Galing sa South Africa.. 3 dayuhan, naka-quarantine na sa Negros Occidental

ni Lolet Abania | December 1, 2021

Tatlong biyahero na dumating sa bansa mula sa South Africa noong nakaraang linggo ang kasalukuyang isinailalim sa quarantine sa Negros Occidental.

Ayon sa Negros Occidental provincial government, ang tatlong dayuhan na mga consultants ng isang power firm ng isang probinsiya ay dumating sa bansa ilang araw bago ipatupad sa Pilipinas ang travel ban sa South Africa.

Dumating ang dalawang foreigners sa Ninoy Aquino International Airport (NAIA) noong Nobyembre 24 at lumipad patungong Negros Occidental ng sumunod na araw.

Ang ikatlong foreigner ay dumating naman sa bansa noong Nobyembre 26.

Matatandaang pansamantalang ipinagbawal ng Pilipinas ang inbound international flights na mula sa South Africa, Botswana, at iba pang mga bansa na may local cases o mga hinihinalang may kaso ng Omicron variant, kung saan unang na-detect sa southern Africa. Ang temporary measure ay inanunsiyo ng gabi ng Nobyembre 26.

Inatasan naman ng mga opisyal ng Department of Health (DOH) ng Negros Occidental ang lokal na gobyerno na i-trace ang mga naturang dayuhan.

“We traced them and they were isolated as part of the company’s policy once you arrive from travel abroad, you are not yet allowed to join the work force,” ani Negros Occidental provincial administrator Rayfrando Diaz II.

Ayon kay Diaz, ang tatlong dayuhan ay hindi na lumabas ng kanilang bahay nang dumating ang mga ito sa probinsiya.

“They went directly to their staff houses,” sabi ni Diaz. Gayundin, sinabi ng lokal na gobyerno na ang mga foreigners ay fully vaccinated na kontra- COVID-19 at nakapagbigay ng negative RT-PCR test results bago dumating sa bansa.

“There is no reason for us to fear that a virus has already been transmitted from South Africa to Negros Occidental,” saad ni Diaz.

, ang mga dayuhan ay sasailalim pa rin sa RT-PCR tests sa Huwebes habang nananatili na nasa quarantine. Nagsagawa na rin ang mga awtoridad ng contact tracing.

Sinabi naman ni DOH Secretary Francisco Duque III na kung ang RT-PCR tests ng mga naturang dayuhan ay magpositibo, ang kanilang samples ay ipapadala sa Philippine Genome Center upang madetermina kung tinamaan ang mga ito ng Omicron variant.

Para maiwasan ang posibleng pagkalat ng Omicron variant, ayon sa Bureau of Quarantine (BOQ) tinatayang nasa 63 Pilipino mula sa red list countries o lugar na nasa high risk ng COVID-19 transmission ay ipinasok na rin sa quarantine facilities.

Sinabi naman ng DOH na wala pang naitalang Omicron case sa bansa. “Just to be clear, no detection yet of omicron. We are still processing [the] next batch of whole genome sequences,” ani DOH Undersecretary Maria Rosario Vergeire sa isang mensahe sa mga reporters.

DOH, naghihintay pa sa report ng WHO sa bagong COVID variant

ni Lolet Abania | November 26, 2021

Naghihintay pa ang Department of Health (DOH) ng ipapahayag ng World Health Organization (WHO) hinggil sa bagong coronavirus variant na na-detect sa South Africa na pinaniniwalaang na mas nakahahawa.

Ayon kay DOH director Dr. Beverly Ho ngayong Biyernes, nakatakdang makipagpulong ang WHO ngayong araw at maaaring maglabas ng statement sa hapon o sa Sabado.

“Nagpapa-meeting po ‘yung WHO ngayong araw. Kakalabas lang ng kanilang advisory at malalaman natin later in the day or siguro tomorrow kung ano ‘yung hatol dito,” ani Ho tungkol sa updates ng bagong variant.

Ang B.1.1.529 variant ay nakitaan ng tinatayang 30 mutations kumpara sa dalawa para sa Delta o tatlo para naman sa Beta, at itinuturong dahilan ng pagtaas ng infections sa South Africa.

Ayon sa isang Reuters report, ang daily infections sa South Africa ay tumaas ng mahigit sa 1,200 nitong Miyerkules mula sa 100 noong una ngayong buwan lamang.

Nag-aalala naman ang mga eksperto abroad na ang variant ay maaaring magdulot sa mga bakuna na maging less effective dahil sa taglay nitong spike protein, at kakaiba ito mula sa orihinal na COVID-19, kung saan ang mga bakuna ay nakabase.

Subalit, ayon kay Dr. Edsel Salvana, isang infectious disease expert at miyembro ng DOH-Technical Advisory Group, ang mataas na bilang ng mutations ay hindi nangangahulugan na ang variant ay may mataas na ring transmissibility o resistance sa mga bakuna.

“So while nakakabahala ‘yung presence of certain mutations, hindi automatic na nakakamatay ito o mas natra-transmit o mas bumababa ‘yung epekto ng ating vaccines,” sabi ni Salvana sa Laging Handa briefing.

Tiniyak din ni Salvana sa publiko na ang anti-COVID-19 measures ay nananatiling ipinapatupad sa buong mundo.

“And the fact na na-detect na itong variant na ito at pinag-uusapan na ng WHO, ‘yung UK nga nag-travel ban na sila, it shows na ‘yung ating global genomic surveillance is working,” ani Salvana.

“Hopefully, we can prevent the spread of any new variants that come up,” dagdag pa niya.

Giit pa ni Salvana na ang pagsunod sa minimum health protocols ay nananatiling epektibo laban sa virus, at ang mga COVID-19 vaccines ay nagbibigay pa rin ng proteksiyon laban sa severe COVID-19.

Para sa OCTA Research group, patuloy nilang imo-monitor ang variant na maaaring magdulot ng seryosong isyu.

Kaso ng South Africa variant, naitala, P'que manghuhuli na ng mga pasaway

ni Ronalyn Seminiano Reonico | March 8, 2021

Isang bagong kaso ng South Africa COVID-19 variant ang naitala sa Barangay Baclaran, Parañaque City.

Ayon kay Bgy. Chairman Julius Anthony Zaide sa Facebook Live nito, “Katatapos lang pong mag-usap ng barangay, kapulisan, kasama po ang representative ng city government patungkol sa tumataas na bilang (ng kaso ng COVID-19) dito sa Barangay Baclaran.”

Ayon din kay Zaide, maghihigpit na sila at huhulihin ang mga lalabag sa health protocols.

Aniya, “Now, we’re now at 46 (COVID-19 cases). Sa pag-uusap po kasama ang aming konseho, mga kagawad, ito pong gagawing hakbang na ito, maghihigpit po ang Barangay Baclaran.

“No exemption na po. Sa lahat po ng bata na 15 pababa, pasensiya na po, huhulihin po namin ang dapat hulihin. Sa lahat po ng walang face mask, pasensiyahan na po.”

Saad pa ni Zaide, “Dito po ‘yung nagpositibo sa African variant kaya ngayon, inaalam na po ng city government at ng barangay kung sinu-sino po ‘yung mga nakasalamuha niya.”