Fans, todo-kulit, wala namang suporta… REUNION MOVIE NINA JOLINA AT MARVIN, WALANG INGAY

ni Erlinda Rapadas @Teka Nga | Feb. 14, 2025

Photo: Marvin at Jolina - Instagram

Marami ang nagtatanong kung bakit walang gaanong ingay at kulang sa promo ang reunion movie nina Jolina Magdangal at Marvin Agustin, ang Ex Ex Lovers (EEL) na Valentine offering pa naman para sa kanilang mga diehard fans, kaya dapat ay na-push nang husto.

Nasaan na ang mga tagahanga nina Jolens at Marvin na nangungulit noon na muli silang magtambal sa pelikula? Dapat ay all-out sila ngayon sa pagsuporta sa tambalang iniidolo nila.

May kilig pa rin naman ang tambalang Jolina at Marvin. Ang tagal na naghintay ang

kanilang mga fans upang muli silang magkasama sa isang project.  

Dapat siguro ay tumulong ang mga tagahanga nina Jolens at Marvin na magpa-block screening upang magkaroon ng awareness ang mga moviegoers sa pelikulang EEL. Bugbugin sa promo sa TV at maging sa social media. 

Kung lahat ng mga fans nina Jolens at Marvin ay sama-samang magpo-post sa social media para i-promote ang EEL, tiyak na magkakaroon ng interest ang publiko na panoorin ang nasabing reunion movie ng tambalang Jolina Magdangal at Marvin Agustin, lalo na’t Valentine’s Day at perfect para sa isang movie date.

---

Ano kaya ang magaganap na pasabog sa 40th birthday celebration ngayon ng fashion icon na si Heart Evangelista? 

Curious ang marami na malaman kung ano ang birthday gift sa kanya ni Sen. Chiz Escudero. Wala pang post sa social media si Heart tungkol sa kanyang birthday bash. Isang bagay lang ang kanyang binanggit, at ito ay ang malaking birthday cake na customized at may nakasulat na, “Charaught.” 

Pero nauna na rito, isang surprise advanced birthday party ang inihanda para kay Heart ng kanyang mister na si Sen. Chiz, ng kanyang kapatid at malalapit na kaibigan. Tunay na nag-enjoy si Heart sa kanyang advanced birthday party.

Inaabangan naman ng kanyang mga fans ang kanyang isusuot na outfit ngayong kanyang kaarawan. Knowing Heart Evangelista, tiyak na fabulous ang kanyang gown sa kanyang birthday party.

Samantala, sobrang proud si Heart sa Sorsogon, ang lalawigan ng kanyang mister na si Senate Pres. Chiz Escudero. Ang Sorsogon ang itinuturing niyang ‘my home.’ Kahit na abala siya sa mga fashion events sa New York at Paris, lagi pa rin niyang hinahanap ang warmth at ambiance ng Sorsogon. Dito siya nakakaramdam ng real peace and happiness.

Kaya naman nang ma-feature si Heart sa Harper’s Magazine (Singapore edition) ay buong-pagmamalaki niyang ibinida ang magagandang tourist spots ng Sorsogon na dapat puntahan.

Itinampok din sa magazine ang mga cottage industries na ipinagmamalaki ng Sorsogon. Kaya naman napamahal na rin sa mga kababayan ni Sen. Chiz si Heart, bonggang-bongga kasi ang pagpo-promote ng aktres sa Sorsogon.

---

‘Di lang pang-Christmas songs…

JOSE MARI CHAN, NAG-ALA-ELVIS PRESLEY

HINDI lang ‘pag Pasko mabenta sa mga shows ang veteran singer/composer na si Jose Mari Chan. Kapag Valentine’s Day, isa siya sa mga kinukuha sa mga Valentine shows at concerts. Marami siyang love songs na paborito ng mga Pinoy.

Pero nagulat at naaliw kami nang mapanood namin minsan sa RJTV si Jose Mari Chan na kumakanta ng pinasikat na awitin ng King of Rock ‘n Roll na si Elvis Presley, ang (Let Me Be Your) Teddy Bear. Bigay na bigay ang pagkanta ni Jose Mari, with matching twist ng legs na mala-Elvis Presley. ‘Yun ang masasabing total change of image, at talagang nag-enjoy kami sa panonood kay Jose Mari Chan.

