#SquidGame: Pinoy actor na si Player 276, ibinahagi ang kanyang mga karanasan sa serye

ni Jasmin Joy Evangelista | October 8, 2021

Ikinuwento ng South Korea-based Filipino actor na si Christian Lagahit ang ilan sa kanyang mga hindi malilimutang karanasan sa pagiging parte niya ng sikat na serye na "Squid Game."

Lumabas ang karakter ni Lagahit sa episode 4 ng serye.

Sa isang panayam, ikinuwento niya kung paano siyang na-inspire sa isa sa mga bida ng serye na si Park Hae-soo para magampanan niya nang mahusay ang kanyang karakter bilang si Player 276.

“Medyo awkward po ako ng first two days ko. Kasi ang alam ko lang po talaga ay three days lang 'yung character ko. So nagulat lang po ako ng first two days, nandoon na, 'yung na-starstruck ka. Parang hesitant ka to approach them, kasi bago ka sa set... But then sila na po mismo 'yung lumalapit," aniya.

“Like si Park Hae-soo, na-notice niya ako na medyo awkward ako sa set kasi literal na parang dumidistansiya ako sa kanila. Sila na mismo ang nag-approach... Sinabihan niya ako na, 'Don't feel alone, you are part of this team. Don't think of your role as a small role.'"

"Noong sinabi niya 'yung mga katagang 'yon, parang doon ako na-energize, doon ako nagkaroon ng lakas ng loob na, 'Okay, makiki- mingle ako sa kanila.' And the rest was history."

Aniya, hindi ang Player 276 ang kanyang target na karakter.

Nabigyan daw siya noon ng pagkakataon na mag-audition para sa karakter ni Ali.

"To be honest, I was given the opportunity to audition for the role of Ali, which is played by my dear friend. Noong 2019, nagkaroon din po ako ng full-length drama, so napabilang ako as one of the cast. From there, siguro nakitaan nila ng potential," aniya.

“Then umuwi kasi ako ng 2020, so parang nagkaroon ng things to do with the schedules. So pagbalik ko ng Korea after my break sa Philippines, parang naibigay na 'yung role sa iba. Then sabi ko, okay lang. Halfway ng last year, tumawag sa akin ang manager ko, parang sinasabi niya 'yung production bibigyan ka ng special appearance o special role, then 'yun na nga po ang Player 276," paliwanag ng Pinoy na aktor.

Ibinahagi rin ni Lagahit na taong 2015 nang magtungo siya sa South Korea at nagsimulang mag-backing actor noong 2016.

Noon na rin siya nagsimulang magtungo sa mga casting call at audition.

Noong 2017 ay naging parte siya ng South Korean film na "The Negotiation" na pinagbibidahan nina Hyun Bin at Son Ye-jin at hanggang sa ngayon ay tuluy-tuloy na ang kanyang karera sa pag-arte sa South Korea.

Bukod sa pagiging aktor, si Lagahit ay isang data analyst at presidente ng isang Filipino community sa South Korea.

SoKor, bibigyan ng 7.01M doses ng Moderna

ni Ronalyn Seminiano Reonico | August 23, 2021

Bibigyan ng 7.01 million doses ng bakuna kontra COVID-19 ng Moderna ang South Korea simula sa unang linggo ng Setyembre, ayon sa health ministry ng naturang bansa.

Inaasahang darating na sa Lunes ang 1.01 million doses ng Moderna sa Incheon Airport, South Korea, ayon sa ministry nito at ang natitirang 6 million ay paunti-unting isusuplay sa bansa.

Saad pa ni Second Vice Health Minister Kang Do-tae, "In response to our request to speed up and expand the vaccine supply, Moderna informed us that it will supply 7.01 million doses by the first week of September."

Samantala, noong Sabado, umabot na sa 50.4% ng populasyon ng South Korea ang nakatanggap ng unang dose ng bakuna at 22.5% naman ang fully vaccinated na laban sa COVID-19.

Nakapagtala rin ang South Korea ng 1,628 bagong kaso ng COVID-19 noong Sabado at sa kabuuang bilang ay umabot na ito sa 236,366. Pumalo na rin sa 2,215 ang death toll sa bansa.

Israel at South Korea, magpapalitan ng COVID vacccines

ni Lolet Abania | July 6, 2021

Napagkasunduan ng Israel at ng South Korea na magpalitan ng mga doses ng COVID-19 vaccines para sa kanilang mga mamamayan bilang proteksiyon laban sa naturang virus.

Magde-deliver ng nasa 700,000 doses ng Pfizer-BioNTech COVID-19 vaccine ang Israel sa South Korea sa huling linggo ng Hulyo, habang ibabalik naman ng South Korea sa Israel ang pareho ring bilang ng bakuna na kanila nang na-order mula sa Pfizer sa Setyembre at Oktubre.

Ang mga COVD-19 vaccines ay agad naipapamahagi ng South Korea sa kanilang mga kababayan, subalit nahihirapan silang makakuha ng sapat na doses sa tamang panahon sa gitna ng kakulangan sa global supplies nito, partikular na sa Asia.

“This is a win-win deal,” ani Israeli Prime Minister Naftali Bennett sa isang statement ngayong Martes.

“Together we will beat the pandemic,” saad pa ni Bennett.

Matapos ang agarang pagbabakuna kontra-COVID-19, nakapag-administer na ang Israel ng dalawang shots ng vaccine sa tinatayang 55 percent ng kanilang populasyon at nakitaan agad ng pagbaba ng kaso ng sakit.

Ayon kay Korea Disease Control and Prevention Agency (KDCA) Director Jeong Eun-kyeong, dahil sa kanilang naging deal, pinayagan ang South Korea na i-accelerate ang kanilang programa sa pagbabakuna, kabilang na ang pagbibigay ng vaccine sa mga empleyado sa ilang sektor na may maraming bilang ng nakakasalamuhang tao.

Sinabi ni Jeong, ang mga local authorities ang nagdedesisyon kung sino ang makakakuha ng vaccines subalit aniya, posible ring mabigyan agad ang mga street cleaners, delivery workers at retail employees.

Sa pahayag ng South Korean authorities noong nakaraang linggo, umaasa silang makakamit ang herd immunity ng mas maaga kumpara sa una nilang target na Nobyembre kung saan mababakunahan ang tinatayang 70 percent ng kanilang populasyon kahit na unang dose pa lamang ng Pfizer ng mRNA ang naibigay sa kanilang mamamayan.

Sinabi pa ni Jeong, sakaling ang kanilang pagbabakuna ay matapos batay sa plano at makakuha pa ang South Korea ng mga surplus doses ng COVID-19 sa huling buwan ng taon habang naibalik na rin ang napagkasunduang doses sa Israel, makapagbibigay din ang kanilang bansa ng mga naipong bakuna kontra-COVID sa ibang bansa.

Bagamat ang South Korea ay walang humpay na nakikipaglaban sa kaunting outbreak lamang, ipinagpaliban pa rin ng mga opisyal ang pagluluwag ng social distancing rules.

Samantala, naireport ng KDCA na nasa 746 ang bilang ng COVID-19 cases ngayong linggo na umabot na sa kabuuang bilang na 161,541, kabilang ang 2,032 nasawi.