Ayaw makinig sa payo ng iba... ARCI, AMINADONG ADIK SA RETOKE KAHIT ‘DI NA MAKILALA

ni Erlinda Rapadas @Teka Nga | Mar. 26, 2025

Photo: Arci Muñoz - Instagram

Nang mag-guest si Arci Muñoz sa programang Fast Talk with Boy Abunda (FTWBA), nabanggit niyang labis siyang nagsisisi sa ginawa niyang pagpaparetoke ng kanyang mukha. Hindi niya itinatago at hindi ikinahihiyang aminin na marami siyang ipinagawa upang ma-enhance ang kanyang hitsura. At sadya raw matigas ang kanyang ulo dahil ayaw niyang makinig sa payo ng iba. 

Hindi raw siya nakukuntento sa kanyang natural na ganda, lagi niyang nire-reinvent ang kanyang sarili, kaya halos hindi na siya nakikilala ng mga dating kaibigan. 

At kabi-kabila ang natanggap niyang panlalait mula sa mga bashers, kaya hindi muna siya tumanggap ng anumang project. Sa kanyang love life niya ibinuhos ang kanyang panahon. 

Naging usap-usapan sa social media nang maging karelasyon niya ang anak ng isang prinsipe sa Brunei. Masaya at memorable naman daw ang kanilang naging relasyon kahit nauwi rin sa paghihiwalay. 

Apat na taon nang loveless si Arci Muñoz, kaya binalikan muli ang kanyang showbiz career. At dedma siya sa mga bashers na patuloy sa panlalait at tinatawag siyang retokada.

---

Itinatanggi ng Kapuso star na si Ysabel Ortega ang kumakalat na balitang break na raw sila ni Miguel Tanfelix. Wala na kasi silang ipino-post sa socmed ngayon na mga larawan ng kanilang relasyon. Parehong busy ngayon sina Ysabel at Miguel sa kanilang mga shows.

Si Ysabel ay nasa lead cast ng bagong suspense serye na Slay kasama sina Julie Anne San Jose, Mikee Quintos at Derrick Monasterio. 

Samantala, si Miguel ay patuloy sa paglabas bilang Kidlat sa Mga Batang Riles (MBR). 

Nagtatanong naman ang mga fans kung posible bang mag-guest si Ysabel sa MBR, tutal naman ay walang kapareha si Miguel sa serye. 

Well, mas makakabuti sa kanilang career kung solo-solo project muna sila. Puwede rin silang tumambal sa iba. Ang mahalaga ay suportado nina Isabel at Miguel ang career ng isa’t isa.

---

MARAMI ang nakapansin sa kakaibang campaign promo material ni Sen. Lito Lapid (LL) na ipinapalabas ngayon sa telebisyon. Makatotohanan ito, may malinaw na mensahe at madaling makaka-relate ang mga ordinaryong Pinoy. 

Hindi lang ito basta pampapogi points kay Sen. Lito, magmamarka ito sa lahat. 

Ang may ideya at may gawa pala ng mga promo ads for TV ni Sen. Lito ay ang anak niyang si Mark Lapid, sa tulong ni Coco Martin. 

Full support si Coco sa tinaguriang Supremo ng Senado na nakatrabaho niya sa Batang Quiapo (BQ).

Si LL ang nagsisilbing mentor ni Coco sa mga stunts at fight scenes niyang ginagawa sa BQ. Ibang-iba ang kanilang tandem sa serye. Gumaganda ang mga eksena sa tulong ni Sen. Lito. 

Kaya naman, isine-share ni Coco kay Lito ang karangalang natanggap ng BQ sa ginanap na 38th Star Awards for TV kung saan nanalo ito bilang Best Primetime Series.

Obyus na hulog na hulog na sa aktor… KIM, TODO-ADJUST SA UGALI NI PAULO

ni Erlinda Rapadas @Teka Nga | Mar. 25, 2025

Photo: Paulo at Kim - IG

Nag-aalala ang mga loyal fans ni Kim Chiu dahil nakikita nila ang mga senyales na nahulog na ang loob ng Chinita Princess kay Paulo Avelino. 

Hindi na lang para sa kanilang career ang pagiging malapit ni Kim kay Paulo. Masaya siya kapag magkasama sila ng aktor. Nakikita ng marami na may spark at kinikilig si Kim kapag tinutuksu-tukso sila ni Paulo.

