U.S. at ‘Pinas, joint forces uli sa pagbabantay sa WPS

ni BRT | February 5, 2023

Napagkasunduan ng Estados Unidos at Pilipinas na muling ipagpatuloy ang pagsasagawa ng joint maritime patrols sa West Philippine Sea (WPS).

Ito ay matapos na una nang suspendihin ni dating Pangulong Rodrigo Duterte ang pagsasagawa ng anumang maritime patrol sa nasabing pinag-aagawang isla.

Kasunod ng naging pagbisita ni United States Defense Secretary Lloyd Austin III sa Pilipinas ay inihayag nito na kanilang napagkasunduan ni National Defense Secretary Carlito Galvez, Jr. na muling simulan ang pagsasagawa ng joint maritime patrols sa WPS bilang bahagi ng pagtugon sa mga nararanasang regional security challenges sa lugar tulad na lamang ng mga namamataang ilegal na presensya ng mga barko ng China doon.

Ito ay alinsunod pa rin sa naging kasunduan ng dalawang bansa na mas paigtingin ang Mutual Defense sa pagitan ng Pilipinas at Amerika.

Samantala, nilinaw naman ng mga kinauukulan na patuloy pang pinaplantsa ang mga guidelines kung paano nila isasagawa ang naturang joint maritime patrol sa WPS.

US Defense Secretary Austin, bibisita sa ‘Pinas

ni Lolet Abania | January 20, 2023

Bibisita si US Secretary of Defense Lloyd Austin sa Pilipinas gayundin sa South Korea sa loob ng ilang linggo para mapaigting ang kooperasyon sa dalawang mga bansa, ayon sa isang Pentagon spokesman nitong Martes.

Sa pahayag ni Pat Ryder, press secretary ng Defense Department, makikipagkita si Austin sa mga senior government at military officials sa gagawing trip, kung saan magiging aniya, “reaffirmation of our deep commitment to working in concert with allies and partners to chart our shared vision to preserve a free and open Indo-Pacific.”

Ginawa ang naturang anunsiyo sa ginanap na press briefing, matapos ang mga top foreign at defense officials ng United States at Japan ay mag-meeting noong nakaraang linggo sa Washington.

Sa itinuring na two-plus-two meeting, sina Austin at Secretary of State Antony Blinken kasama ang kanilang Japanese counterparts na sina Yasukazu Hamada at Yoshimasa Hayashi ay kapwa sumang-ayon para sa tinatawag na bolster deterrence laban sa China, North Korea at Russia.

Ang ganitong pagsisikap ng US na pag-reinforce ng deterrence kasama ang kanilang key allies sa Indo-Pacific region ay malamang na pag-usapan din sa meeting sa Pilipinas at South Korea.

Tuloy ang alyansa ng ‘Pinas-US… P-BBM at President Biden, nagkausap na

ni Lolet Abania | September 23, 2022

Sa unang pagkakataon, nagkausap na sina Pangulong Ferdinand “Bongbong” Marcos at US President Joe Biden sa bilateral meeting sa New York City ng Huwebes (Biyernes sa Pilipinas).

Kasalukuyang nasa US si Pangulong Marcos para sa pagdalo nito sa United Nations General Assembly kasabay na rin ng kanyang working visit.

Kabilang sa mga napag-usapan ng dalawang lider ay ang pagpapalakas pa sa relasyon ng Pilipinas at Amerika, mga isyu sa ASEAN at ang freedom of navigation and overflight sa South China Sea sa harap ng kagustuhan ng China na kontrolin ang nasabing bahagi ng karagatan.

“The leaders discussed the situation in the South China Sea and underscored their support for freedom of navigation and overflight and the peaceful resolution of disputes,” pahayag ng White House makaraan ang pulong nina Pangulong Marcos at President Biden.

Pinasalamatan naman ni Biden si P-BBM sa pagtutol umano nito sa isinasagawa ng Russia sa Ukraine. Gayundin, ang pagdepensa sa inaangking teritoryo sa South China Sea.

“The role of the United States in maintaining the peace in our region is something that is much appreciated by all the countries in the region and the Philippines especially,” saad ni P-BBM.

Batid nang magkaalyado ang Pilipinas at Amerika nang napakatagal na panahon at kinikilala rin ang daang taon na relasyon ng dalawang bansa.

“We feel that we are especially fortunate because we have very strong foundation of a very long relationship and the strong relationships on various facets not only political, not only diplomatic, but also economic,” pahayag ni Pangulong Marcos.

“We continue to look to the United States for that continuing partnership and the maintenance of peace in our region,” ani pa ni P-BBM. Binanggit naman ng White House ang importansya ng alyansa ng US at Pilipinas.

“The leaders reflected on the importance of the US-Philippines alliance. President Biden reaffirmed the United States’ ironclad commitment to the defense of the Philippines,” giit ng White House.

Labis naman ang pasasalamat ni P-BBM kay Biden sa malaking tulong ng Amerika sa Pilipinas sa paglaban sa COVID-19, lalo na sa pagbibigay nito ng mga bakuna sa kasagsagan ng pandemya.

“We had the provision of up to 35 -- almost 36 million doses of vaccines very early on, ahead of some of the other countries,” sabi ni Pangulong Marcos. “And for that we are very, very grateful.”