Brownlee, sasalang muna sa Indonesia bago lalaro sa PBA

ni VA @Sports | March 22, 2024

Habang naghihintay ng kanyang muling paglalaro sa PBA at sa kanyang susunod na Gilas Pilipinas stint, maglalaro bilang reinforcement  ng Pelita Jaya Basketball Club sa Indonesian Basketball League si GIlas naturalized player Justin Brownlee.

Inanunsiyo ng Pelita Jaya noong Miyerkules ang paglagda sa kanila ng 3-time PBA Best Import na si Brownlee.

Nauna nang humingi ng permiso si Brownlee mula sa Samahang Basketbol ng Pilipinas at sa kanyang PBA team na Barangay Ginebra na makalaro upang manatiling nasa kondisyon.

Bibilang pa ng ilang buwn bago siya muling makalaro sa PBA para sa Kings dahil halos nangangalahati pa lamang ang PBA Philippine Cup habang sa Hulyo pa ulit magsisimula ang preparasyon ng national team para naman sa pagsabak nito sa FIBA Olympic Qualifying Tournament.Inaasahang makakatulong kay Brownlee ang paglalaro sa Indonesia para makabalik sa dati niyang porma pagkaraang mabakante ng halos apat na buwan dahil sa nangyaring pagpopositibo niya sa doping test sa nakaraang Asian Games sa China noong Oktubre.

Sa kabila ng mahabang  layoff, nakapagtala pa ito ng averages  na 21 points, 10 rebounds, 6 assists, 2 steals at 1 block kontra Hong Kong at Chinese Taipei sa unang window ng FIBA Asia Cup Qualifiers.

Makakasama ni Brownlee sa koponan ng Pelita Jaya ang mga NBA players at dating PBA imports na sina Thomas Robinson, KJ McDaniels gayundin sina Malachi Richardson at JaQuori McLaughlin at mga Indonesian national team standouts Brandon Jawato, Anthony Beane at Andakara Prastawa .

Ang kanyang unang pagsalang para sa Pelita Jaya na may kasalukuyang rekord na 7-1, panalo-talo ay bukas-Sabado, Marso 23 kontra sa  RANS Simba Bogor.

Taekwondo jin Ganapin Swak sa Paris Paralympics

ni VA / Clyde Mariano @Sports | March 19, 2024

Isinalba sa lubos na pagkabigo ng para taekwondo jin na si Allain Ganapin ang kampanya ng Pilipinas sa katatapos na Asian Qualification Tournament para sa 2024 Paris Olympics at Paralympics noong nakaraang Linggo sa Yaishan International Convention and Exhibition Center sa Tai’an City, China.

Tinalo ni Ganapin si Sandeep Singh Maan ng India sa finals ng men’s K44 -80 kilogram upang makopo ang minimithing spot para sa Paralympic Games na magsisimula sa Agosto 28.Ito ang ikalawang sunod na pagkakataon na nag-qualify si Ganapin sa Paralympics matapos makapasok sa nakaraang Tokyo Games noong 2021.

Gayunman, hindi naging maganda ang kinahinatnan ng kanyang unang Olympic stint makaraan niyang madiskuwalipika pagkatapos magpositibo sa Covid-19.

Humanay si Ganapin sa mga para swimmers na sina Angel Otom at Ernie Gawilan na nauna nang nag-qualify sa Paris Paralympics.

Tanging si Ganapin lamang mula sa mga Filipino jins na sumabak sa nasabing qualifying meet ang nagkamit ng slot para sa Paris.

Bigo sa hangad na ikalawang sunod na Olympics stint si Tokyo Games veteran Kurt Barbosa matapos matalo kay Samirkhon Ababakirov ng Kazakhstan sa semifinals ng men’s -58-kilogram division gayundin si Baby Jessica Canabal na sumadsad sa women’s -57-kg semifinal kay Laetitia Aoun ng Lebanon.

Nabigo ring magkamit ng Olympic berths si Arven Alcantara pagkaraang yumukod kay Ali Reza Abbasi ng Afghanistan sa quarterfinal ng men’s -68-kilogram maging si Tachiana Keizha Mangin na natalo rin sa women’s -57 kg semifinal round laban kay Saudi Arabian Dunia Abutaleb.    

“Masaya dahil makakalaro ako sa Paris Olympics. Hindi ako nakalaro sa Tokyo. Sa wakas natupad ko ang pangarap na makalaro sa Paris,” sabi ni Ganapin member ng national team mula 2015.

Naging amputated kanang kamay ni Ganapin subalit ang kanyang kapansanan ay hindi naging hadlang at sagabal sa kanyang pangarap na marating ang tagumpay.

Etheridge, team captain ng men's booters vs. Iraq

ni Anthony Servinio / VA @Sports | March 17, 2024

Itinalagang team captain ng binuong Philippine men’s football team ng bagong coach na si Tom Saintfiet ang beteranong goalkeeper na si Neil Etheridge para sa nakatakda nilang pagsabak sa FIFA World Cup 2026 qualifier kontra Iraq sa Marso 21 at 26.

Kasama ni Etheridge sa 28-man roster ang pitong players na sasalang sa unang pagkakataon bilang mga seniors na sina Theo Libarnes ng Far Eastern University ang magkapatid na Matthew Baldisimo ng York United at Michael Baldisimo ng San Jose Earthquakes, Jeremiah Borlongan, at Chima Uzoka ng Dynamic Herb Cebu FC, Mark Swainston ng Kaya FC-Iloilo at Andres Aldeguer ng  Central Connecticut University.

“We have a well-balanced group,” ani Saintfiet. “We have a good team to face Iraq, but we need to play professionally and try to steal some points.”

Kakalabanin ng PMNT ang Iraq team na galing sa panalo sa unang dalawa nilang laro kontra Indonesia, 5-1, at Iran, 1-0, noong nakaraang November window.

“We have a balanced team to face a strong opponent. We are both experienced and young in the mix. It’s important we look at players who can do the job and who we think could be ready for this task in every position,” dagdag pa ni Saintfiet.

Ang iba pang miyembro ng team ay sina goalkeepers Patrick Deyto at Kevin Ray Hansen; defenders Amani Aguinaldo, Pocholo Bugas, Marco Casambre, Jesse Curren, Simen Lyngbo, Jesper Nyholm, Christian Rontini, Daisuke Sato, Jefferson Tabinas at Paul Tabinas; midfielders Justin Baas, Kevin Ingreso, Oskari Kekkonen, Mike Ott, OJ Porteria, at Santiago Rublico at forwards Jarvey Gayoso at Patrick Reichelt.