At tsika ng ilang malapit kay Kim, siya na ang nag-a-adjust ngayon kay Paulo. Kapag may pupuntahan sila at nagbabaon ng pagkain si Kim, may nakabukod na food para sa aktor dahil hindi ito kumakain ng meat. 

May pagka-misteryoso rin si Paulo dahil lagi itong tahimik. Si Kim lang ang daldal nang daldal kapag sila ay magkasama. Kaya, maraming babae ang naiintriga sa ugaling ito ni Paulo Avelino. 

Ganunpaman, kahit walang ka-tandem ay kayang-kaya naman ni Kim. Patuloy na nagle-level-up ang kanyang pagiging aktres. 

Sa ginanap na 38th Star Awards for TV, si Kim Chiu ang nanalong Best Drama Actress dahil sa mahusay niyang pagganap sa kanyang role sa seryeng Linlang.

---

Nabigyan ni Barbie Forteza ang kanyang mga magulang ng pangarap nilang bahay mula sa kanyang kinita sa showbiz.

Noong nagsisimula pa lang siyang mag-artista ay naipangako ni Barbie sa kanyang sarili na bibigyan niya ng maginhawang buhay ang kanyang mga magulang.

Hindi ininda ni Barbie ang pagod at puyat sa taping at shooting para sa future ng mga mahal niya sa buhay. Kung anuman ang tagumpay na kanyang nakamit ngayon ay ang kanyang pamilya ang nagsisilbing inspirasyon niya.

Sa edad ni Barbie Forteza na 27, hindi niya naisipang bumukod sa kanyang mga magulang at kapatid. Nakasanayan na nila ang magkakasama sa mga mahahalagang okasyon sa kanyang buhay. May feeling of security si Barbie kapag kasama niya ang kanyang pamilya. 

Well, kalilipat pa lang nina Barbie sa ipinatayo nilang bahay noong nakaraang Pasko. Ito bale ang regalo niya sa kanyang mga magulang at walang-wala sa plano niya ang bumukod kahit na sabihin pa na nasa tamang edad na siya upang mamuhay nang solo.

Samantala, dahil sa isa siyang mabait at mapagmahal na anak, patuloy na binibiyayaan ng suwerte si Barbie Forteza. 

Sa paghihiwalay nila ni Jak Roberto ay sunud-sunod naman ang blessings sa kanyang career. Maraming offers na endorsements at may 3 pelikula siyang gagawin. May bago rin siyang seryeng gagawin sa GMA-7. 

At kahit walang love life, todo naman ang pag-angat ng kanyang career.

---

KINILALA ng PMPC 38th Star Awards for TV ang galing ni Dingdong Dantes (DD) sa pagho-host nang manalo siya bilang Best Game Show Host via Family Feud (FF). Kakaibang style o diskarte sa pagho-host ang ipinamalas ni DD sa FF. Maraming viewers ang natutuwa kay Dingdong dahil napaka-cool at relaxed niyang mag-host ng game show. Kaya, nag-e-enjoy din ang mga contestants sa FF. 

Wagi rin si DD bilang Best Educational Show Host via Amazing Earth (AE). 

Maraming bagay na nais i-share ni Dingdong sa mga kabataan na makakatulong sa kanilang pag-aaral. Maging ang magagandang tourist spots ay naipapakita rin sa AE. 

Bonus na parangal ng Star Awards kay Dingdong ang Special Award niya bilang Male Shining Star of the Night. 

Nagkaedad man si Dingdong Dantes, lutang pa rin ang taglay niyang charisma.

Dahil 29-anyos na… KATHRYN, NASULSULAN DAW KAYA GUSTO NANG MAG-SOLO

ni Erlinda Rapadas @Teka Nga | Mar. 24, 2025

Photo: Kathryn Bernardo - Instagram

Maraming netizens ang labis na nagtataka kung bakit gusto pang bumukod ng tirahan ni Kathryn Bernardo ngayon? 

Sa pagkakaalam ng marami ay hindi naman siya hinihigpitan ng kanyang parents at malaya naman niyang gawin kung ano ang gusto niya. Maski nga noong magkarelasyon sila ni Daniel Padilla ay wala namang restrictions at rules sa kanya si Mommy Min, at puwede siyang mag-open up sa kanyang mom kung anuman ang kanyang problema. 

