Ilang lugar sa US, taggutom dahil balot ng yelo

ni Lolet Abania | February 19, 2021

Bukod sa COVID-19 virus, mas mahirap ang nararanasan ng maraming mamamayan ngayon sa United States dahil sa epektong dulot ng snowstorm.

Ayon sa ulat, nabatid na sa Chicago, Illinois, karamihan sa mga residente roon ang dumaranas ng kakulangan sa pagkain.

Hindi sila makalabas ng bahay dahil sa sobrang lamig habang puno ng mga yelo ang paligid.

Naglabas din ng pahayag si Texas Agriculture Commissioner Sid Miller para sa lahat ng residente sa matinding epekto ng winter storm sa agrikultura ng estado at maging sa suplay ng pagkain sa lugar.

“I’m issuing a red alert regarding agriculture and our food supply chain here in the state of Texas,” ani Miller sa isang statement.

“I’m getting calls from farmers and ranchers across the state reporting that the interruptions in electricity and natural gas are having a devastating effect on their operations,” sabi ni Miller.

Gayundin, maraming lugar sa Texas ang walang kuryente, nagkukulang na ang suplay ng produktong petrolyo at nauubusan na rin ng pagkukunan ng malinis na tubig, kung saan isinailalim na ang lugar sa emergency crisis.

“Grocery stores are already unable to get shipments of dairy products. Store shelves are already empty. We’re looking at a food supply chain problem like we’ve never seen before, even with COVID-19,” saad ni Miller.

Samantala, itinigil pansamantala ang COVID-19 vaccine rollout sa ilang bahagi ng Amerika dahil sa kalamidad. Ilang residente rin ang pinili na magtungo na muna sa mga estado na hindi gaanong apektado ng snowstorm.

20K sundalo, bantay sa inagurasyon ni President-elect Biden

ni Lolet Abania | January 14, 2021

Tinatayang 20,000 tropa ang itatalaga ng National Guard sa Enero 20 sa Washington para sa nakatakdang panunumpa ni President-elect Joe Biden ng United States.

Ito ang inanunsiyo ni acting Police Chief Robert Contee isang linggo matapos ang libong supporters ni dating Presidente Donald Trump ay magsagawa ng marahas na kilos-protesta sa Congress sa pagnanais nilang mapigilan ang election victory ni Democrat Biden kung saan isang police officer at apat na protesters ang namatay.

Matatandaang 8,000 National Guard troops ang itinalaga para sa 2016 inauguration ni Trump, ayon sa report noon ng Reuters.

Habang ang House of Representatives ay nagdedebate sa pormal na pagsasampa ng kaso ng "incitement of insurrection," nanawagan si Trump at ang Republican National Committee sa publiko at sa lahat na dapat nang tapusin ang karahasan bago ang inagurasyon ni Biden.

Sa isang White House statement, sinabi ni Trump, "In light of reports of more demonstrations, I urge that there must be NO violence, NO lawbreaking and NO vandalism of any kind. That is not what I stand for, and it is not what America stands for. I call on ALL Americans to help ease tensions and calm tempers."

Kinansela na ng Airbnb at ang subsidiary nitong HotelTonight ang lahat ng reservations ng kanilang hotel at house-sharing sa Greater Washington para sa darating na inauguration week.

Ang mga kalsada malapit sa Capitol na pinasok ng mga violent protesters noong January 6 ay isinara na. Ipinasara rin ng National Park Service ang Washington Monument para sa mga nagtu-tour habang si Mayor Muriel Bowser ay nakiusap sa mga visitors na huwag munang pumunta sa lugar.

Ang mga darating na tropa ng militar ang inatasang mag-secure sa lugar bago ang inagurasyon ni Biden, kung saan naglagay din ng mga barikada sa paligid ng Capitol.

Ayon pa sa dalawang opisyal, magkatuwang ang National Guard at Capitol Police officers sa pagpapatupad ng batas sakaling may magtatangkang lumabag dito.

P-Du30: Trump vs Biden, oks kahit sino!

ni Lolet Abania | November 5, 2020

Tiwala ang Malacañang na walang magiging malaking pagbabago sa relasyon ng Pilipinas sa United States sinuman ang manalo sa nagaganap na American presidential election.

Patuloy ang bilangan ng boto sa ihahalal na pangulo sa pagitan nina incumbent President Donald Trump at dating Vice President Joe Biden na mamumuno sa tinaguriang world’s superpower sa susunod na apat na taon.

Ayon kay Palace Spokesperson Harry Roque tungkol sa makatatanggap ng mandato bilang presidente ng US, patatatagin at pagtitibayin ni Pangulong Rodrigo Duterte ang "mainit at personal na ugnayan" ng bansa sa Amerika.

“All the President needed really was a year or two and he was able to foster personal friendship with President Trump," sabi ni Roque sa isang interview ng CNN-Philippines.

“And even if there is a new President, I am not saying that there will be, but in case there is a new President of the United States in the person of [former] Senator Biden, I am confident that the President can also develop close personal friendship with Mr. Biden.

May the best man win as of now,” dagdag ni Roque. Gayundin, sa pahayag ni US Embassy Chargè d'Affaires John Law, inaasahan niya na ang alyansa ng bansa ay mananatiling "produktibo" kahit ano pa ang maging resulta ng presidential election sa pagitan nina Trump at Biden.

"Every US Embassy works very hard for the best possible relationship with the host government. We will continue to do that here in Manila regardless of the results of the US election," sabi ni Law sa election watch party na isinagawa ng US Embassy sa Manila.

Samantala, nakatakdang manumpa ang susunod na pangulo ng Amerika sa January 20, 2021.