150 pamilya nawalan ng tirahan, 2 nadale sa sunog

ni Lolet Abania | June 20, 2022

Dalawa ang nasaktan habang 150 pamilya ang nawalan ng tirahan matapos sumiklab ang sunog sa Parañaque City, bago mag-madaling-araw ngayong Lunes. Nasa tinatayang 80 bahay ang natupok sa Valley 6 sa Barangay San Isidro.

Nagsimula ang sunog bandang ala-1:00 ng hatinggabi na umabot sa ikaapat na alarma. Ayon sa Bureau of Fire Protection (BFP), nahirapan silang pasukin ang lugar dahil sa makitid na kalsada, may konstruksyon sa oras na iyon, habang malayo ang lokasyon ng fire hydrant.

Batay pa sa BFP, ang mga kabahayan ay makakadikit at gawa rin sa mga light materials. Nagtulung-tulong naman ang mga residente para apulahin ang sunog, kung saan kumuha sila ng tubig mula sa isang drainage system na kasalukuyang isinasagawa.

Nagsimula ang sunog habang karamihan sa mga residente ay natutulog na. Ilan sa kanila ang hindi na rin nasagip ang kanilang mga kagamitan. Apektado rin ng sunog ang isang bakery na pag-aari ng isa sa mga residente.

Ayon pa sa BFP, tinatayang aabot sa P600,000 ang mga ari-ariang napinsala. Alas-2:22 ng madaling-araw idineklarang ng BFP na under control na ang sunog, habang fire out naman pasado alas-4:00 ng madaling-araw.

Pansamantalang nanuluyan ang mga apektadong residente sa isang covered court ng barangay. Patuloy na iniimbestigahan ng BFP ang naging sanhi at pinagmulan ng sunog.

Bagong renovate na Metropolitan Theater, nasunog

ni Lolet Abania | June 17, 2022

Sumiklab ang sunog sa isang bahagi ng bagong na-renovate na Manila Metropolitan Theater sa Manila ngayong Biyernes ng umaga.

Sa isang statement sa Facebook, ayon sa MET, nagsimula ang sunog sa isang kuwarto sa unang palapag ng kanilang Padre Burgos Wing na kasalukuyang nire-renovate.

“Hindi na kumalat pa ang sunog sa ibang bahagi ng complex o ng Tanghalan, at tuluyang naapula ng pasado alas-9 ng umaga,” pahayag ng pamunuan ng teatro.

Batay sa spot report ng Bureau of Fire Protection (BFP), ang sunog na itinaas sa ikalawang alarma, ay idineklarang under control ng alas-9:23 ng umaga habang fire out ng alas-9:41 ng umaga.

Ayon pa sa Metropolitan Theater, wala namang nasaktan sa insidente, at wala ring mahahalagang bagay ang nasira at nadamay matapos ang sunog.

Palengke sa Ipil, Zamboanga Sibugay, natupok

ni Lolet Abania | June 11, 2022

Tinupok ng sunog ang isang pangunahing palengke sa bayan ng Ipil sa Zamboanga Sibugay, nitong Biyernes ng gabi, na umabot sa halagang mahigit P16 milyon ang inisyal na pinsala nito, batay sa ulat.

Agad na nagpatawag ng pulong ang lokal na pamahalaan ng Ipil ngayong Sabado upang talakayin ang naging pinsala matapos ang sunog sa Barangay Don Andres.

Ayon sa isang report na isinumite sa lokal na gobyerno ni Municipal Fire Marshall Inspector Percival Alar, nasa tinatayang 90 porsiyento ng main public market ng munisipalidad ang naabo.

Sinabi naman ni Alar na ang tinatayang halaga ng pinsala ay maaaring pang tumaas dahil sa naka-pending na mga affidavit ng mga lessors sa naturang lugar.

Tinatingnan naman ng mga imbestigador ang pagkakaroon ng electricity overload na posibleng isa sa mga dahilan ng sunog.

Ayon pa kay Alar, ito na ang ikatlong beses na ang naturang palengke ay nasunog noong 2020. Tinalakay din ng mga lokal na opisyal ang posibleng assistance na kanilang ibibigay sa mga apektadong vendors sa lugar.