3 binaril sa labas ng baseball stadium, mga tao nagtakbuhan

ni Lolet Abania | July 18, 2021

Tatlong indibidwal ang binaril sa labas ng isang baseball stadium na puno ng libu-libong manonood sa US capital nitong Sabado, kung saan bigla ring inihinto ang laro habang maraming mga fans ang agad nagsilabasan.

Unang nai-tweet ng pulisya na 4 katao ang nabaril, subalit sa report ni Washington police second in command Ashan Benedict, tatlo ang sugatan sa insidente.

Ayon kay Benedict, dalawa sa nabaril ay nasa isa sa dalawang sasakyan na sangkot sa shootout, habang ang ikatlong biktima ay isang babae na nasa sidewalk sa labas ng stadium na mag-a-attend sa game.

“At no time during this incident were individuals inside the stadium attending the game in any type of danger. This was not an active shooter incident. Everything took place outside the stadium,” ani Benedict sa mga reporters.

“The woman was expected to be OK,” sabi pa ni Benedict. Ayon naman sa Agence France-Presse (AFP) journalists na nagko-cover ng game, ilan sa mga manonood ang nagsitakbuhan sa mga exits matapos silang makarinig ng marami at sunud-sunod na putok ng baril mula sa labas ng stadium habang ang iba ay nanatili sa kanilang upuan makaraang sabihan ng announcer.

Lumabas din sa social media mula sa footage ang mga pagputok ng baril sa stadium habang isa pang video na makikita na maraming tao ang nagtakbuhan palayo sa lugar.

Matagal nang problema ng United States ang nagaganap na gun violence sa kanilang lugar, kung saan madalas na naitatalang may mga namatay dahil sa shootings kabilang din dito ang high-profile mass killings na ang tinatarget ay mga eskuwelahan, pinagtatrabahuhan at shopping centers.

1 patay, 12 sugatan sa biglaang pamamaril ng lalaking gumagala

ni Ronalyn Seminiano Reonico | June 18, 2021

Isa ang patay at 12 katao ang sugatan sa naganap na drive-by shooting spree sa Arizona, US noong Huwebes, ayon sa awtoridad.

Tumagal umano nang isa at kalahating oras ang pamamaril ng gunman sa walong komunidad bago siya nahuli ng mga pulis sa traffic stop.

Bukod sa nasawi, tatlong indibidwal din ang nabaril ng gunman at ang 9 na iba pa ay nagtamo ng minor injuries.

Saad ni Peoria Police Spokesman Brandon Sheffert, "We don't know what the motive was, we don't have an idea of what this person was thinking when he went out and did this.

"Obviously, we want to figure that out, because there's a lot of scared people.”

Hindi naman umano nanlaban ang suspek nang arestuhin ng awtoridad at kasalukuyan pa ring inaalam ang motibo nito sa pamamaril.

Experimental shots ng Moderna, pasok sa 200 M doses pang bibilhin ng US

ni Ronalyn Seminiano Reonico | June 17, 2021

Bibili ang United States ng karagdagang 200 million doses ng Moderna COVID-19 vaccine.

Ayon sa Moderna, kabilang sa 200 million doses ang option sa pagbili ng mga experimental shots na kasalukuyan pang ginagawa.

Sa kabuuang bilang ay umabot na sa mahigit 500 million doses ng Moderna ang in-order ng US.

Ayon sa Moderna, maaaring iturok sa mga bata o maging booster shots ang kanilang bakuna laban sa COVID-19.

Kasalukuyang nagsasagawa ang Moderna ng clinical trials para sa third booster shot ng awtorisadong bakuna kabilang na ang experimental shots.

Una nang nakatanggap ng emergency use authorization (EUA) ang Moderna para sa mga edad 18 pataas at nagsumite na rin ang naturang drug firm ng aplikasyon sa US para sa EUA ng kanilang COVID-19 vaccine para sa mga edad 12 hanggang 17.

Samantala, noong Agosto, nilagdaan ng pamahalaan ng US ang $1.53 billion deal sa Moderna para sa 100 million vaccine doses.