Women's Volley nasa Brazil na; Best Center, oks sa face-to-face

ni VA - @Sports | April 13, 2022

Umalis kahapon ang national women’s (indoor) volleyball team patungong Brazil para maghanda sa 31st SEAG na idaraos sa Mayo sa Hanoi kung saan target nila na makapag-podium finish.

Magsasanay sila sa bansang itinuturing na isa sa hotbed ng volleyball sa buong mundo sa ilalim ng paggabay ni Brazilian national player na isa na ngayong tanyag na coach na si Jorge Edson Souza de Brito. “We’re planning to play five or six tune-up games against top Brazilian clubs from SuperLiga A and under-21 teams,” pahayag ni de Brito sa ginanap na send off para sa team noong Lunes.

Umalis kagabi ang team patungong Sao Paulo at pagdating doon ay may kalahating oras pa silang land trip bago marating ang training camp sa Barueri kung saan magsasanay sila sa loob ng dalawang linggo.

Ang 14-member ng national team ay sina open spikers Alyssa Valdez, Jema Galanza at Ces Molina, opposite spikers Kat Tolentino at Mylene Paat; setters Kyle Negrito, Deanna Wong at Iris Tolenada; middle blockers Ria Meneses, Majoy Baron, Dell Palomata at Aby Maraño; at liberos Dawn Macandili at Kath Arado.

Susunod sa ķanila si middle blocker Jaja Santiago na manggagaling ng Japan. Kasama rin ng team na nagtungo ng Brazil sina head coach Odjie Mamon, Grace Antigua, trainers Raffy Mosuela at George Pascua at physical therapist Grace Gomez.

Samantala, handa na sa face-to-face clinics ang multi-awarded sports clinicians na Basketball Efficiency and Scientific Center (Best Center) makaraan ang mahaba-habang lockdowns dahil sa pandemic na nagsimula noong Marso 2021.

Magsisimula ang basketball at volleyball clinics sa Abril 18 sa Masambong basketball and Tennis Courts sa San Francisco Del Monte, Quezon City at sa Our Lady of Guadalupe Minor Seminary sa Guadalupe Viejo, Makati. Idaraos tuwing Lunes at Huwebes sa parehong venues ang sesyon ng Preparatory at Level 1 basketball at volleyball.

Simula sa Abril 20, Miyerkules at Sabado, ang sesyon ay para sa preparatory at level 1 basketball sa International Christian Academy SA Sucat, Paranaque City.

Biggest comeback ng CCS, "salamat sa fans" — Valdez

ni VA - @Sports | April 10, 2022

Hindi lamang ang koponan ng Creamline Cool Smashers ang nanalo sa pagtatapos ng 2022 PVL Open Conference kundi ang volleyball fans na 2 taon ding halos nanabik na matunghayan ng live ang aksiyon sa loob ng court sanhi ng global health crisis.

Naihatid ng liga ang mga de kalibreng mga laro tampok ang mga beterano gayundin ang mga papaangat na mga talento na magpapaningning pa sa pro league.

Naitalang mahigit16,000 ang nanood sa Creamline-Choco Mucho semifinals showdown maging sa Game 1 ng finals sa MOA Arena at ang mahigit 7,000 fans na nanood sa Ynares Center sa Antipolo City kung saan nakuha ng Cool Smashers ang korona sa 2nd c'ship sa professional ranks kasunod ng Chery Tiggo Crossovers na tumalo sa kanila sa inaugural sa isang bubble setup sa Ilocos Norte noong Agosto.

“I’m very happy for volleyball itself,” ani Alyssa Valdez na kinilala bilang mukha ng women's volleyball sa bansa. "It’s just so nice that this is probably the biggest comeback in sports.” “And we’re very thankful for the fans, they’re all here, cheering and supporting us,” aniya matapos pamunuan ang Creamline sa title-clinching 25-18, 15-25, 25-23, 25-16 kontra Petro Gazz Angels noong Biyernes ng gabi.

"After falling short of our bid last year, we really wanted to redeem ourselves. We all stayed focused on our training,” anaman ng conference MVP na si Tots Carlos. “We are one big family in this team. We are very open and we have one common goal – help each other. So, it’s really very fulfilling to bounce back (from that loss to Chery Tiggo). Talagang sobrang sarap, sobrang saya kasi marami rin kaming napapasayang tao.”

“This is just the beginning for Tots,” wika naman ng Finals MVP na si Valdez na binanggit din ang mga kakamping sina Jema Galanza, Cel Domingo, Jeanette Panaga, playmaker na si Jia Morado at iba pang naging bahagi ng tagumpay na title run.

May magkakampeon o may reresbak sa PVL Finals?

ni VA / Gerard Arce - @Sports | April 8, 2022

Lubhang delikado man ang sitwasyon ng Petro Gazz Angels sa Game 2 ng Premier Volleyball League Open Conference Finals dahil sa injury ng outside hitter na si Gretchel Soltones at Myla Pablo, kailangang mag-step up ang iba upang maitulak ang winner-take-all sa susunod na laro, habang hahangarin ng Creamline Cool Smashers na maibulsa na ang ika-apat na titulo at ikatlo sa Open Conference ngayong gabi sa Ynares Center sa Antipolo City.

Nanakit ang kanang tuhod ng 26-anyos na 3-time NCAA MVP sa 4th set ng Game 1 kung kaya yumuko ang Petro Gazz. Dumaan sa MRI ang tubong Cebu mula San Sebastian College-Recoletos kahapon ng umaga. Anuman ang resulta ay tiyak mahihirapan ang 2017 PVL Open Finals MVP.

Nakatakdang magsagupa ang Cool Smashers at Angels sa main game ng 6 p.m., ngunit bago rito ay magtatapat sa Game 2 ng Battle-for-third ang namumurong magwagi ng puwesto na Choco Mucho Flying Titans at Cignal HD Spikers ng 3 p.m.

Aminado si Angels coach Jerry Yee na mahihirapan silang puwersahin si Soltones na makalaro ngayong gabi dahil iniinda pa nito ang injury lalo pa’t kulang sa pahinga ang koponan na dumaan din sa do-or-die semis vs. HD Spikers noong Lunes. Bukod kay Soltones, may matinding pulikat si two-time PVL MVP Pablo at ang humaliling si Nicole Tiamzon na natapilok.

Inaasahan ng Angels na papalo ng husto ang beteranong si Jonah Sabete, Aiza Pontillas, Remy Joy Palma, Mar-jana Phillips at Seth Rodriguez at magandang laro ni Chie Saet at depensa ni Bangs Pineda.

Para sa Cool Smashers, ito na ang pagkakataon na kunin ang 2-1 lead sa ikatlong paghaharap sa finals matapos gulpihin ang Angels noong 2019 Open Conference para sa titulo at maipaghiganti ang 2019 Reinforced Conference na pagkatalo sa parehong koponan. Lumapit na sa panibagong kampeonato ang Cool Smashers sa pangunguna ni Volleyball queen at ‘phenom’ na si Alyssa Valdez at dalawa pang power hitters na sina Tots Carlos at Jema Galanza.