Teaching supplies allowance ng mga guro, mas tumaas at permanente na

ni Sonny Angara @Agarang Solusyon | June 15, 2024

Dlawang linggo na ang nakararaan nang personal nating masaksihan ang paglagda at tuluyang pagsasabatas ni Pangulong Bongbong Marcos, Jr. sa Kabalikat sa Pagtuturo Act na naging daan upang maging permanente na ang teaching supplies allowance ng ating mga guro sa public schools.

Dating tinatawag na “chalk allowance”, ang pondo para sa supplies allowance ng mga guro ay magmumula sa budget ng Department of Education. Ito ay tulong pinansyal sa mga teacher para hindi na sila gumamit ng sarili nilang pera para makabili lamang ng mga gamit sa pagtuturo tulad ng papel, ballpen at chalk. Ang nakatutuwa pa rito, permanente na nga ang teaching supplies allowance, itinaas pa ito sa halagang P10,000 na matatanggap ng bawat guro sa public schools taun-taon.

Matatandaan na mula 2010 hanggang 2011, tanging P700 lamang ang inilalaan ng gobyerno para sa chalk allowance sa public school teachers.

Sa sumunod na tatlong taon, tumaas ito sa P1,000 matapos madagdagan lamang ng P300.

Mula 2015 naman hanggang 2016, tumanggap lamang sila ng tig-1,500.

Kung inyong mapapansin, nagdadagdag man ang gobyerno sa chalk allowance, kakarampot at halos hindi naman nakakatulong sa mga binabalikat na gastusin ng teachers. Punung-puno ng trabaho, katiting naman ang suweldo at allowance.

Ilang taon ding pinag-aralan ng Kongreso ang problemang ito. Kaya’t noong 2017, kagyat tayong nagdagdag ng P1,000 sa chalk allowance kaya umakyat ito sa P2,500 ng naturang taon. Muli itong dinagdagan ng P1,000 noong 2018 o kabuuang 3,500 na nanatili hanggang taong 2020.

Noong 2019, sa kauna-unahang pagkakataon ay umupo tayong chairman ng Senate Finance Committee, kung saan tayo ang duminig sa 2020 General Appropriations Act o ang pambansang budget para sa 2020.

At dahil pinangunahan nga natin ang mga pagdinig sa budget ng mga ahensya, naging malinaw kung gaano kahalaga sa ating mga guro ang kanilang chalk allowance.

Dahil dito, pagdating ng 2021, sa suporta na rin ng ating mga kapwa senador, tumaas sa P5,000 ang chalk allowance ng public school teachers hanggang sa mga sinundan nitong taon. Pero sa susunod na taon, 2025, dinoble na ang P5,000 kaya’t matatanggap na ng mga guro ang P10,000 chalk allowance na isinasaad ng bagong batas.

Bilang isa sa mga author ng Kabalikat sa Pagtuturo Act, batid natin na napakalaking tulong sa ating public school teachers na maitaas ang kanilang teaching supplies allowance. Sa pamamagitan nito, maiiwasan nang dumukot pa sila sa sariling bulsa makabili lang ng mga pangangailangan nila sa pagtuturo.

Sa totoo lang, maliit na bagay lamang ang tulong na ito kumpara sa paghihirap at sakripisyo ng ating teachers. Alam natin ito, dahil ang aking ina ay dati ring guro noong kanyang kabataan, habang ang aking yumaong ama na si dating Senate President Ed Angara ay kilala sa kanyang pangunahing adbokasiya – ang pagreporma at pagpapalakas sa edukasyon ng Pilipinas.

At sa loob ng 20 taon ng inyong lingkod bilang public servant, edukasyon din ang pangunahin nating tinutukan. Nariyan ang pagsulong natin na gawing kompulsaryo ang kindergarten para sa murang edad ay mabigyan ng basic education ang mga bata (RA 10157); ang Unified Student Financial Assistance System for Tertiary Education o UniFast, kung saan pinag-isa nito sa isang batas ang pagpapalakas, pagpapalawak, pagpapahusay at pagkakaroon ng one body all government-funded modalities sa lahat ng programang tulong pinansyal sa mga mag-aaral sa kolehiyo; ang Universal Access to Quality Tertiary Education Act o UAQTEA na nagpatupad ng libreng edukasyon sa kolehiyo, sa state colleges and universities (SUCs) sa buong bansa; ang EDCOM 2 o ang Second Congressional Commission on Education na nagsasagawa ng isang komprehensibong pagsusuri at pag-aaral sa takbo ng ating sektor ng edukasyon.

