Death penalty, hiniling para sa ex-president ng South Korea

by Info @World News | January 14, 2026

Photo: South Korean Ex Pres Yoon Suk-Yeol - BBC

Hiniling ng special prosecutor ng South Korea na patawan ng death penalty ang pinatalsik na dating pangulo ng nasabing bansa na si Yoon Suk-yeol kasabay ng kanyang mga insurrection case dahil sa pagdedeklara ng martial law noong 2024.

Ayon sa Seoul Central District Court, kinumpirma ng kanilang mga imbestigador na nagpakana umano si Yoon at ang dati nitong defense minister na si Kim Yong-hyun ng isang scheme upang mapanatili ang pinatalsik na pangulo sa kapangyarihan na sumira umano sa liberal democratic constitutional order ng kanilang bansa.

“The defendant has not sincerely regretted the crime… or apologized properly to the people,” ayon sa argumento ng prosecutors.

Nakatakdang magdesisyon ang South Korean court sa susunod na buwan.

Korte ng South Korea, sinusuri na ang impeachment ni Yoon

ni Eli San Miguel @Overseas News | Dec. 16, 2024

Photo: Pres. Yoon Suk Yeol / korea.net

Susuriin ng Constitutional Court ng South Korea ang impeachment laban kay Pangulong Yoon Suk Yeol ngayong Lunes kaugnay ng kanyang tangkang pagpapatupad ng martial law noong Disyembre 3, ayon sa isang tagapagsalita.

Lalahok ang lahat ng anim na hukom, at maaaring magpasya ang korte sa loob ng anim na buwan. Posibleng maharap sa insurrection charges si Yoon at ilang matataas na opisyal.

Plano ng mga imbestigador mula sa pulisya, defense ministry, at anti-corruption agency na kuwestyunin si Yoon sa Miyerkules, ayon sa ulat ng Yonhap.

Hindi naman agad makontak ang opisina ng mga imbestigador para sa kumpirmasyon.

Presidente ng SK, nahaharap sa impeachment matapos ang isyu ng martial law

ni Angela Fernando @World News | Dec. 4, 2024

Photo: South Korean President Yoon Suk Yeol sa isang press briefing sa presidential office sa Seoul, South Korea. South Korea Unification Ministry via AP / South Korea Presidential Office

Nanawagan ang mga mambabatas ng South Korea (SK) nitong Miyerkules na magbitiw na sa pwesto si Pres. Yoon Suk Yeol o harapin ang impeachment matapos ang biglaang deklarasyon ng martial law na binawi rin ilang oras lamang ang nakalipas.

Ang nasabing insidente ay nagdulot ng matinding krisis sa politika ng ikaapat na pinakamalaking ekonomiya sa Asya.

Nagpasiklab ito ng tensyon sa pagitan ng pangulo at ng parliament, na agad na tumanggi sa kanyang pagtatangkang ipagbawal ang aktibidad sa pulitika at supilin ang malayang pamamahayag—nagdulot pa ito ng tensyon nang sapilitang pumasok ang mga armadong sundalo sa gusali ng National Assembly sa Seoul.

Ayon sa Democratic Party, anim na oposisyong partido sa South Korea ang nagkasundo na magsumite ng panukalang impeachment laban kay Yoon.

Nakatakda itong pagbotohan sa darating na Biyernes o Sabado.