Tuloy, marami ang nagtatanong kung may blessings ba ng kanyang parents ang desisyon ni Kathryn na bumukod at mamuhay na mag-isa? Baka raw may mga nag-impluwensiya at nagsulsol kay Kath na bumukod na ng tirahan dahil nasa tamang edad na siya upang maging independent.

Sabi naman ng iba, baka “birthday blues” lang ang nararamdaman ni Kathryn dahil 29 years old na siya sa March 26. At feeling ni Kath ay panahon na rin upang ma-explore ang maraming bagay sa kanyang buhay at kailangan niya ng space upang makapag-isip-isip kung ano’ng direksiyon ang gusto niyang tahakin. 

Ganunpaman, huwag sanang kalilimutan ni Kathryn na may pamilya siyang handang dumamay sa kanya anumang oras na kanyang kailangan.

---

Mukhang masusubok ang tatag ni Gabbi Garcia ngayong siya ang napiling celebrity guest sa Pinoy Big Brother (PBB) Celebrity Edition Collab. Kailangan niyang mag-interact sa mga housemates. 

At ang aabangan ng mga viewers ay kung kakayanin ng karisma ni Gabbi na pakibagayan ang moods ng mga PBB housemates. Ano’ng diskarte ang kanyang gagawin upang mapalapit sa mga ito? 

Matatandaan na sobrang naging close si Ivana Alawi sa mga housemates noong siya ay maging celebrity guest. Gustung-gusto ng mga housemates ang pagiging jologs ni Ivana. Wala itong kaarte-arte sa katawan, totoong ugali niya ang kanyang ipinakita, kaya naging big sister siya para sa ibang housemates. 

Samantalang si Gabbi Garcia ay may pagka-social ang dating. Kaya naman, challenge kay Gabbi ang pakisamahan at maging malapit sa mga housemates. At ‘yun ang aabangang kaganapan sa Bahay ni Kuya.

---

SHOCKED si Shaira Diaz nang rumampa sa Bench Body of Work ang kanyang groom-to-be na si Edgar Allan Guzman na nagpakita ng kanyang puwet.

In fairness, makinis at may korte naman ang butt ni EA, pero hindi nga inakala ni Shaira na magpapakita ito ng wetpu (puwet). 

Labis namang ikinatuwa ito ng audience dahil nakipagsabayan si EA sa ilang actors na rumampa sa Bench Fashion Show. 

Maging sina Ruru Madrid at Derrick Monasterio ay agaw-pansin din.

Itinodo naman ni Jake Cuenca ang pagpapa-sexy at paglantad ng kanyang katawan na nakasuot lamang ng white thong sakay ng motorsiklo.

Well, sa totoo lang, ang inaabangan ng lahat sa tuwing may Bench Fashion Show ay ang pagrampa ng mga male celebrities, hindi ang mga sexy female celebs.

Sa kanilang pagdalo sa Bench Body of Work, naalala nina Richard Gomez at Dingdong Dantes ang kanilang pagrampa noon sa Bench Fashion Show. Pero sa taong ito, sila ay special guests bilang suporta kay Ben Chan na isang kaibigan.

---

KASABAY ng kanyang 27th birthday ang pag-amin ng Kapuso artist na si Buboy Villar na may bago na siyang GF ngayon at may 3-month-old baby boy na sila.

Sa podcast nila ni Tuesday Vargas na Your Honor (YH) ay special guest si Jelai Andres na BFF ni Buboy Villar kaya naging masaya ang mga pa-throwback nila bilang mag-best friend. 

Si Buboy ang laging karamay ni Jelai kapag siya ay brokenhearted. At naging travel buddies din sila. 

Two years nang hiwalay si Buboy sa ex-GF niyang American girl na si Angilyn Serrano Gorens. Nagkaroon sila ng dalawang anak, na nasa pangangalaga ng parents ni Angilyn.

Nadadalaw at nakakasama naman ni Buboy ang dalawang anak nila. 

Seven years na naging single si Buboy bago niya nakilala ang karelasyon ngayon na si Khrizza Mae Sampiano. Walang matagal na ligawan ang nangyari, dahil matapos magkakilala at nagkita ay agad na silang naging magkarelasyon. 

Mabait at simple lang ang bagong GF ni Buboy. 

Tinanggap at minahal din nito ang dalawang anak nito kay Angilyn. At masaya na si Buboy dahil natagpuan na niya ang kanyang “the one”.