Mag-ate na edad 15 at 4, magkayakap na nasunog sa bahay

ni Lolet Abania | August 27, 2021

Patay ang dalawang batang babae matapos na ma-trap sa nasunog nilang bahay sa Barangay Manggagawa, Guinayangan, Quezon ngayong Biyernes.

Sa report ng Bureau of Fire Protection (BFP) ng Guinayangan, sumiklab ang apoy pasado ala-1:00 ng madaling-araw ngayong Biyernes, kung saan umabot sa 39 kabahayan ang natupok habang tinatayang nasa 50 pamilya ang apektado ng sunog.

Itinaas naman sa ikalawang alarma ang sunog habang kinailangan pa ang tulong ng ibang mga bumbero sa karatig-bayan para tuluyang maapula ang apoy.

Kinilala ng BFP ang mga nasawi na sina Michaela Avellanosa, 15-anyos at Melissa Joy Dela Cruz, 4-anyos.

Paliwanag ng ina ni Melissa na si Imelda, iniiwan nilang mag-asawa sa bahay sina Melissa at Michaela para manguha ng isda sa bayan ng Calauag. Araw-araw umano nila itong ginagawa dahil sa kanilang hanapbuhay.

Nakuha ang bangkay ng dalawang bata na magkayakap pa sa bahagi ng kuwarto kung saan sila natutulog.

Ayon naman sa ina ni Michaela na si Marissa, sinubukan pa niyang iligtas ang mga bata subalit mabilis na kumalat ang apoy, kung saan nasugatan ang braso nito matapos na mapaso.

Patuloy ang imbestigasyon ng BFP para tukuyin ang naging dahilan ng sunog. Tinatayang nasa P800,000 ang halaga ng napinsala dahil sa sunog.

Agad namang nagpaabot ng tulong sina Guinayangan Mayor Cesar Isaac at ang tanggapan ni Representative Angelina Tan ng Quezon province.

1 nadale sa gas explosion sa Taguig

ni Ronalyn Seminiano Reonico | August 12, 2021

Nagtamo ng 3rd degree burn ang isang 35-anyos na lalaki matapos sumiklab ang sunog sa MJ Fort Construction sa Bonifacio Global City sa Taguig noong Miyerkules nang gabi, ayon sa Bureau of Fire Protection (BFP).

Ayon sa BFP, kaagad na isinugod sa St. Luke's Medical Center ang biktima.

Bandang alas-7:30 PM tinatayang nagsimula ang sunog at idineklara namang fire out na bandang 9:35 PM.

Saad ni Taguig City Mayor Lino Cayetano, "Initially po, ang inire-report po sa atin ay mukhang noong nagdi-drill po, may tinamaan na gas pipe, so hindi po siya gas leak, gas explosion. May nag-trigger po.

"Habang nagdi-drill, may tinamaan, may naamoy and then later on, noong lumapit ang isang safety officer, doon po nangyari ang explosion.”

Wala naman umanong iba pang establisimyentong nadamay sa sunog.

Mag-utol na 11 at 18, patay sa kandila

ni Lolet Abania | August 1, 2021

Nasawi ang magkapatid na babae matapos na ma-trap sa nasusunog nilang tirahan sa Matnog, Sorsogon nitong Sabado nang gabi.

Ayon sa mga awtoridad, ang magkapatid ay nasa edad 18 at 11 na namatay habang sugatan ang kanilang nanay nang masunog ang kanilang bahay sa Barangay Tablac ng nasabing lugar.

Sa imbestigasyon ng Bureau of Fire Protection (BFP) ng Matnog, Sorsogon, mabilis na sumiklab ang apoy malapit sa main door ng bahay kaya hindi agad nakalabas at na-trap ang magkapatid sa loob.

Sinabi pa ng BFP, maaaring dahil sa nakasinding kandila na nakalagay malapit sa mga nakahilerang galon ng gasolina sa kusina ng bahay ang naging sanhi ng sunog.

“Ang nangyari po, parang nagsalin ng gasolina ‘yung nanay. Tapos parang natalsikan ‘yung kandila, kaya nagkaroon ng explosion,” ani Senior Fire Officer 2 Ronnie Anonuevo ng BFP-Matnog. Gayundin, apat na bahay pa ang nadamay sa nangyaring sunog.