Kahit sa maliit na paraan man lang tulad ng mas pinataas na teaching supplies allowance ay maipakita o maipadama natin sa mga teacher ang ating taos-pusong pasasalamat sa pagsisikap nilang malinang ang karunungan ng ating kabataan.

Pinasasalamatan natin unang-una, sa pagpasa ng batas na ito ang ating Pangulong Marcos, ang mga kapwa natin senador, partikular si Sen. Bong Revilla, chairman ng Senate Committee on Civil Service, Government Reorganization and Professional Regulation na siyang principal author at tumayong sponsor ng naturang bill sa Senado.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Mga batas para sa kaligtasan, kapakanan ng manggagawang Pinoy

ni Sonny Angara @Agarang Solusyon | May 4, 2024

Magandang balita ang datos mula sa Philippine Statistics Authority (PSA). 

Nito kasing Enero 2024, naitala ng ahensya ang pagbaba ng bilang ng mga Pilipinong walang trabaho o unemployed. 

Ayon sa datos, bumaba sa 2.15 milyon ang unemployed Filipinos mula sa dating bilang na 2.38 milyon noong Enero 2023. Napakagaan sa loob na mabasa ang ganito, dahil ibig sabihin, lumulusog talaga ang ating ekonomiya. Lumalakas ang mga negosyo dahil nagkaroon sila ng kakayahang mag-hire ng mga dagdag na manggagawa. 

Ayon naman sa Department of Trade and Industry (DTI), tumaas din ng 5 porsyento ang bilang ng mga negosyo sa bansa, base na rin sa business names na pumasok sa kanilang talaan. Karamihan sa mga ito, ayon sa ahensya ay maliliit na negosyo tulad ng mga community-based entrepreneurs. 

Sa IT-BPO sector naman, lumalabas na lumalaki rin ang pangangailangan nila ng magagamit na tanggapan dito sa bansa. Ibig sabihin, patuloy din ang kanilang paglakas, at nangangahulugan ito na mas maraming trabaho na ang magiging available sa mga Pinoy. Sa kabila nito, hindi pa rin masasabi na magiging madali para sa mga kababayan natin ang makakuha ng trabaho. Nasusuong pa rin sila sa iba’t ibang hamon ng buhay.

Hindi kasi easy-easy lang ang humanap ng trabahong maganda ang pasuweldo o ‘yung tiyak na makakasapat sa isang tao o sa kanyang pamilya. Hanggang ngayon kasi, hindi pa rin nabubura ang kontraktuwalisasyon sa bansa.

Maging ang magandang kondisyon sa pinapasukan ng ating mga kababayan o ang kanilang mga pinagdaraanan sa pagpasok sa trabaho ay itinuturing ding very challenging lalo na sa ganitong matinding tag-init na nararanasan natin. Hindi man natin magawa ang lahat ng puwedeng gawin upang maresolba ang mga isyung tulad nito, puwede naman siguro tayong makabuo ng mga hakbang na mas makagagaan sa kanilang mga pinagdaraanang hirap makaalpas lamang sa pang-araw-araw na buhay. 

Sa loob ng 20 taon natin bilang lingkod-bayan (9 na taon bilang kongresista at 11 taon bilang senador), ito ang nangunguna sa ating mga adbokasiya – ang mapagaan ang buhay ng mga manggagawang Pinoy. 

Kung inyong mamarapatin, narito ang ilan sa malalaki at mahahalagang batas na ating naipasa para sa Filipino workers: Ang Republic Act 9710 na isinabatas noong 2009, o ang Magna Carta of Women na ang pangunahing layunin ay resolbahin at tutukan ang mga pangangailangan ng kababaihan partikular ang mga nasa laylayan. 

