Anak nina Aga at Charlene, papalitan na raw… ATASHA, NABABAWASAN NA ANG EXPOSURE SA EAT BULAGA!

ni Erlinda Rapadas @Teka Nga | Feb. 28, 2025

Photo: Atasha Muhlach - IG

Maraming viewers ang nakakapansin na nabawasan ang exposure ni Atasha Muhlach sa Eat… Bulaga! (EB!). 

Noong una ay araw-araw siyang napapanood sa EB!. Marami ang natutuwa sa pagiging jologs at down-to-earth ni Atasha. Madali siyang nakapag-adjust sa kanyang mga kasamang hosts sa EB!. 

Madalas ding purihin si Atasha nina Tito Sotto, Vic Sotto at Joey de Leon sa kanyang pagiging professional sa trabaho, kaya marami ang nagtataka at nagtatanong kung ano ang nangyari at nabawasan ang exposure ni Tasha sa EB!.

Balitang-balita rin na papalitan na siya bilang co-host sa nabanggit na noontime show. Kaya naman labis na nag-aalala ang mga fans ni Atasha Muhlach.

Well, baka naman loaded na ang schedule ni Atasha ngayon, kaya hindi na niya kakayanin ang daily work sa EB!? O baka naman naiintriga lang siya dahil nasapawan na ng mga bagong hosts ang mga dating hosts ng EB!.

Anyway, hindi rin siguro totoo ‘yung sinasabi ng iba na may attitude na ngayon si Tasha. For sure, hindi ito ito-tolerate nina Aga Muhlach at Charlene Gonzalez.

---

Kaya magaan ang loob kay Jojo Mendrez…

MARK, SANAY NA SA MGA BADING 

MATAPOS maging sentro ng tsismis sa showbiz ang ginawang pagsasayaw ni Mark Herras sa isang gay bar, heto at nilalagyan ng malisya ang “friendship” at closeness niya sa tinaguriang “Revival King” na si Jojo Mendrez.  

Kaya naman mas napansin at pinag-uusapan ngayon sa showbiz ang Mark-Jo tandem. 

Paliwanag naman ni Mark, sadyang malapit ang loob niya sa mga gays. Inampon daw kasi siya at pinalaki ng kanyang mga gay parents. Bata pa siya ay nakagisnan na niya ang gays sa kanyang paligid. 

At wala siyang nakitang malisya sa mga ito, kaya naman hindi kataka-takang magaan din ang loob niya sa singer-businessman na si Jojo Mendrez. Hindi siya apektado sa mga sinasabi ng mga bashers.

---

ANG saya-saya ng mediacon ng horror movie na Postmortem na idinirek ni Tom Nava at pinagbibidahan nina Alex Medina, Jai Asuncion, Agassi Ching, Francis Mata, Jennica Garcia kasama ang mga vloggers na sina Sachzna Laparan at Albert Nicolas. 

Ginanap ang nabanggit na mediacon sa Mga Obra ni Nanay Gallery ni Cristy Fermin na nasa Casa Milan, Quezon City na ngayon.

Nagsilbi kasing reunion ito ng mga dating tropa at media friends ni Kabsat Cristy. Naroon din ang kanyang mga co-hosts sa Showbiz Now Na! na sina Romel Chika at Wendell Alvarez. 

Ipinasilip sa media ang trailer ng Postmortem at may impact ito at may horror factor.

Sayang nga lang at hindi pumasa ang Postmortem sa panel ng mga hurado sa nakaraang MMFF 2024. 

Kahit pa mga vloggers ang dalawang main stars sa Postmortem na sina Jai Asuncion at Agassi Ching, may ibubuga naman sa pag-arte. At si Direk Tom Nava, pasadung-pasado na sa pagdidirek ng pelikula. 

Showing na ang Postmortem sa March 19. Kaya sa mahihilig sa horror movies, must watch n’yo ito.

Dahil pasok sa survey… WILLIE, DEDMA SA BASHERS

ni Erlinda Rapadas @Teka Nga | Feb. 26, 2025

Photo: Willie Revillame - Wil to Win

Twenty-seven years nang TV host si Willie Revillame. Narating niya ang peak ng kanyang career dahil sa mga game shows niya sa telebisyon. 

Halos naikot na ni Willie ang malalaking networks tulad ng ABS-CBN, GMA-7 at TV5 kung saan umere ang kanyang mga shows. Short-lived din ang nangyari sa programa niya sa AllTV Network ni Manny Villar. 

