UAAP Cheerdance sa Disyembre, Sotto, babalik sa Gilas Pilipinas

ni Gerard Arce / VA - @Sports | October 28, 2022

Sa Disyembre 10, magbabalik at idaraos ang UAAP Season 85 Cheerdance Competition sa Mall of Asia Arena sa Pasay City. Unang magtatanghal ang season host Adamson Pep Squad na tumapos na runner-up noong Season 83. Susundan sila ng University of the East Pep Squad, ikatlo ang University of Santo Tomas Salinggawi Dance Troupe, pang-apat ang De La Salle Animo Squad habang panglima ang Ateneo Blue Babble Battalion.

Ika- 6 na sasalang ang reigning champion Far Eastern University Cheering Squad kasunod ang National University Pep Squad na nagtatangkang muling mangibabaw makaraang magkampeong sa anim ng nakakalipas na walong edisyon ng kompetisyon.

Pinakahuling sasabak ang University of the Philippines Pep Squad, na kasalo ng UST na may pinakamaraming Cheerdance titles sa bilang na walo.

Samantala, nakatakda umanong magbalik sa Gilas Pilipinas line-up si 7-foot-2 center Kai Zachary Sotto para maglaro sa fifth window ng FIBA basketball World Cup Asian Qualifiers sa Nobyembre upang punuan ang kakulangan ng manlalaro dulot ng injuries.

Lumabas sa isang report na mabibigyan ng pagkakataon ang 20-anyos na stalwart na muling ibandera ang Pilipinas sa pagdayo ng koponan kontra sa Jordan sa Nob. 11 at Saudi Arabia sa Nobyembre 14.

Sadyang delikado ang posisyon ng mga manlalaro ng Gilas squad dahil sa pagkakaroon ng mga injuries at pagkakasabay ng mga laro ng PBA Commissioner’s Cup at 2nd round ng 85th UAAP.

Hinihintay pa ang kabuuang sagot ng Samahang Basketbol ng Pilipinas (SBP) sa magiging lagay ng paglalaro ni Sotto na kasalukuyang sumasabak sa kanyang koponan sa Adelaide 36ers sa NBL Australia, subalit magkakaroon ng bahagyang oras upang makasingit ito ng laro.

Stalzer, ipinanalo ang Cargo Movers; Army iniwan sa giyera

ni VA / MC - @Sports | October 19, 2022

Sa wakas, matapos ang dalawang diretsong pagkatalo, buong lakas na pumalo ang F2 Logistics sa win column at ginisa ang wala pa ring panalo na United Auctioneers Inc-Army, 25-17, 25-21, 25-16, sa pagpapatuloy ng 2022 Premier Volleyball League Reinforced Conference kahapon sa Philsports Arena sa Pasig.

Ibinuhos ni Lindsay Stalzer ang unang ngitngit mula sa pagkadismaya sa Lady Troopers sa bisa ng itinarak na 24 puntos, 23 attacks at 10 excellent receptions.

Hindi na nakapaglaro si Kalei Mau na nagtarak lamang ng 8 puntos sa kalagitnaan ng laban dahil sa nanakit ang mga paa nito at hindi na nakabalik sa court. Walong puntos naman ang nagawa ni Kianna Dy habang si Ivy Lacsina ay may 3 blocks at kabuuang 7 puntos.

Mula sa kalamangan na 2 puntos, hinila pa ng Cargo Movers sa 10-4 ang iskor, mula sa atake ni Kianna Dy para kunin ang panalo sa first set, 25-17.

Nakaligtas ang Lady Troopers sa dalawang set points sa second, 21-24, pero hindi pumayag si Lindsay Stalzer sa block ni Jovelyn Gonzaga sa net at binura nang tuluyan ang tangka ng huli para sa F2 Logistics na bingwitin ang lahat ng set, 25-21.

Pero muling pumalaot ang Cargo Movers pagpasok ng third frame sa 17-7 advantage at hindi na lumingon pa. Umangat na ang F2 Logistics sao 1-2 para sa eighth standing at iwan ang UAI-Army na nag-iisang team na wala pang panalo, 0-3.

Petecio at Paalam, leader sa 12 Nat'l team sa ASBC

ni VA - @Sports | October 19, 2022

Nakatakdang pamunuan nina Tokyo Olympics silver medalists Carlo Paalam at Nesthy Petecio ang 12-member national team na sasabak sa darating na Asian Boxing Confederation (ASBC) Asian Elite Men and Women’s Competition sa Oktubre 30 hanggang Nobyembre 13 sa Amman, Jordan.

Ayon kay Association of Boxing Alliances in the Philippines (ABAP) national training director Don Abnett, siyam na kalalakihan at limang kababaihan ang isasabak ng bansa sa naturang kompetisyon.

Ito ang unang pagkakataon na muling sasabak sa ibabaw ng ring si Paalam mula noong nakaraang Tokyo Olympics matapos nyang maka-recover sa kanyang natalong injury sa balikat.

“It’s no longer a problem,” ani Abnett patungkol sa injury ni Paalam’. “He also continuously trained in Cagayan de Oro City and he’s in good form and I don’t think that there’s going to be a problem when it comes to his conditioning.”

Inaasahan namang babawi si Petecio sa kanyang kabiguan na maipagtanggol ang kanyang featherweight title noong nakaraang 31st Vietnam Southeast Asian Games noong Mayo kung saan nag-uwi lamang siya ng bronze.

Ang Amman competition ay hindi qualifier para sa Paris 2024 Olympics ayon kay Abnett. Gayunman, bahagi ito ng preparasyon ng ABAP para sa 19th Asian Games sa Hangzhou, China.

Kasama ni Petecio sa women's team sina women’s light flyweight Althea Pores, bantamweight Aira Villegas, Tokyo Olympian flyweight Irish Magno at middleweight Hergie Bacyadan.

Kabilang naman sa men’s team kasama ni Paalam sina light flyweight Mark Lester Durens, flyweight Rogen Ladon, bantamweight Ian Clark Bautista at Mario Fernandez, featherweight Paul Bascon, light welterweight James Palicte at Samuel Dela Cruz at welterweight Marjon Piañar.