Hindi lang pala siya magaling na balladeer, kaya rin niyang bumanat ng rock songs.  

Pero sa RJTV lang ‘yun ginawa ni Jose Mari Chan dahil friend niya si Ramon Jacinto. Sana ma-revive rin ni Jose Mari Chan ang iba pang Elvis Presley songs.

---

SA March 9 pa magsisimulang ipakilala ang mga mapipiling housemates na papasok sa Pinoy Big Brother (PBB) Collab Celebrity Edition. Pero ngayon pa lang ay excited na ang mga viewers at may ilang nagsa-suggest na sana ay makasama sa mga housemates ang ilang Kapuso artists tulad nina Paolo Contis, Buboy Villar, Rufa Mae Quinto, Herlene Budol, Rita Daniela at si Barbie Forteza.

Mismong si Gabbi Garcia, na isa sa mga hosts ng PBB Collab ay gusto rin na makuhang housemate si Barbie Forteza. May ilan naman ang nagsasabing isama na rin sina Diwata at Boss Toyo.

Sa mga artists naman ng Star Magic, may ilang nagsa-suggest na ipasok sina Maris Racal at Anthony Jennings, ganoon din si Andrea Brillantes. 

Mas interesting daw panoorin ang PBB Collab Celebrity Edition kung popular at medyo kontrobersiyal ang mga housemates na papasok sa Bahay ni Kuya. Dito magkakaalaman kung sinu-sino ang smart, madiskarte at palaban. 

Anu-anong challenging tasks kaya ang ipagagawa sa kanila ni Big Brother?

PHILMAR, PROUD NA NIYAYAKAP ATHINAHALIKAN NG MGA TURISTA SA SIARGAO

ni Erlinda Rapadas @Teka Nga | Feb. 13, 2025

Photo: Philmar Alipayo - IG

Dahil sa kanyang pagiging champion surfer sa Siargao, maraming turistang babae ang humahanga kay Philmar Alipayo. 

Kahit na sabihin pang hindi naman siya kasingguwapo nina Richard Gomez at Gerald Anderson, still, ang lakas ng karisma niya sa mga chicks. 

Madalas daw, kapag nakikita si Philmar ng mga babaeng turista sa Siargao ay niyayakap at hinahalikan siya kahit nasa public place. Feeling heartthrob ang dating ni Philmar dahil type na type siya ng mga foreigners.

Si Andi Eigenmann mismo ang nagbuking kay Philmar nang sabay silang mag-guest noon sa Fast Talk with Boy Abunda (FTWBA). Ito ang una nilang guesting sa show ni Abunda at wala pa silang isyu sa hiwalayan that time. 

Hindi raw nakakaramdam ng selos noon si Andi kahit nakikitang niyayakap at hinahalikan ang karelasyong si Philmar. Natural na raw kasi na laging pinagkakaguluhan ng mga chicks ang surfer na parang isang celebrity. 

Pero, iba ang friendship nina Philmar at Pernilla Sjöö na may couple tattoo pa, at ‘yun ang hindi nakayanan ni Andi na palampasin. 

Ngayon ay back in each other’s arms na sina Andi at Philmar, na nabigyan ng advice ng lolo’t lola ni Andi na sina Eddie Mesa at Rosemarie Gil. 

Ang aabangan ngayon ng mga netizens ay kung mapaninindigan ni Philmar Alipayo ang pagbabago alang-alang kay Andi at sa kanilang mga anak.  

---

MARAMI ang nakakapansin na malaki ang pagbabago ni Herlene Budol a.k.a. Hipon Girl sa aspetong pisikal. Napaka-obvious daw ng kanyang mga ipinagawang enhancements sa kanyang ilong, labi at boobs. 

Halata rin daw na nagpa-botox ito, kaya ibang-iba na ang hitsura niya ngayon. Mas lumitaw ang kanyang ganda at kaseksihan.

Kung tutuusin, hindi big deal ang pagpaparetoke ni Herlene Budol dahil nagbibida na siya ngayon sa mga serye ng GMA-7. 

Una siyang nagbida sa Magandang Dilag (MD) at marami rin siyang TV guestings. 

Ngayon, may bago na naman siyang afternoon soap, ang Binibining Marikit (BM) kung saan dalawa ang kanyang leading men.