Nagsimula si Revillame sa Wowowin, Willing Willie, Wowowillie, at Wil To Win. Milyun-milyon ang sumuporta sa mga shows ni Revillame. Naging trademark niya ang pamimigay ng jackets at cash prizes. 

Pero, hindi naging madali kay Willie Revillame ang magdesisyon kung papasukin niya ang political arena. At nang kinumpirma na niya ang pagtakbong senador sa darating na midterm election sa Mayo, binugbog na siya ng panlalait ng mga bashers. Wala naman daw siyang solidong plataporma na inilatag na kanyang gagawin kapag siya ay nanalong senador. 

Sa kabila nito, marami pa rin ang nagtitiwala kay Revillame at pasok siya sa Top 13 senatoriables.

Kaya ngayon ay pinaghandaan na ni Revillame ang bawat rally na kanyang pinupuntahan at dedma lang sa mga bashers.

Dalawang essential na bagay ang gustong tutukan ni Willie Revillame, ito ay ang libreng edukasyon at ang kalusugan ng mahihirap nating mga kababayan. Let's see kung lulusot si Willie Revillame sa Senado.

---

Madlang pipol, shocked! 

TONI, IKINUMPARA SA PANTY ANG PRIDE

Toni Gonzaga - IG

MARAMI ang na-shock kay Toni Gonzaga sa isang vlog na ginawa niya kasama ang kanyang mister na si Paul Soriano, ang kapatid na si Alex Gonzaga at mister nitong si Mikee Morada. 

Ang topic nila sa nasabing vlog ay tungkol sa pride na pinaiiral ng magkarelasyon o mag-asawa.

Sey ni Toni, “Ang pride, para ‘yang panty na ‘pag hindi mo ibinaba, walang mangyayari!”

Well, coming from Toni Gonzaga na kilala ng lahat na prim and proper bilang TV host at lumaki sa old school values, it’s a shocking statement. Kami nga mismo ay medyo nagulat at hindi makapaniwala na napakakaswal lang na nabanggit ‘yun ni Toni. 

Samantala, nakakatuwa naman ang sagot ni Alex Gonzaga na, “Kaya nga kami ni Mikee, hindi na nagpa-panty!” at nauwi na lang sa tawanan ang pag-uusap ng couples na sina Toni at Paul, Alex at Mikee. 

Sey naman ng mga netizens, walang dapat na ipagtaka ang mga fans/followers nina Toni at Alex  dahil pareho na silang mature at may asawa na. Nagpakatotoo lang sila sa kaganapan ng buhay-may-asawa.

---

NAGPAPASALAMAT si Richard Gutierrez sa kanyang dad, ang dating matinee idol na si Eddie Gutierrez, sa mga advice nito na makakatulong sa kanyang career as an actor. 

Dati-rati, medyo aloof at hindi malapit sa mga fans si Richard. Hindi niya gaanong ine-entertain ang mga fans na nagpapa-picture sa kanya kapag may mga events o ‘pag nasa mall show siya. Kabaligtaran ito ng ugali ng kanyang dad na si Eddie G. na ang bait-bait at napaka-humble. Kahit sinong fans - bata man o matanda - na gustong makipagkamay at magpa-picture ay pinagbibigyan ni Eddie Gutierrez.

Bilin pa ng kanyang dad kay Richard, dapat na mahalin ang mga fans dahil ang mga ito ang nakakatuwang upang magtagal ang showbiz career nito. Huwag daw balewalain ang mga fans na umiidolo sa kanya. 

Kaya naman ngayon ay nagri-reach out na si Richard sa kanyang mga tagahanga at pinagbibigyan ang mga gustong magpa-picture sa kanya, hindi na mai-intimidate ang mga fans na lumapit sa aktor. 

Samantala, tanggap na ni Richard ang sitwasyon nila ng kanyang ex-wife na si Sarah Lahbati. Hindi siya nakakalimot sa kanyang obligasyon sa dalawa nilang anak. Okay ang kanilang co-parenting agreement sa dalawang bata.

DIWATA, LAOS NA, FEELING SUPER-SIKAT PA

ni Erlinda Rapadas @Teka Nga | Feb. 25, 2025

Photo: Diwata Pares Overload Fanpage

Na-miss ng mga dumayo at nanood ng Panagbenga Festival Grand Parade sa Baguio ang mga celebrities na may karosa at nakikisaya sa taunang parada.

Absent sa grand parade sina Sen. Bong Revilla, Jr., Lito Lapid, Coco Martin, Niño Muhlach, atbp.. Ang dumating lang na mga celebrities at nakasama sa Panagbenga Grand Parade ay ang cast ng Home Along ‘Da Riles (HADR) na may sariling karosa at nakasakay sina Claudine Barretto, Nova Villa, Boy2 Quizon, Vandolph, atbp.. 

