Mag-ina na-trap sa sunog, patay

ni Lolet Abania | February 9, 2022

Patay ang mag-ina matapos na ma-trap sa nasusunog nilang bahay sa Quezon City, ngayong Miyerkules ng madaling-araw.

Ayon sa Bureau of Fire Protection (BFP), sumiklab ang sunog bandang alas-5:00 ng madaling-araw sa unang palapag ng bahay ng mga biktima sa 11th St. corner Victoria St., Barangay Mariana, Quezon City.

Hindi na nakalabas ng kuwarto na nasa ikalawang palapag ng bahay ang 67-anyos na nanay at 42-anyos na anak niyang babae.

Nakaligtas naman ang kasambahay ng mga biktima nang makalabas ito mula sa nasusunog na bahay.

Natupok din ang dalawang nakaparadang sasakyan ng mga ito. Itinaas naman sa unang alarma ang sunog habang naapula ang apoy ng alas-6:20 ng umaga, ayon pa sa BFP.

Patuloy na inaalam ng BFP ang dahilan at halaga ng pinsala matapos ang sunog.

P200K ari-arian natupok, 1 patay sa sunog — BFP

ni Lolet Abania | January 23, 2022

Patay ang isang residente matapos sumiklab ang sunog sa isang bahay sa Parañaque City, kagabi.

Ayon sa Bureau of Fire Protection (BFP), nagsimula ang sunog sa ground floor ng dalawang palapag na tirahan sa Multinational Village, Barangay Moonwalk, Parañaque, kung saan agad na rumesponde ang mga bumbero ng alas-10:50 ng gabi nitong Sabado.

Naapula naman ang apoy bandang alas-11:29 ng gabi, habang hindi pa matukoy ng mga awtoridad ang pagkakakilanlan ng nasawi sa sunog.

Sinabi naman ng BFP na nasa tinatayang P200,000 ang halaga ng ari-ariang natupok dahil sa sunog.

Inaalam na rin ng BFP ang naging sanhi at pinagmulan ng sunog.

4 bumbero at volunteer, nasugatan.. P100 M ari-arian, naabo sa Starmall fire

ni Lolet Abania | January 9, 2022

Umabot sa 15 oras ang sunog sa Starmall Alabang nitong Sabado, bago idineklara ng mga bumberong under control ang apoy, kung saan apat sa kanila at isang fire volunteer ang nasugatan, ayon sa mga awtoridad.

Sa ulat ng Bureau of Fire Protection ngayong Linggo, tinatayang nasa P100 milyong ari-arian ang napinsala sa sunog. Itinaas sa ika-5 alarma ang sunog ng alas-7:13 ng umaga habang na-upgrade pa ito sa Task Force Alpha ng alas-7:46 ng umaga.

Batay sa report ng mga fire investigators, nagsimula ang apoy mula sa lower ground level ng 4-story commercial building. Nasa 226 fire trucks at siyam na mga ambulansiya mula sa BFP at volunteers ang agad na rumesponde hanggang alas-5:05 ng hapon, kahapon.

Kinilala ang mga nasugatan sa sunog na sina Supt Crossib C. Cante (mild difficulty of breathing), SFO2 Joel Silin (bruises on both legs), FO2 Delfin Tanggana (bruises at left hand), FO2 Leonardo Oraye (light headedness), at ang fire volunteer na si Arthur San Benito (left thumb laceration).

Patuloy na inapula ng mga bumbero ang sunog hanggang sa idineklarang under control ito ng alas-7:03 ng gabi, kung saan inabot na ng 15-oras.

Wala pang inilalabas na official statement ang pamunuan ng Starmall Alabang hinggil sa naganap na insidente.