Pinagtibay ng batas na ito ang pagpapalakas sa karapatan ng kababaihan sa lahat ng aspeto tulad ng pamilya, komunidad at lipunan. Makalipas naman ang halos isang dekada, naisabatas din ang ating isinulong na 105-Day Expanded Maternity Leave Law o ang RA 11210. Nagbibigay ito ng mas mahabang panahon sa isang ina na kapapanganak pa lamang, upang mabigyan ng angkop na atensyon at nutrisyon ang kanyang bagong silang na sanggol. Mahaba-habang panahon din ito para makabawi ng kalusugan ang ina. 

Ang RA 10963 o ang Tax Reform for Acceleration and Inclusion Law na naging daan upang mapababa ang income tax rates o binabayarang buwis ng salaried workers. Dahil dito, mas lumaki ang kanilang take-home pay. 

Ang Republic Act 10801 na nagpalakas sa Overseas Workers Welfare Administration o OWWA at nagbigay sa kanila ng mandato na tulungan ang overseas Filipino workers (OFWs) na dumaranas ng iba’t ibang problema sa kanilang pinapasukang trabaho sa ibayong dagat. Ito rin ang batas na nag-aatas sa OWWA na tulungan ang OFWs na ma-reintegrate sa ating lipunan matapos ang sapilitang pagpapabalik sa kanila sa Pilipinas. 

Para naman sa mga kabataang nangangailangan ng trabaho, nariyan ang ating R.A. 10869 o ang JobStart Philippines Act. Ito ang maghuhulma sa employability ng mga Pilipinong may edad 18 hanggang 24 sa pamamagitan ng training, internship kung saan tatanggap din sila ng allowance at full-cycle employment facilitation services. Ito ring batas na ito ang nagpalawak sa kapasidad ng Public Employment Services Offices (PESOs) na nagsisilbing frontline for employment and services ng gobyerno. 

Nariyan din ang RA 10917, ang Expanded Special Program for the Employment of Students (SPES) na nagbibigay ng pansamantalang hanapbuhay sa ating mga out-of-school youth, gayundin sa mga dependent ng mga manggagawang bigla na lamang nawalan ng trabaho para matulungan naman silang makabangon. 

Ang R.A. 10361, Batas Kasambahay Act na sisigurong hindi mapababayaan ang kapakanan ng ating mga kasambahay. Isinasaad sa batas ang kaukulang benepisyo at social protection para sa kanila. Sa ilalim ng batas, itinaas ang kanilang buwanang suweldo, kailangan din silang maipasok sa SSS, PhilHealth at Pag-ibig Fund. Isinasaad din dito na araw-araw ay kailangang mayroon silang rest period o pahinga. 

Ang RA 11965 (Caregivers Welfare Act) na gumagarantiya sa mga benepisyo at sumisiguro sa karapatan ng mga caregiver. Ito ring batas na ito ang nagsisilbi nilang kalasag laban sa iba’t ibang uri ng pang-aabuso ng kanilang mga employer. 

Ang RA 11962 (Trabaho Para sa Bayan Act) na katuwang ng mga Pilipino para sa kanilang upskilling and reskilling upang mas maging employable kahit sa mga trabahong hindi nila nakasanayang gawin. Ibig sabihin, ito ang batas na nagbibigay sa Filipino workers ng mas malaking oportunidad na magkatrabaho. 

Ilan lamang ang mga batas na ito sa isinulong at naisabatas natin sa loob ng napakaraming taon natin sa larangan ng lehislasyon. Marami pa ang mga dapat gawin sa mga susunod na panahon para masigurong walang Pinoy ang maiiwan sa laylayan.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Kasaysayan at kultura ng ‘Pinas, ipapakita sa Venice Biennale 2024 Festival

ni Sonny Angara @Agarang Solusyon | April 21, 2024

SA limang magkakasunod na pagkakataon, sa loob ng 60 taon ng pamosong international art festival na La Biennale Di Venezia (Venice Biennale), muling naging bahagi at isa sa may magagandang atraksyon sa larangan ng sining ang Pilipinas.

Kabuuang 88 bansa ang kalahok sa Venice Biennale 2024 festival na kabibilangan ng mga bansang Benin, Ethiopia, Timor Leste, Tanzania, Panama at Senegal. Ang ating bansa, muli ay magkakaroon ng sarili nitong pavilion upang solong maipakita ang mga sining ng Pilipino mula Abril 20 hanggang Nobyembre 24, 2024.

