Dimaculangan umatake, sosyo na sa Crossovers

ni GA @Sports | November 3, 2023

Mga laro sa Sabado

(Philsports Arena)

2:00 n.h. – Farm Fresh vs Cignal

4:00 n.h. – Gerflor vs PLDT

6:00 n.g. – Petro Gazz vs Chery Tiggo

Hindi ininda ng PLDT High Speed Hitters ang pagkatalo sa unang set upang sunod-sunod na rumatsada patungo sa 4th set panalo kontra NXLed Chameleons, 22-25, 25-17, 25-11, 25-20, kahapon sa unang sultada ng triple-header matches ng 6th Premier Volleyball League (PVL) 2nd All-Filipino Conference sa Santa Rosa Sports Complex sa Laguna.

Mahusay na pagmamando sa opensa ang ipinakita ni ace playmaker Rhea Dimaculangan upang dalhin sa ikatlong panalo ang Speed Hitters na nagpamahagi ng 20 excellent sets para pangunahan ang pagbibigay ng 67 atake na nakasosyo sa 3-1 kartada sa Chery Tiggo Crossovers sa third spot.

“Mabilis lang kami nakapag-adjust kase first set slow start kami, [then] yung second set naka-revover kami at nakuha namin yung rhythm,” wika ng 32-anyos na Batanguena. “Nahirapan kami kase ang galing nilang dumepensa, kaya dumiskarte na lang kami and remain 'yung composure para makuha namin kung anong gagawin sa depensa at opensa. Importante kase bawat game kaya focus kaming maabot yung goal namin,” dagdag ng multiple titlist setter.

Bumida sa scoring si Filipino-Canadian Savannah Dawn Davison sa 21pts habang sumegunda si Erika Mae Santos sa 17pts. Rumehistro ng double-double sa opensa at depensa sina Honey Royse Tubino sa 13pts at floor defender Kath Arado sa 18 excellent digs na sunod na makakatapat ang Quezon City Gerflor Defenders sa Sabado.

Matapos magkulang sa first set ay kumarga ng husto sa opensa ang PLDT sa second at third set ng lumista ng 16 at 17 sa atake para makatakas sa pagbabanta ng NXLed higit na sa huling yugto ng 4th set na sinubukang humabol. Nagsilbing nag-iisang liwanag para sa NXLed si Lycha Ebon na bumira ng double digit sa 11pts.

Nat'l Women's Booters binigo ang Iran, pero bitin sa Olympics

ni Anthony E. Servinio @Sports | November 3, 2023

Winakasan ng Philippine Women’s Football National Team ang kanilang kampanya patungong Paris 2024 Olympics sa 1-0 panalo kontra Iran Miyerkules sa Perth Rectangular Stadium ng Kanlurang Australia. Bitin ang tagumpay at hindi nakisama ang tadhana sa Filipinas matapos dumating ang resulta ng mga nalalabing laban.

Itinapik palayo ni Iran goalkeeper Zahra Khajavi ang bola patungo sa naghihintay na kapitana Tahnai Annis na hindi nag-aksaya ng panahon na malakas sipain ito pabalik para sa nag-iisang goal sa ika-19 minuto. Hindi nagawan ng solusyon ng Pilipinas ang mahigpit na depensa sa kanilang layunin na tambakan ang mga Iranian upang mabura ang epekto ng 0-8 talo sa host Australia noong Linggo.

Nakamit ng Australia ang isang tiket sa Round 3 matapos manaig sa Chinese-Taipei, 3-0, at maging numero uno sa Grupo A na may 9 na puntos at pangalawa ang mga Pinay na may anim. Lumaki ang pag-asa ng Filipinas nang magtabla ng 1-1 ang Timog Korea at Tsina at nagtapos na may 5 puntos lang ang mga Koreana sa Grupo B.

Dahil dito, nakasalalay ang tiket ng Filipinas sa huling laro ng torneo sa pagitan ng Uzbekistan at India sa Grupo C. Subalit madaling iniligpit ng mga Uzbek ang kalaban, 3-0, upang tumbasan ang anim na puntos ng mga Pinay at maagaw ang tiket dahil mas mataas ang kanilang kabuuang inilamang sa tatlong laro na +2 kumpara sa -4.

Ang Round 3 ay kabibilangan ng Australia, Japan, Hilagang Korea at Uzbekistan sa Pebrero, 2024. Magkakaroon ng dalawang hiwalay na serye na paramihan ng goal sa dalawang laro at ang dalawang magwawagi ay tutuloy sa Olympics.

Mavs at Celtics perpekto pa, Clarkson at Green, sakalam

ni Anthony E. Servinio @Sports | November 3, 2023

Dalawang koponan na lang ang nananatiling walang bahid sa taas ng NBA matapos umukit ng magkaibang ika-apat na panalo ang Dallas Mavericks at Boston Celtics kahapon. Bumida rin sina kabayan Jordan Clarkson at Jalen Green para maghatid ng tagumpay sa Utah Jazz at Houston Rockets.

Humataw ang Mavs sa huling 6 na minuto upang baliktarin ang 96-94 lamang ng Chicago Bulls sa 114-105 panalo. Nagtala ng pito ng kanyang 24 puntos sa 4th quarter si Tim Hardaway Jr. Ibinaon ng Celtics ang Indiana Pacers, 155-104, kung saan 9 na magkakampi ang nagtala ng 10 o higit na puntos. Nanguna si Jayson Tatum na may 30 at 12 rebound.

Bumanat ng 20 puntos at hindi na ginamit sa 4th quarter si Clarkson sa 133-109 pagpisa sa walang panalong Memphis Grizzlies. Natamasa ng Rockets ang unang panalo sa apat na laro ngayong taon at nagsumite si Green ng 23 puntos para mapigil ang bisitaNG Charlotte Hornets, 128-119.

Pinatikim ng Minnesota Timberwolves ang unang pagkabigo sa World Champion Denver Nuggets, 110-89. Bumida ang mga beterano ng 2023 FIBA World Cup Anthony Edwards na may 24 at Karl-Anthony Towns na may 21 puntos at lamang sila sa buong 48 minuto.

Sa ibang laro, bumira mula 17 talampakan NA may 2 segundong nalalabi si Klay Thompson upang ipanalo ang Golden State Warriors sa Sacramento Kings, 102-101. Gumawa ng 21 si Stephen Curry at apat na sunod na ang Warriors para sa kartadang 4-1.

Kinailangan ng Los Angeles Lakers ang overtime upang masugpo ang LA Clippers, 130-125. Sumandal ang Lakers sa 2 free throws ni Austin Reaves at dunk ni Christian Wood sa huling minuto. Naghari muli si LeBron James na may 35 puntos at 11 rebound. Hindi muna pinalaro ng Clippers ang kanilang bagong kakamping si James Harden.