May sarili ring karosa ang Pares Overload na si Diwata upang ikampanya ang Vendors Partylist. Feel na feel niya na sikat pa siya, kahit marami ang nagsasabing ‘laos’ na siya at sawa na ang mga tao sa kanyang Pares Overload. 

Dumating din sa parada si Lovi Poe na endorser ng isang beauty product.

Samantala, marami ang naghintay sa karosa ng Batang Quiapo (BQ) at nagbabakasakali na darating sila, kasama ang iba pang cast ng BQ sa pangunguna ni Coco Martin. 

Samantala, kahit saang rally makarating ang grupo ng Alyansa Para sa Bagong Pilipinas, lutang na lutang at pinapalakpakan sina Sen. Bong Revilla at Sen. Lito Lapid na itinuturing na tagapagtanggol ng mahihirap. At karamihan sa mga botante ngayon ay mga nabibilang sa sektor ng mga mahihirap, kaya patuloy silang naniniwala sa mga senatoriables na may malasakit sa mga ordinaryong mamamayan at sa mga senior citizens.

---

‘Di pa man nailalantad…

KRIS, MAY NATUKLASAN SA BF NA DOKTOR KAYA HIWALAY NA

Brokenhearted na naman si Kris Aquino. Kaya marami ang nagtatanong kung bakit pinutol na niya ang relasyon sa nobyong doctor na si Michael Padlan, isang trauma surgeon sa Makati Medical Hospital.

Hindi pa man daw naipapakilala nang lubos ni Kristeta sa publiko ang bago niyang nobyo ay split na sila. 

Si Kris mismo ang nag-post na wala na siyang love life ngayon. Pero, hindi naman niya sinabi kung ano ang dahilan ng breakup. 

Sa pagkakaalam ng marami, dating kasal na si Dr. Mike at may dalawa itong anak sa unang karelasyon. Dalawang kurso ang tinapos ni Dr. Padlan sa FEU, Medtech at Medicine, at nagpakadalubhasa rin ito sa Neurosurgery sa USA.

Maganda ang background ng pamilya ni Dr. Mike Padlan na tubong-Pangasinan. Isa ring doktor ang kanyang ama at maganda ang track record ni Dr. Mike bilang resident doctor ng Makati Med, kaya curious ang lahat na malaman kung anong bagay ang natuklasan at inayawan ni Kris sa kanya.

Sa health condition ngayon ni Kris, kailangan niya ng isang taong lubos na magmamahal sa kanya upang magsilbing inspirasyon at magbibigay sa kanya ng moral support.

Pero, may ilang netizens naman ang nagsasabing mas dapat siguro na magpahinga muna sa pag-ibig si Krissy, at mag-focus na lang sa kanyang pagpapalakas at pagpapagaling sa kanyang karamdaman. 

Marami namang nagmamahal sa kanya na mga kaibigan na handang dumamay sa kanyang pinagdaraanan.

---

PAREHO palang yapper (madaldal) sina Kyline Alcantara at Kobe Paras. Kung titingnan lang daw si Kobe, tahimik ito at mahiyain. Pero, kapag komportable na sa isang tao, madaldal ito at palabiro. 

At ito ang natuklasan ni Kyline habang nagtatagal ang kanilang relasyon, kaya nagkakasundo at swak na swak sila sa isa’t isa. 

Marami rin ang nakakakita na seryoso talaga si Kobe kay Kyline. Naipakilala na rin ni Kobe si Kyline sa kanilang mga kamag-anak nang magbakasyon sila sa LA, California. 

Ngayon lang daw ginawa ito ni Kobe Paras, kaya marami ang labis na naiinggit kay Kyline dahil siya ang pinili ni Kobe maging nobya.

---

TIYAK na magugulat at magtataka ang mga fans ni Julie Anne San Jose sa kanyang role na gagampanan sa murder/mystery seryeng Slay na may pagka-offbeat at kontrabida.

Makakasama rito ni Julie Anne sina Gabbi Garcia, Mikee Quintos at Ysabel Ortega.

Ipapalabas ang Slay sa Viu ngayong Marso. Tiyak na aabangan ng mga viewers kung ano’ng role ang gagampanan nina Gabbi, Mikee at Ysabel sa SLAY. 

Magsisilbing hamon ito sa kakayahan nila dahil kakaibang character ang kanilang gagampanan.