Celtics naka-5 na, Tatum espesyal sa 10,000 points

ni Anthony E. Servinio @Sports | November 6, 2023

Nag-iisa sa taas ng NBA ang Boston Celtics matapos talunin ang Brooklyn Nets, 124-114, kahapon sa Barclays Center. Ito na ang ika-lima ng Celtics at naging espesyal ang gabi para kay Jayson Tatum na itinala ang ika-10,000 puntos sa kanyang 7 taong karera.

Inabot ng 25-anyos na si Tatum ang marka sa 3-point play sa 2nd quarter na kanyang ika-16. Humataw ng todo ang Boston sa 2nd half at nagtapos siya na may 32 puntos at 11 rebound. Ang World Champion Denver Nuggets ang unang koponan na umabot ng anim na panalo nang manaig sa Chicago Bulls, 123-101. Kinapos si Nikola Jokic ng isang assist para sa triple double pero may 28 at 16 rebound.

Napigil ng Charlotte Hornets ang huling habol ng Indiana Pacers, 125-124. Sumandal ang Hornets sa siyam ng kabuuang 27 puntos ni sentro Mark Williams sa 4th quarter. Tinambakan ng bisitang Atlanta Hawks ang New Orleans Pelicans, 123-105, upang umakyat sa 4-2. Bumanat ng 22 puntos at namigay ng 12 assist si Trae Young.

Hindi pinalad si kabayan Jordan Clarkson at Utah Jazz at tinambakan ng Minnesota Timberwolves, 123-95. Walang solusyon para kay Anthony Edwards na nagsabog ng 31 puntos. Dalawang panalo na ang Houston Rockets at dinurog ang Sacramento Kings, 107-89. Bumida ng paboritong kontrabida ng 2023 FIBA World Cup Dillon Brooks na nagtala ng 26 puntos.

Nakaganti ang Orlando Magic sa Los Angeles Lakers, 120-101. Anim na Magic ang gumawa ng 10 o higit sa pangunguna ni Franz Wagner na may 26 at Paolo Banchero na may 25. Sa maagang laro, umarangkada ang Philadelphia 76ers sa ika-apat na sunod laban sa Phoenix Suns, 112-106. Double-double si MVP Joel Embiid na 26 at 11 rebound.

6-year old baby Aielle, 2-time world champion

ni MC @Sports | November 5, 2023

Noong nakaraang taon lang, ang Pinay na jiujiteira na si Aleia Aielle Aguilar ang pinakabatang naging world champion sa combat sports na kung saan kilala ang kanyang buong pamilya sa naturang sport.

Noong Huwebes, ang 6- na taong gulang na anak nina Alvin Aguilar- ang founding father ng Filipino mixed martial arts at Maybelline Masuda ay nanatiling may hawak ng korona para sa ikalawang sunod na world title sa 2023 Abu Dhabi World Festival Jiu-Jitsu Championships sa Mubadala Arena sa United Arab Emirates.

Dahil sa karanasan ni baby Aguilar tinalo niya si United Arab Emirates bet Maitha Earani at napabagsak niya sa armbar maneuvering sa loob ng 12 segundo para sa gold medal ng Girls Kids 2 white belt 17 kg category.

“Great to see my daughter fighting and representing the flag this time. Her hard work, discipline have finally paid off in training all these years,” ani Aguilar. “Last year, I didn’t see it live, so I am happy and we’re all very proud of you for making another historic moment for the Philippines.”

Tinalo niya si Brazilian Gabriella Kulzer, 4-1 sa semifinal round. Idinagdag ng amang si Aguilar na hindi kumurap ang kanyang anak sa harap ng kalaban tuwing susugod ito.

“She is always ready every time they move, every time they try to something on the mat. She is fearless,” paglalarawan niya.

Sinaksihan nina Alvin, misis niyang si Masuda at anak na sina Lucho at Axelia ang great performance ng kanilang little cute daughter na si Aleia Aielle na ibinalabal ang bandila ng Pilipinas sa kanyang balikat matapos ang matamis na panalo.

Dumating si Aguilar, pangulo ng Wrestling Association of the Philippines, founding head ng Universal Reality Combat Championship at DEFTAC Philippines sa Abu Dhabi matapos gabayan ang Philippine delegation sa matagumpay na kampanya sa World Combat Sports bilang chef de mission.

Hitters at Spikers wagi kontra Gerflor at Foxies

ni GA @Sports | November 5, 2023

Mga laro sa Martes

(Philsports Arena)

2 n.h. – NXLed vs Choco Mucho

4 n.h. – Farm Fresh vs F2 Logistics

6 n.g. – Galeries vs Cignal

Parehong nagtala ng panalo ang mag-utol na PLDT High Speed Hitters at Cignal HD Spikers nang kapwa talunin ang mga katunggaling Quezon City Gerflor Defenders sa straight set 25-8, 25-9, 25-17 sa ikalawang laro at Farm Fresh Foxies sa 25-23, 23-25, 25-20, 25-17 sa unang laro ng triple-header matches kahapon sa 6th Premier Volleyball League (PVL) Second All-Filipino Conference sa Philsports Arena sa Pasig City.

Sobrang linaw ng koneksyon at serbisyo ang ipinakita ng PLDT High Speed Hitters upang itala ang kanilang ika-apat na sunod na panalo mula sa mahusay na pamumuno ni ace playmaker Rhea Dimaculangan nang mamahagi ito ng kabuuang 18 excellent sets kasama ang 3 puntos mula lahat sa service aces upang balanseng mabigyan ng puntos ang mga kakampi na pinangunahan ni Jules Samonte sa 10pts mula sa pitong atake at tatlong aces, habang parehong tala rin ang nairehistro ni Rachel Anne Austero sa 10pts, habang pansamantalang nagbigay-daan sa scoring si Filipino-Canadian Savannah Davision sa 9 puntos mula sa 7 atake at limang excellent receptions.

“Regardless naman kung sino yung kalaro, basta nako-control namin, para lang ma-manage yung minutes ng starters, alam naman nila 'yung sa training, alam namang kayang gawin at nagperform,” pahayag ni PLDT head coach Rald Ricafort.

Walang manlalarong umabot sa double-digit para sa Gerflor na pinagsosyohan sa tig-apat na puntos nina Danika Gendrauli, Jeanette Villareal at Mary Grace Berte.

Nagbunga ang paghihirap sa pagsasanay ni Ria Meneses upang maging isa sa sinandalan ng Cignal ng humambalos ang 6-foot-1 middle blocker ng 16 puntos mula sa 13 atake, 2 blocks at isang ace para madala sa 3-2 kartada ang Cignal.