Kampanya ni Harris, nakalikom na ng $200M

ni Ali San Miguel @Overseas News | July 29, 2024

Photo: U.S. Vice President Kamala Harris / USA Today

Inihayag ng kampanya ni U.S. Vice President Kamala Harris nitong Linggo na nakalikom sila ng $200 milyon at nakapagtala ng 170,000 bagong boluntaryo sa loob ng isang linggo mula nang siya’y naging kandidato ng Partido Demokratiko para sa pagkapangulo.

Umatras sa kanyang reelection bid si President Joe Biden noong nakaraang Linggo at sinuportahan si Harris para sa halalan sa Nobyembre 5 laban kay Republican ex-President Donald Trump.

"In the week since we got started, @KamalaHarris has raised $200 million dollars. 66% of that is from new donors. We've signed up 170,000 new volunteers," saad sa X (dating Twitter) ng deputy campaign manager ni Harris, na si Rob Flaherty, sa X.

Nagpapakita ang mga poll noong nakaraang linggo, kabilang ang isang isinagawa ng Reuters/Ipsos, na magkalapit ang mga numero nina Harris at Trump, na naglalagay sa kanila sa isang mahigpit na laban sa nalalabing 100 araw bago ang eleksyon.

US FDA sumuporta sa vape bilang alternatibo sa sigarilyo

ni Chit Luna @News | May 1, 2024

Sinuportahan ng mga grupo ng konsyumer sa Pilipinas ang komentaryo ng U.S. Food and Drug Administration Center for Tobacco Products (FDA-CTP) na nagsabing ang mga produktong Smoke-free ay may mas mababang panganib sa kalusugan kaysa sa sigarilyo.

Ang komentaryo ng FDA-CTP, na may pamagat na "Nicotine e-cigarettes: Considerations for healthcare providers," ay nagsabi na ang mga smoke-free alternatives tulad ng e-cigarettes, ay karaniwang may mas mababang panganib sa kalusugan.

Binanggit nito ang datos ng U.S. National Academies of Sciences, Engineering and Medicine (NASEM) na naghayag ng katibayan na ang paglipat mula sa sigarilyo sa e-cigarette ay makakabawas sa pagkakalantad ng isang tao sa nakakalasong carcinogens na matatagpuan sa usok ng tabako.

Si FDA-CTP Director Brian King, ang isa sa may akda ng komentaryo, ay inilathala ng Nature Medicine, isang peer-reviewed medical journal.

Ikinumpara nito ang mga panganib ng iba't ibang produktong tabako.

Ang iba pang may-akda ay sina Dr. Benjamin A. Toll ng Medical University of South Carolina Department of Public Health Sciences at Dr. Tracy T. Smith ng Department of Psychiatry and Behavioral Sciences.

Nabanggit ng komentaryo ang mga maling pananaw ng mga manggagamot at iba pang mga propesyonal sa kalusugan ay maaaring humantong sa pagpapayo ng mali sa mga pasyente.

Sinabi nito na ang maling pang-unawa ng mga doctor ay maaaring makapigil sa mga naninigarilyo na ganap na lumipat sa e-cigarette.

Ayon sa komentaryo, dapat isaalang-alang ng mga medikal na propesyonal ang pagtuturo sa mga pasyente tungkol sa panganib ng mga produkto ng tabako at ang potensyal na benepisyo sa kalusugan ng ganap na paglipat sa may mababang panganib na produkto.

Ayon kay Anton Israel, presidente ng Nicotine Consumers Union of the Philippines (NCUP), ang komentaryo na isinulat mismo ng FDA-CTP chief ay nagpapatunay na ang mga smoke-free products tulad ng vape, heated tobacco at nicotine pouch ay nagdadala ng mas mababang panganib kaysa sa tradisyonal na mga sigarilyo.

Sinabi ni Israel na ang mga smoke-free alternatives na ito ay hindi nagdudulot ng usok na naglalaman ng libu-libong nakakapinsala at potensyal na nakakapinsalang kemikal.

Sinabi naman ni Joey Dulay, presidente ng Philippine E-Cigarette Industry Association (PECIA), na ang mga tobacco harm reduction (THR) products ay maaaring makatulong sa milyun-milyong Pilipinong naninigarilyo na nasa hustong gulang na talikuran na ang sigarilyo.

Halos isang milyong dating naninigarilyo sa Pilipinas ang huminto na sa paninigarilyo, ani Dulay.

Sinabi pa niya na ang Kongreso ng Pilipinas mismo ang kumikilala sa papel ng mga smoke0free products sa pagbibigay ng mga alternatibo sa mga Pilipinong naninigarilyo sa ilalim ng Vape Law na ipinasa noong 2022.

Si Dr. Lorenzo Mata Jr., isang doktor, ay nanawagan din sa mga kapwa medikal na propesyonal na isaalang-alang ang bigat ng pinakabagong komentaryo ng FDA-CTC.

Aniya, dapat tingnan ang mga siyentipikong katotohanan tungkol sa THR at pag-aralan kung paano ito makatutulong sa milyun-milyong Pilipino na huminto sa paninigarilyo.

Binigyang-diin ng komentaryo na hindi dapat gumamit ng anumang uri ng produktong tabako ang kabataan.

Sa mga nasa hustong gulang na naninigarilyo, binanggit nito ang kahalagahan ng paggamit ng mga pamamaraan ng pagtigil na nakabatay sa ebidensya.

US at Japan, ikakasa ang malalim na kooperasyon sa AI

ni Angela Fernando - Trainee @News | March 31, 2024

Ikakasa ng Japan at United States (US) ang mas malalim na kooperasyon sa mga high-tech na teknolohiya tulad ng artificial intelligence (AI) ayon sa pahayagang Asahi Shimbun.

Ito ay magaganap sa pagkikita ng Punong Ministro na si Fumio Kishida at Pres. Joe Biden sa susunod na buwan.

Nakatakda ang pagkikita ng dalawa sa Abril 10 kung saan si Biden ang magiging host sa pagbisita ni Kishida sa U.S.

Tinawag na "global partnership" ang magiging ugnayan sa pagitan ng dalawang bansa patungkol sa itinataguyod na mas malakas na kooperasyon sa AI at semiconductors ngunit walang binanggit na sources ang nasabing pahayagan.

Bilang bahagi ng kasunduan, magtatatag ang Japan at U.S. ng isang framework para sa pananaliksik at pagpapaunlad ng AI, kasama ang Nvidia, Arm, at Amazon.