Mga sangkot sa droga.. 3 Generals at 15 Colonels, out na — P-BBM

ni Mylene Alfonso @News | July 26, 2023

Tinaggap na ni Pangulong Ferdinand Marcos, Jr., ang resignasyon ng 18 opisyal ng Philippine National Police (PNP) na umano'y sangkot sa illegal drug activities base sa rekomendasyon ng National Police Commission Ad Hoc Advisory Group na nag-imbestiga sa integridad ng mga Third Level Officers.

Una nang inanunsyo ng Pangulo sa kanyang State of the Nation Address na tatanggapin niya ang resignasyon ng mga sangkot sa kapulisan sa ilegal na droga.

Base sa isang liham, ipinaalam ni PNP Chief Benjamin Acorda, Jr., na nagsagawa ng masusing imbestigasyon ang Ad Hoc Advisory Group sa umano'y pagkakasangkot ng 953 Third Level Officers hinggil sa aktibidad ng ilegal na droga.

Matatandaang nagsumite ng kanilang courtesy resignation ang 953 opisyal kung saan 935 naman ang hindi tinanggap ang resignasyon.

Kabilang sa 18 opisyal sina PBGen. Remus Balingasa Medina, PBGen. Randy Quines Peralta, PBGen. Pablo Gacayan Labra II, PCol. Rogarth Bulalacao Campo, PCol. Rommel Javier Ochave, PCol. Rommel Allaga Velasco, PCol. Robin King Sarmiento, PCol. Fernando Reyes Ortega, PCol. Rex Ordoño Derilo, PCol. Julian Tesorero Olonan, PCol. Rolando Tapon Portera, PCol. Lawrence Bonifacio Cajipe, PCol. Dario Milagrosa Menor, PCol. Joel Kagayed Tampis, PCol. Michael Arcillas David, PCol. Igmedio Belonio Bernaldez, PCol. Rodolfo Calope Albotra, Jr., at PCol. Marvin Barba Sanchez.

Nabatid na patuloy na binabantayan ang 18 opisyal at tiniyak na may relief orders ang mga ito at ililipat sa Personnel Holding and Accounting Unit, DPRM (Directorate for Personnel and Records Management).

“In their stead, we will install individuals with unquestionable integrity, who will be effective and trustworthy in handling the task of eliminating this dreaded and corrosive social curse. We cannot tolerate corruption or incompetence in government,” banggit ni Pangulong Marcos.

Nakukulangan ako sa SONA — P-BBM

ni Mylene Alfonso @News | July 26, 2023

Aminado si Pangulong Ferdinand Marcos, Jr. na nakukulangan siya sa kanyang State of the Nation Address (SONA) nitong Lunes.

“Kulang pa. There was so much to go through,” ang maiksing pahayag ng Pangulo nang tanungin matapos ang kanyang SONA.

Ayon kay Marcos, sa kabila na naiulat niya sa taumbayan ang buong isang taong nagawa niya sa kanyang panunungkulan ay marami pa sana siyang gustong sabihin.

Binanggit din ng Pangulo na hahayaan na niya ang mga miyembro ng kanyang Gabinete na magpaliwanag sa mga detalye ng kanyang SONA.

Bagama't binanggit din niya ang mga makabuluhang tagumpay sa ekonomiya, sistemang pangkalusugan, edukasyon at imprastraktura ng bansa, inihayag ni Marcos na inaabangan niya ang pagpasa ng mga prayoridad na batas upang maiangat ang buhay ng mga mamamayang Pilipino.

Tiniyak din ng Punong Ehekutibo na ipagpapatuloy ang kampanya laban sa ilegal na droga, ngunit may bagong pamamaraan dahil tututok ito sa community-based na paggamot, rehabilitasyon, edukasyon at reintegrasyon upang masugpo ang drug dependent sa mga apektadong mamamayan.

Ex-P-Duterte, no show sa SONA ni P-BBM

ni Mylene Alfonso @News | July 25, 2023

Hindi nakadalo si dating Pangulong Rodrigo Duterte sa ikalawang SONA ni Pangulong Marcos.

"'Di yata. Galing po siya sa China, medyo pagod. Nasa Davao po siya. Kakarating lang niya nu'ng Sabado," wika ni Sen. Bong Go sa ambush interview bago ang opening ng 2nd regular session ng 19th Congress sa Senado.

Sa kabila nito, tiniyak ni Go na manonood pa rin si Duterte ng SONA ni Pangulong Marcos.