ang kanyang tsansang magkamit ng Paris Olympics berth sa pamamagitan ng isa uling podium finish.

Yulo umusad sa finals ng FIG Artistic GWCS

ni VA @Sports | March 9, 2024

Pinaghalong maganda at masama ang naging resulta ng pagsisimula ng kampanya ng Filipino gymnast na si Carlos Yulo sa 2024 FIG Artistic Gymnastics World Cup Series kahapon sa Baku, Azerbaijan.

Ang magandang balita ay umusad si Yulo sa  finals ng kanyang  paboritong event na floor exercise habang ang 'di magandang balita ay nanganganib na mawala sa kanya ang titulo sa parallel bars.Nagbabalik sa aksiyon sa unang pagkakataon mula ng huli syang sumabak sa World Artistic Gymnastics Championships noong Oktubre, nagtala lamang si Yulo ng 14.5 points sa parallel bars qualification upang malagay sa ika-9 na puwesto.

Tumabla si Yulo kay Kazuki Matsumi, ngunit nakamit ng Hapon ang pangwalo at huling spot sa final round dahil sa mas mataas nitong execution score, 8.6-8.2.

Nanguna sa nasabing event ang Chinese na si Zou Jingyuan, ang reigning Olympic parallel bars titlist at 3-time world champion matapos magtala ng 15.766 points.

Buhat naman ang tsansa ni Yulo na magwagi ng medalya makaraang tumapos na pangatlo sa floor exercise qualification at humanay sa 8-man final.

Nagtala ang reigning two-time Asian champion sa floor exercise na si Yulo ng 14.333 points para pumuwesto kasunod nina Kazuki Minami  ng Japan (14.466) at Ryu Sung-hyun ng South Korea (14.366).

Gaganapin ang floor exercise finals sa Linggo-Marso 10, araw naman ng Sabado-Marso 9 sa Baku.

Mauuna rito, nakatakdang sumalang si Yulo na nagtapos na pang-18 sa still rings sa qualification round para vault, horizontal bar, at pommel horse ngayong araw na ito.Samantala sa kababaihan, nag-qualify ang Pinay na si Levi Jung-Ruivivar sa uneven bars final matapos na pumang-6 sa qualification sa naitala nitong 13.466 points.Sina Jung-Ruivivar at Emma Malabuyo ay kumakampanya rin sa Baku para sa tangkang makasama nina Yulo at Aleah Finnegan sa Paris Olympics.       

Santiago, kabi-kabila ang awards sa Japan

ni VA @Sports | March 7, 2024

Humakot ang Filipina middle blocker na si Alyja "Jaja" Santiago ng apat na awards bilang import ng Japanese team na JT Marvelous.Itinanghal si Santiago bilang Best Attacker at Best Blocker bukod pa sa natanggap niyang Fighting Spirit Award at miyembro ng Japanese V. League 1 Best Six Middle Blockers kung saan kasama rin ang mga kakampi niyang sina Kotona Hayashi at Annie Drews.Ngunit sa kabila ng mga nasabing karangalan, nabigo si Santiago at ang JT Marvelous sa loob ng straight sets sa kamay ng NEC Red Rockets 3-1 (27-25, 32-30, 16-25, 25-17),upang tumapos lamang na runner-up sa finals ng Japan V.League 1 noong nakaraang Linggo.

Sinuportahan si Santiago ng kanyang asawa na si Nxled Chameleons at Akari Chargers director of volleyball operations na si Taka Minowa na umuwi pa ng Japan para lamang manood ng nasabing championship game.

Nagpaabot naman ng kanilang pagbati ang koponan ni Santiago sa Premier Volleyball League (PVL) na Chery Tiggo Crossovers.

"Congratulations to our dear Jaja on yet another great season in Japan with JT Marvelous! The CHERY fam is always proud of you," mensahe ng Crossovers sa kanilang social media post noong Martes.

Samantala, bumalik din naman agad ng Pilipinas si Minowa para harapin ang kanyang tungkulin sa idinaraos na PVL 2024 All-Filipino Conference habang si Santiago naman ay inaasahang makakasama na ng Crossovers sa kanilang kampanya ngayong conference.