Siargao, bubuksan na uli sa mga turista

ni Thea Janica Teh | November 21, 2020

Bubuksan na muli sa mga turista ang tinaguriang Surfing Capital ng Pilipinas na Siargao Island simula Nobyembre 23.

Sa inilabas na executive order ni General Luna Mayor Cecilia Ruson, papayagan nang makapasok ang mga turista sa isla at bubuksan na rin simula Disyembre 1 ang Siargao at Surigao Airport.

Nangako naman ang lokal na pamahalaan ng General Luna na patuloy pa rin na susundin ang travel guidelines at protocols pati na rin ang ilang precautionary measures tulad ng 5-day confirmed booking.

"We have to control the volume of tourists coming in and that we need to assess and adjust with the situation momentarily, rest assured, we will be reconsidering the same in due time," sabi ni Ruson.

Bukod pa rito, ipagbabawal pa rin sa Siargao ang non-essential gathering at patuloy pa rin ang pagsasagawa ng mga health protocols tulad ng pagsusuot ng face mask at face shield, physical distancing at hand sanitation.

Ayon naman kay Department of Tourism (DOT) Secretary Bernadette Romulo-Puyat, "As Siargao reopens to travelers, subject to minimum health and safety standards, the people of the island will regain their livelihood and share their paradise to our kababayans once more with the same level of hospitality they have always been known for."

6 miyembro ng BIFF, sumuko na sa Maguindanao

ni Thea Janica Teh | November 21, 2020

Anim na miyembro ng Bangsamoro Islamic Freedom Fighters (BIFF) ang sumuko sa mga awtoridad sa Maguindanao nitong Biyernes nang umaga.

Ayon kay Lt. Gen. Corleto Vinluan, Jr., commander ng Armed Forces of the Philippines Western Mindanao Command, kinilala ang mga ito na sina Badtogan Amino a.k.a Alas Amino/Boy Alas (sub-group lider ng Bungos Faction), Rasid Sangkali, Nasrudin Talib, Mohammad Abdul Samad, Khulo Amino at Aladin Gaapar na sumuko sa 1st Mechanized Infantry Battalion.

Isinuko rin ng mga ito ang isang 81mm mortar na may base plate, isang modified M14, isang .50-caliber Barret at dalawang 7.62mm sniper rifle.

Ibinahagi naman ni Maj. Gen. Juvymax Uy, Joint Task Force Commander na isa lamang ito sa matagumpay na resulta ng kampanya na maging mapayapa ang central Mindanao.

“Likewise, this is also attributable to the good governance of the local chief executives and to the collaborative efforts of the military, other security agencies, the different stakeholders, and the peace-loving people of Maguindanao,” dagdag ni Vinluan.

Sa ngayon, mayroon nang 191 opisyal at miyembro ng BIFF ang sumuko simula pa noong Enero.

Assistance package para sa mga nasalanta ng bagyo, handog ng SSS

ni Thea Janica Teh - @Bulgarific | November 21, 2020

Hello, Bulgarians! Mula Nobyembre 27, 2020, magbubukas ng assistance package ang Social Security System (SSS) para sa mga miyembro at pensiyunado nitong naninirahan sa mga idineklara ng National Disaster Risk Reduction and Management Council (NDRRMC) na ilalim ng State of Calamity dahil sa Bagyong Rolly, Quinta at Ulysses.

Binubuo ang package na ito ng Calamity Loan Assistance Program (CLAP), Three-month Advance Pension for SS and Employees’ Compensation pensioners at Direct House Repair and Improvement Loan.

Ang pagpapasa ng aplikasyon sa CLAP at Three-month Advance pension ay hanggang Pebrero 26, 2021, habang ang Direct House Repair and Improvement Loan naman ay bukas ng isang taon.

Maglalabas ng bago at kumpletong guidelines para sa programang ito ang SSS sa kanilang Facebook Page sa Philippine Social Security System.

Sa ngayon, ang mga lugar na idineklara ng NDRRMC ay ang probinsiya ng Cavite, Catanduanes, Camarines Sur, Batangas, Oriental Mindoro, Occidental Mindoro, Marinduque at Albay; munisipalidad ng Mulanay sa Quezon; Culion sa Palawan; Banton, Concepcion at Corcuera sa Romblon at Asipulo sa Ifugao.

Para sa iba pang karagdagang katanungan, bisitahin lamang ang kanilang Facebook sa “Philippine Social Security System,” Instagram sa “mysssph,” Twitter sa “PHLSSS,” o sumali sa Viber community sa “MYSSSPH Updates.”