Dahil sa bago niyang serye sa Kapuso Network, nagpahinga muna si Herlene Budol sa pagsali sa beauty pageants. Prayoridad niya ngayon ang kanyang career. 

So far, wala pa siyang inaamin tungkol sa kanyang love life. At hindi na rin siya nabu-bully ngayon. Sinikap niyang maging professional sa kanyang trabaho at pinakikisamahan ang lahat ng kanyang co-stars sa BM.

Nagpapasalamat si Herlene sa GMA Network dahil wholesome ang mga projects na ibinibigay sa kanya, hindi siya ibini-build-up na sexy star. 

Madalas ay api-apihan ang kanyang role sa serye, kaya nakiusap si Herlene Budol na wala siyang kissing scenes sa kanyang mga leading man.

---

NANG mag-guest si Ashley Ortega sa Fast Talk with Boy Abunda (FTWBA), inamin na rin niya na may relasyon sila ni Mavy Legaspi. 

Three years ang tanda ni Ashley kay Mavy, pero mature nang mag-isip ang aktor.

Na-meet na raw ni Ashley ang parents ni Mavy na sina Carmina Villarroel at Zoren Legaspi, pati ang kakambal nitong si Cassy. Mababait daw ang mga ito, kaya palagay ang kanyang loob. 

Well, it seems nakatagpo na nga ng bagong pag-ibig si Mavy pagkatapos ng breakup nila ni Kyline Alcantara.  

Ayon sa ilang netizens, mukhang magkakasundo sina Ashley at Mavy kahit magkaiba sila ng ugali dahil pareho sila ng interes at hindi nagsasapawan sa exposure. Tahimik lang si Mavy, samantalang si Ashley ay outgoing, jolly, at super cool. 

Wish ng mga fans ni Mavy na maging good influence si Ashley sa aktor. 

Isa pa, mukhang hindi rin magkakaproblema si Ashley sa pakikitungo sa pamilya ni

Mavy, kaya mukhang magtatagal ang kanilang relasyon.

---

PORMAL nang naghalal ng mga bagong opisyal ang organisasyon ng KAPPT (Kapisanan ng mga Artistang Pilipino sa Pelikula at Telebisyon). 

Nahalal bilang pangulo si Hero Bautista. Si Rhene Imperial ang internal vice-president at si Rey PJ Abellana naman ang external VP.

Si Jimmy Tiu ang itinalagang secretary, at si Lyn Madrigal naman ang treasurer. 

Kabilang sa mga bagong Board Members sina Archie Adamos, Jethro Ramirez, Jerry Roman, at Josie Tagle.  

Maraming nakalinyang projects ang KAPPT sa taong 2025, kaya inaasahan ang kooperasyon ng mga miyembro. 

Malaking challenge ito sa mga bagong opisyal, lalo na sa pangunguna ng pangulo na si Hero Bautista. Ngunit sisikapin nilang muling maging aktibo ang KAPPT.

Mga endorsers ni Dra. Belo, kinabog na… GRETCHEN, HEART, SHARON, ETC., NA KAY DRA. AIVEE NA

ni Erlinda Rapadas @Teka Nga | Feb. 12, 2025

Photo: Sharon, Gretchen at Heart - The Aivee Clinic

May namumuong rivalry-competition ngayon sa pagitan nina Dra. Vicki Belo at Dra. Aivee Aguilar-Teo dahil sa kanilang mga celebrity endorsers. 

Dati-rati ay nasa poder ni Dra. Belo ang mga sikat na celebrities sa showbiz. Sa kanya nagpapaalaga ng kutis ang malalaking artista.  

Ngayon, nasa kanya pa rin naman ang mga artistang loyal sa Belo Clinic tulad nina Anne Curtis, Julia Barretto, Kim Chiu, Alex Gonzaga, Isabelle Diaz, Solenn Heussaff, Andrea Brillantes, Maris Racal, atbp..

Pero unti-unti nang nagiging popular sa mga big stars si Dra. Aivee Teo, na isang magaling na dermatologist. Ang kanyang mga celebrity clients ay sina Gretchen Barretto, Heart Evangelista, Sharon Cuneta, Jennylyn Mercado, atbp..

Ang Belo Medical Clinic ay may 15 branches na at hanggang Cebu at Davao ay may clinic sila. Si Dra. Vicki Belo ang CEO at Medical Director ng Belo Medical Group. Hindi lang sa mga medical service at procedure sila kumikita kundi pati na rin sa mga beauty products na pang-masa.

