Yokohama F Marinos sa 2-1 panalo ng AFC Cup Rnd 2

ni Anthony E. Servinio @Sports | November 9, 2023

Tatlong minuto na lang bago maitala ng Kaya FC Iloilo ang tabla ay naagaw ng bisitang Yokohama F Marinos ang 2-1 panalo sa simula ng Round 2 ng 2023-2024 AFC Champions League Martes. Ipinasok ni reserba Yan Matheus Souza ang bola sa ika-87 minuto at biglang tumahimik ang Rizal Memorial Stadium.

Kinuha ng Marinos ang pagkakataon na kulang ng isang tao ang Kaya matapos palabasin si Robert Lopez Mendy sa ika-85 matapos niyang patirin galing likod ang kanyang binabantayan. Pinanood muli ng reperi ang video bago patawan ng red card ang Kaya forward.

Nagawang pantayin sa 1-1 ng Kaya ang laban sa goal ng tubong Kanagawa, Japan Daizo Horikoshi sa ika-39. Nahanap ni Ricardo Sendra ang tumatakbong si Horikoshi na harapang isinipa ang bola kay goalkeeper Hiroki Iikura.

Nakaunang goal si Yuhi Murakami sa ika-26. Wagi din ang Marinos sa una nilang tapatan, 3-0, noong Oktubre 25 sa Nissan Stadium. Sa gitna ng pagkabigo, ipinagmamalaki pa rin ni Kaya coach Colum Curtis ang ipinakita ng koponan. Nakakahinayang lang at hindi inasahan ang red card kay Mendy.

Sa isa pang laro sa Grupo G, tinalo ng Shandong Taishan ang bisita Incheon United, 3-1. Bunga ng resulta, tabla ang Marinos at Shandong sa liderato na may 9 na puntos galing tatlong panalo at isang talo, pangatlo ang Incheon na may anim at walang puntos pa rin ang Kaya.

Susunod para sa Kaya ang pagdalaw sa Shandong sa Nobyembre 28. Tatapusin nila ang kampanya sa pagbisita ng Incheon sa Disyembre 13.

T'wolves binalahibuhan ang Celtics, Nuggets top scorer

ni Anthony E. Servinio @Sports | November 8, 2023

Wala nang perpektong koponan sa NBA at tinalo ng Minnesota Timberwolves ang Boston Celtics sa overtime, 114-109, kahapon sa Target Center. Dahil dito, naagaw ng World Champion Denver Nuggets ang pinakamataas na kartada sa bisa ng 134-116 tagumpay sa New Orleans Pelicans.

Bumida sa overtime si Anthony Edwards sa anim na magkasunod na puntos para sa matatag na 112-105 lamang at 1:30 sa orasan. Nagtapos si Edwards na may 38 habang may 20 si Jaden McDaniels kasama ang tres na nagtakda ng dagdag 5 minuto, 101-101.

Third quarter pa lang ay triple double si Nikola Jokic at nagtapos na may 35 puntos, 14 rebound at 12 assist. Umakyat ang Nuggets sa 7-1, kalahating laro ang lamang sa 6-1 Dallas Mavericks at isa sa 5-1 Boston at Philadelphia 76ers.

Pinatunayang muli ni Joel Embiid ng 76ers kung bakit siya ang MVP at bumanat ng 48 puntos at 11 rebound sa 30 minuto lang sa 146-128 tambak sa Washington Wizards. Wagi ang Mavs sa Orlando Magic, 117-102 sa 29 ni Luka Doncic.

Naabot ni Coach Rick Carlisle ang ika-900 tagumpay sa kanyang karera sa 152-111 pagbaon ng Indiana Pacers sa San Antonio Spurs sa likod ng 23 puntos ni Tyrese Haliburton. Nagkataon na nagawa niya ito kontra sa may pinakamarami na si Coach Gregg Popovich na may 1,369.

Kahit hindi pumuntos sa huling 3:50 ay nailusot pa ng Miami Heat ang 108-107 tagumpay sa Los Angeles Lakers. May pagkakataon ang Lakers subalit nagmintis si Cam Reddish sabay ubos ng oras. Halimaw si Bam Adebayo na nagtala ng 22 puntos, 20 rebound at 10 assist. Malayo pa kay #14 Coach Carlisle, ito ang ika-707 ni kabayan Coach Erik Spoelstra at tabla na siya kay Coach John McLeod sa #19 sa listahan.

Stallion Laguna pakay ang first win sa AFC Cup Round 2

ni Anthony E. Servinio @Sports | November 8, 2023

Laro ngayong Miyerkules – Binan Stadium

4 p.m. Stallion Laguna vs. Terennganu

Umaasa ang Stallion Laguna na ang paglalaro sa sariling tahanan na Binan Stadium ang magtutulak sa kanila sa unang panalo sa simula ng Round 2 ng 2023-2024 AFC Cup Group Stage. Haharapin nila muli ang Terengganu, ang parehong koponan na umukit ng 2-2 tabla noong kanilang unang pagkikita noong Oktubre 26 sa Malaysia, simula 4 p.m.

Umarangkada agad ang Stallion, 2-0, sa mga goal nina Griffin McDaniel (6’) at Junior Sam (41’). Biglang nakalusot ng isa si Sonny Norde upang lumapit bago magwakas ang first half at kinumpleto ng Adisak Kraisom ang pagbangon ng Terengganu sa panablang goal sa ika-91 at bago wakasan ng reperi ang laro.

Kahit mapait ang kinalabasan, nakita ng Stallion na kaya nilang sabayan ang beteranong kalaro. Ito ang unang sabak ng mga Pinoy sa prestihiyosong torneo habang ito na ang pangatlong beses na kasali ang Terengganu.

Kasalukuyang nasa ilalim ng Grupo G ang Stallion na may isang puntos mula isang tabla at dalawang talo. Numero uno ang Central Coast Mariners ng Australia na may 6 puntos at sinusundan ng Terengganu na may lima at Bali United ng Indonesia na may 4 na puntos.

Samantala, hahanapin ng Dynamic Herb Cebu ang ikalawang panalo sa Grupo F sa pagdalaw sa Shan United ngayong Huwebes. Nanalo ang Gentle Giants sa kampeon ng Myanmar National League, 1-0, noong Oktubre 26 din sa Rizal Memorial Stadium salamat sa goal ni Ken Murayama.

Hawak ng Phnom Penh Crown ng Cambodia ang liderato ng grupo na may malinis na 9 na puntos mula tatlong tagumpay. Pangalawa ang MacArthur FC ng Australia na may anim at Cebu na may tatlo habang 8 puntos ang Shan.