- BULGAR
- Jan 13, 2025
ni Erlinda Rapadas @Teka Nga | Jan. 13, 2025
Photo: Jak Roberto - Instagram
Hindi pa rin matahimik ang mga nagulat at nabulabog na JakBie fans sa ginawang announcement ni Barbie Forteza na break na sila ni Jak Roberto. Hindi pa nila ganap na matanggap na nagtapos na ang pitong taong relasyon ng kanilang mga idolo. Umaasa pa rin ang mga loyal JakBie fans na “cool-off” lang sina Barbie at Jak at muling magkakabalikan.
Pero dismayado naman kay Jak ang mga fans ni Barbie dahil sa mga pinaggagawa ng aktor lately. At ang latest nga ay ang mga happenings ni Jak, kasama ang isang BINI member. Nabunyag din ang tungkol sa inuman session ni Jak kasama ang Vivamax sexy star na si Ava Mendez. Binigyan din ng kulay ang pakikipag-party ni Jak sa isang AFAM noong New Year.
Kapag ganito ang kaganapan sa buhay ni Jak, paano pa aasahan na may chance na magkabalikan silang muli ni Barbie? Hindi ba naisip ni Jak na makakasira sa kanyang image at career ang kanyang pinaggagagawa?
Kung tutuusin, may career pa naman si Jak kahit nag-break na sila ni Barbie. Marunong naman siyang umarte, at guwapo pa. Puwede siyang tumanggap ng iba’t ibang klaseng role. Huwag sanang sayangin ni Jak ang magagandang oportunidad sa kanyang career.
Matagal niyang pinaghirapan upang siya ay sumikat.
Balot pa rin ng matinding kalungkutan at pamimighati si Dina Bonnevie sa biglaang pagpanaw ng kanyang mister na si Dept. of Agriculture Undersecretary DV Savellano.
Mahigit 12 taon silang magkasama, at bale magse-celebrate sana sila ng kanilang ika-13 wedding anniversary sa darating na Marso, 2025.
Nakapagbakasyon pa sina Dina at DV sa Japan noong holidays, at walang premonisyon na papanaw na ito noong Enero 7.
Masakit para kay Dina Bonnevie ang pagpanaw ng kanyang mister dahil sa masasayang alaala na kanilang pinagsamahan noong nabubuhay pa si DV. Nakita ni Dina ang pagiging mabuting tao ng kanyang mister na laging tumutulong sa maliliit na manggagawa sa Ilocos.
Magiging mahirap para kay Bonnevie ang mga susunod na araw pagkatapos ng libing ng kanyang mister dahil hindi na niya ito makakasama sa bahay.
Pinayuhan na raw si Dina ng kanyang mga anak na sina Danica at Oyo Boy Sotto na pumisan na muna sa kanilang magkapatid upang malibang siya sa kanyang mga apo.
Payo naman ng mga kasamahang artista ni Ms. D na magpakaabala siya sa kanyang career upang hindi maramdaman ang labis na kalungkutan.
Sa ngayon, walang kontrata si Dina Bonnevie sa anumang network, freelancer ang status niya.
Noong nakaraang taon, maganda ang exposure niya sa Abot Kamay Na Pangarap (AKNP) na pinagbidahan ni Jillian Ward, kasama sina Carmina Villarroel, Richard Yap, Wilma Doesnt, Ken Chan, atbp.. Gumanap siya bilang kapatid ni Richard Yap.
Nami-miss daw ni Bonnevie ang mag-host ng talk show, at kung sakali man na may mag-offer, gusto niyang magkasama sila ni Danica, na tulad niya ay sanay rin mag-host ng talk show. Well, puwede naman kahit once a week ang talk show, at magiging interesting itong panoorin. Open naman si Dina kahit saang network ito ipalabas, sakaling may producer na magkaka-interes.
May mga negosyong naiwan si DV Savellano na kailangang asikasuhin ni Dina. Gayunpaman, gusto pa rin niyang maging aktibo sa kanyang showbiz career. Walang-wala siyang interes na pumasok sa pulitika kahit dating pulitiko ang kanyang mister.
Dahil isa rin siyang artista, naiintindihan ni Bossing Vic Sotto na trabaho lang ang dahilan kaya tinanggap ng mga artista ang maging bahagi ng pelikulang The Rapists of Pepsi Paloma (TROPP).
Kaya hindi niya isinama ang mga artista sa kanyang demanda laban sa kontrobersiyal na si Darryl Yap.
Isa sa mga bina-bash nang husto ngayon sa social media ay ang aktres-direktor na si Gina Alajar, na may malaking role sa TROPP. Kasama rin sa movie sina Rosanna Roces, Mon Confiado at Rein Escaño.
Marami naman ang nagsasabing hindi si Vic ang target na sirain ang imahe sa publiko. Damay din sa demolition job ang anak niyang si Pasig Mayor Vico Sotto, na muling kakandidatong mayor ng Pasig.
Pero hinding-hindi papayag ang libu-libong mga fans at supporters ng TVJ na sirain ang pagkatao ni Bossing Vic Sotto para sa promo ng kontrobersiyal na pelikula.
At ano ang motibo ng muling pagbuhay sa nakaraan ng sexy star na si Pepsi Paloma, gayong matagal na siyang pumanaw?
Saksi ang mga kaibigang sexy stars na sina Coca Nicolas at Sarsi Emmanuel na dumanas ng matinding depresyon noon si Pepsi Paloma, kaya naisipan niyang magpakamatay.