Samantala, ang Aivee Clinic ay nagsisimula pa lang sa kanilang expansion, pero gumagawa na sila ng pangalan at dinarayo ngayon ng mga top celebrities at ng mga ‘richie-richie’ (mayayaman) socialites.

---

NAGMARKA sa marami ang term na ‘Sharon Cuneta’ kapag may mga nagte-takeout o nagbabalot ng mga ulam sa anumang handaan. At nakakatuwa naman na mismong si Megastar Sharon Cuneta ay aminadong nagsa-‘Sharon’ din, lalo na kapag may handaan sa bahay ng kanyang Tita Helen Gamboa.

Ang ‘Sharon Cuneta’ term ay galing sa hit song noon ni Shawie na Bituing Walang Ningning (BWN) kung saan may linyang…“Balutin mo ako sa hiwaga ng iyong pagmamahal.”

At para hindi halata ang term na ‘balutin’, ginawa na lang itong “I-Sharon Cuneta mo!” 

At dahil popular nga sa lahat ang nasabing termino, kinuhang endorser ng life insurance si Megastar Sharon Cuneta. Ang concept ng commercial ay tungkol sa pagte-take home ng mga natirang ulam sa mga handaan.

Sa nasabing commercial ni Shawie para sa isang insurance company, naglabas siya ng plastic bags at plastic containers na lalagyan ng leftover food. Nagbigay pa siya ng tips kung paano magsa-‘Sharon Cuneta’ sa handaan.

Nakakatuwa at marami ang makaka-relate sa nasabing commercial ng insurance. Sana mapanood ito sa telebisyon. 

Curious naman ang mga netizens kung magkano kaya ang ibinayad na talent fee (TF) kay Megastar Sharon sa nasabing commercial?  

---

Ibang klase ang pagkakaibigan ng Diamond Star na si Maricel Soriano (Marya) at ni Chanda Romero.  

Malaki ang respeto ni Marya kay Chanda at itinuturing niya itong best friend at second mom. Naging close sila dahil nagkasama sa mga pelikulang Saan Darating ang Umaga (SDAU) Yesterday, Today & Tomorrow (YT&T), Pabling, atbp..

Kung si Maricel Soriano ay mataray at palaban—isang image na kinatatakutang makatrabaho ng ibang artista—sweet naman siya at jologs kapag si Chanda Romero ang kasama. 

Kaya sa vlog ni Maricel na “Maganda Ako” kung saan si Chanda Romero ang kanyang nakatsikahan, hindi matapus-tapos ang kanilang kuwentuhan. Panay ang flashback nila sa mga panahong gumagawa sila ng pelikula sa Regal Films. At natutuwa sila noon kay Snooky Serna dahil napakabagal daw kumilos, kaya binansagang ‘pagong’. 

Hinding-hindi makakalimutan ni Maricel na sa panahon na may problema siya sa kanyang love life, si Chanda Romero ang dumamay sa kanya at nagbigay ng motherly advice. Kaya hanggang ngayon, “Nanay” ang tawag niya sa aktres.

---

MARAMING fans ni Gabbi Garcia ang natuwa nang finally ay siya ang napili na maging co-host nina Bianca Gonzalez at Robi Domingo sa PBB Collab Celebrity Edition. 

Hindi na maninibago pa si Gabbi sa kanyang pagho-host dahil may experience na siya sa pagho-host ng iba’t ibang events. Smart siya at very confident sa sarili.

Mas gagaling pa siya at mahahasa ang kanyang hosting skills ngayong host na rin siya sa PBB Collab Celebrity Edition. Matutulungan din siya nina Bianca Gonzalez at Robi Domingo.  

Ang tanong ng mga fans ngayon ay kung mararanasan din kaya ni Gabbi ang mapasok sa Bahay ni Kuya tulad ng pinagdaanan nina Bianca at Robi? Paano siya makaka-relate sa mga celebrity contestants na mapipili?  

Matatandaang nag-audition din noon si Gabbi Garcia sa PBB Season 4 noong 2012. Hindi siya pinalad na mapili at makapasok. Kaya ngayon, hindi niya akalain na isa siya sa mga co-hosts ng PBB Collab Celebrity Edition.