Disqualification at COC cancellation petitions kay Marcos, ibinasura na ng SC

ni Lolet Abania | June 28, 2022

Nagkakaisang ibinasura ng Supreme Court (SC) ngayong Martes, ang mga petisyon para idiskwalipika at ikansela ang certificate of candidacy (COC) ni President-elect Ferdinand “Bongbong” Marcos Jr., ng May 2022 elections.

May botong 13-0, ayon sa high court, nabatid na si Marcos ay qualified na tumakbo at mahalal sa public office. “Likewise, his COC, being valid and in accord with the pertinent law, was rightfully upheld by the Comelec (Commission on Elections),” pahayag ng SC sa isang press briefer.

Ayon sa SC, “Justice Henri Inting and Justice Antonio Kho did not take part in the deliberations as Inting’s sibling is incumbent Comelec Commissioner Socorro Inting while Kho is a former Comelec commissioner.”

Gayundin anila, ang member-in-charge ay si Justice Rodil Zalameda. Matatandaan na nais ng isang grupo ng mga petitioners na alisin si Marcos sa May 2022 presidential race dahil sa kabiguan nitong mag-file ng income tax returns (ITRs) mula 1982 hanggang 1985, kung saan anila ay katumbas ng moral turpitude at ground para sa disqualification, ang nagtungo sa Supreme Court noong Mayo matapos na ibinasura ng Comelec ang kanilang mga petisyon.

Isa pang grupo ng mga petitioners na binubuo ng mga Martial Law survivor ang naghain din ng isang petisyon na humihimok naman sa SC na ideklarang perpetually disqualified si Marcos mula sa public office at hindi maaaring tumakbo kahit pa sa pinakamababang elective position.

Gayunman, si Marcos na anak ng yumaong dating Pangulong Ferdinand Marcos Sr. ay pinalad na manalo noong May 2022 elections, kung saan nagkaroon ng mahigit na 31 milyong boto, habang nakatakdang manumpa bilang ika-17 pangulo ng Pilipinas sa Huwebes, Hunyo 30.

SC at CA, walang pasok sa Hunyo 29-30 para sa inagurasyon ni Marcos

ni Lolet Abania | June 27, 2022

Nagdeklara ang Supreme Court (SC) ngayong Lunes ng suspensyon sa kanilang trabaho mula Miyerkules, Hunyo 29 hanggang Huwebes, Hunyo 30, sa gitna ng inagurasyon ni President-elect Ferdinand “Bongbong” Marcos, Jr.

Sa isang memorandum order, inihayag ni Chief Justice Alexander Gesmundo na sinuspinde niya ang kanilang mga opisina sa mga nasabing araw dahil na rin sa road closure at traffic plan na inilabas ng Metro Manila Development Authority (MMDA) bilang bahagi ng security measures para sa inagurasyon ni Marcos.

“Whereby all roads leading to the Supreme Court are affected, thereby making it inconvenient for everyone to report for work, in consultation with the Supreme Court En Banc, a work suspension is hereby declared on June 29-30,” batay sa nakasaad sa order.

Gayundin, ang Court of Appeals ay nagdeklara ng work suspension sa CA Manila Station mula Hunyo 29 hanggang 30.

“In view of the traffic advisory in the City of Manila in relation to the Presidential inauguration… and in consultation with the Honorable Chief Justice of the Republic of the Philippines… work is hereby suspended in the Manila Station,” ayon sa CA.

Nagsimula na ring ipatupad ang pagsasara ng maraming mga kalsada sa Maynila nitong Linggo ng gabi. Nakatakdang manumpa ni Marcos bilang ika-17 pangulo ng Pilipinas sa National Museum of the Philippines.

SC Associate Justice Singh, nagpositibo sa COVID-19

ni Lolet Abania | June 16, 2022

Nagpositibo sa test sa COVID-19 si Supreme Court Associate Justice Maria Filomena Singh, ayon sa SC Public Information Office (PIO) ngayong Huwebes.

Batay sa SC PIO, si Singh, na fully vaccinated at natanggap na rin ang kanyang booster dose, ay nakaranas ng mild COVID-19 symptoms. Lumabas naman ang resulta ng kanyang test nitong Miyerkules, Hunyo 15.

Ayon din sa SC PIO, nananatiling nagtatrabaho si Singh habang nasa isolation. Ipinabatid naman ito ni Singh sa kanyang mga kasamahan at staff upang maisagawa ang kinakailangang pag-iingat.

Samantala, ang mga dumalo sa ginanap na SC en banc nitong Martes, Hunyo 14 ay sumailalim na sa self-quarantine at nakatakdang i-test matapos ang incubation period mula sa pagkakaroon ng exposure sa may COVID-19. Sa ngayon, sinabi pa ng SC PIO wala namang kinakikitaan sa mga ito ng mga sintomas.