Matatandaan natin na unang lumahok ang Pilipinas sa pandaigdigang art festival na ito noong 1964 kung saan, ikinatawan tayo ng ating mga artist na sina Jose Joya na isang pintor at ang iskultor na si Napoleon Abueva. 

Mula noon, hindi na naulit ang ating pagpasok sa Venice Biennale, subalit taong 2015, sa ika-56 taon nito ay muli tayong nakakuha ng pagkakataong maipakita sa mundo ang ating sining. Ang pagbabalik natin sa Biennale ay dahil na rin sa pagpupursige ni Senate President Pro Tempore Loren Legarda at sa pakikipagtulungan ng National Commission for Culture and the Arts at ng Department of Foreign Affairs. Kaya’t nararapat lang na pasalamatan natin ang mga ahensyang ito, partikular si Senator Loren na naging daan upang muli nating maipakita sa mundo ang galing ng Pilipino sa larangan ng sining.

Ngayong taon, dahil may sariling pavilion ang ‘Pinas sa naturang art festival, maipakikita ang mga obra nina Mark Salvatus sa pangangasiwa ni Carlos Quijon, Jr. Ang Mark Salvatus work ay pinamagatang “Sa kabila ng tabing lamang sa panahong ito (Waiting Just Behind the Curtain of this Age)”. 

Ipinakikita nito ang katatagan ni Apolinario dela Cruz o mas kilala sa tawag na Hermano Puli ng lalawigan ng Quezon na ipaglaban ang kalayaang pang-relihiyon sa kasagsagan ng pananakop ng mga Kastila. Makikita rito ang makasaysayang Lucban at Mt. Banahaw.

Liban kay Salvatus, limang Pinoy din ang napiling lumahok sa exhibition, na kinabibilangan nina Pacita Abad, Anita Magsaysay-Ho, Nena Saguil, Joshua Serafin at Maria Taniguchi. Ang titulo ng exhibition: “Foreigners Everywhere” na talaga namang akmang-akma rin sa atin dahil ngayon, kahit saang sulok na yata ng mundo ay mayroong Pilipino. Sa datos nga ng Philippine Statistics Office noong 2020, umaabot na sa mahigit 2 milyon ang mga Pinoy sa ibayong dagat.

Aktibo rin tayo sa paglahok sa Venice Architecture Biennale mula pa noong 2016, kung saan, noong 2021, sa kauna-unahang pagkakataon ay nakatanggap ang Pilipinas ng parangal. Ito ay ang collaborative exhibition na “Structures of Mutual Support” ng GK Enchanted Farm community ng ating mga arkitektong sina Sudarshan V. Khadka Jr. at Alexander Eriksson Furunes.

Nang nakaraang taon naman, sa 2023 edition nito na natapos noong Nobyembre 2023, nagkaroon din ng sariling pavilion ang bansa: ang Tripa de Galina: Guts of Estuary. Sumentro ang exhibition sa isang estero sa Maynila at sa kabuuang komunidad na sakop nito, at ang pagiging bahagi nito sa kasaysayan ng Pilipinas at ang katayuan ng ating mga estero sa kasalukuyang kondisyon ng ating kalikasan.

Mula nang tayo ay maging chairman ng Senate committee on Finance noong 2019, solido na ang ating pagsuporta sa bansa sa paglahok nito sa Venice Biennale. Mula 2020 hanggang 2024, sinisiguro natin na may kaukulang pondo sa ilalim ng pambansang budget ang paglahok natin dito.

Nakatutuwa ring ibalita na sa kauna-unahang pagkakataon ay nakalahok din ang Pilipinas sa Bologna Children’s Book Fair, ang pinakamalaking international fair para sa mga panulat na pambata mula April 8 hanggang April 11, 2024. 

Sa pangunguna ng National Book Development Board at ng Philippine Board on Books for Young People, iprinisinta natin dito ang may 103 na aklat na nagpapakita ng kulturang Pinoy, ang ating pagkakakilanlan, kapayapaan, komunidad at ang kalikasang Pinoy.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com