Kulong sa gumagamit ng pekeng TESDA Certificate

ni BRT | June 29, 2023

Nagbabala ang Technical Education and Skills Development Authority (TESDA) laban sa mga gumagamit ng pekeng National Certificate.

Ayon kay TESDA Deputy Director General Aniceto John Bertiz III, bukod sa pagkakakulong, pwedeng ma-blacklist ang isang indibidwal na gumagamit ng pekeng National Certificate sa bansang nais pagtrabahuan nito.

Pagbibigay-diin pa ni Bertiz na bakit pa kailangang bumili ng pekeng certificate kung libre naman itong makukuha sa ahensiya.

Una nang binigyang-diin ng TESDA na isa sa mga prayoridad ni Secretary Suharto Mangudadatu ay ang pagtiyak ng integridad ng certification system at pagpigil ng paglaganap ng mga pekeng National Certificates.

Una nang naiulat na may mga nagbebenta umano ng pekeng certificate at driver's license.

Ito ay kasunod ng mga napaulat na may mga nagbebenta pa rin ng pekeng NC at driver’s license.

TESDA, may libreng online courses kaugnay sa COVID-19 management

ni Jasmin Joy Evangelista | January 16, 2022

Nag-aalok ng ilang libreng online course ang TESDA para sa dagdag na kaalaman sa COVID-19 prevention at management sa mga establisimyento.

Ayon kay TESDA Director Isidro Lapeña, maaaring i-access ang 10 libreng online course sa TESDA’s Online Program.

Kabilang sa mga kurso ang Contact-tracing Free Coursera Course; COVID-19 Awareness; COVID-19 General Duties; COVID-19: How to put on and remove personal protective equipment (PPE); Learning Online during COVID-19; Managing TVET during COVID-19; Standard precautions: Hand hygiene; Teaching Online During COVID-19; Health Effects of Climate Change; at Practicing COVID-19 Preventive Measures in the Workplace.

Ayon kay Lapeña, sa pamamagitan ng free online courses ay maiibsan ang pagkalat ng virus at magiging produktibo ang mamamayan sa gitna ng travel restrictions.

“As COVID-19 cases continue to rise, we are inviting everyone to enroll in our free online courses related to COVID-19 management not just to help prevent the spread of the virus but also to be productive amid travel restrictions,” aniya.

Para sa mga interesadong magrehistro, mag-enroll o tingnan ang listahan ng available courses, maaaring bisitahin ang website na www.e-tesda.gov.ph.

Wanted, Pinay caregivers sa Israel

ni Lolet Abania | January 31, 2021

Nanawagan muli ang Technical Education and Skills Development Authority (TESDA) sa mayroong Level II Caregiving National Certificates na ang Israel ay patuloy na tumatanggap ng mga aplikasyon para sa mga caregivers na nagnanais magtrabaho sa nasabing bansa.

Ayon sa ahensiya, tinatayang P75,000 buwanang suweldo ang ibibigay ng gobyerno ng Israel sa mga matatanggap na caregiver. Matatandaang noong Nobyembre, inanunsiyo ng Philippine Overseas Employment Administration (POEA) na ang Israel ay nangangailangan ng 500 Pinoy caregivers.

Ang employment ng mga caregivers ay magiging government-to-government transaction na walang kinakailangang placement fee. Ang mga aplikante ay dapat nasa edad 23 o pataas, na may taas na hindi bababa sa 4‘11”, at may timbang na tinatayang 45 kilos.

Gayundin, ang aplikante ay at least isang high school graduate na pumasa sa caregiving course ng TESDA. Isang bentahe rin ang kahusayan nito sa pagsasalita ng English language.

Ayon sa POEA, tatagal ang job contract ng limang taon kung saan nais ng Israel na 90 porsiyento ng mga aplikante ay babae. Tanging airfare at fees para sa mga dokumento ang sasagutin lamang ng matatanggap na caregiver. Sa mga interesadong indibidwal, kailangang mag-register sa online services ng website ng POEA.