Madir na pumatol sa pamilyadong lalaki, anak ang ginawang katulong

ni Sister Isabel del Mundo - @Mga kuwento ng buhay at pag-ibig | Marso 6, 2024

Dear Sister Isabel,

Isa akong anak sa pagkakasala ng nanay ko, naanakan siya sa abroad ng isang lalaking hindi niya alam na pamilyado na pala, at ako ang naging bunga ng kanilang bawal na pag-ibig.

Tinakasan at pinagtaguan siya ng lalaking iyon at h at hindi niya alam kung saan niya ito ito hahanapin. Mag-isa niya akong itinaguyod, sa galit niya sa ama ko, ako ang napagbubuntungan niya at hindi ko na maramdaman ang pagmamahal niya sa akin.

Nang mag-asawa siyang muli, lalong naging kalbaryo ang buhay ko, ginawa nila akong katulong ng asawa niya, hindi na anak ang trato niya sa akin kundi katulong. 

Hirap na hirap na ang kalooban ko kaya naisip ko na lamang na mag-asawa at lumayo sa poder ng nanay ko. May boyfriend ako ngayon at mahal na mahal niya ako.

Niyayaya na niya rin akong magpakasal at hinahanda na namin ang mga detalye tungkol sa aming kasal. 

Tama ba gagawin ko, Sister Isabel? Nasa tamang edad na rin naman ako, pero hindi ko lang talaga maiwan ang nanay ko dahil kahit ganu’n siya, mahal na mahal ko pa rin siya at utang ko sa kanya ang aking buhay. 

Nagpapasalamat,

Lily ng Muntinlupa

Sa iyo, Lily,

Kani-kanyang kapalaran ang isang tao, masaklap lang kung tutuusin ang sinapit ng nanay mo, pero mali na sa iyo ibuntong ang paghihiganti niya sa ama mo. Ang masaklap pa rito, binuhay ka nga niya at hindi pina-abort pero ginawa ka namang katulong. 

Ikaw naman bilang anak na nagtiis sa iyong ina, napakabuti mong anak. Saludo ako sa iyo, pero may hangganan din ang lahat.

Sa palagay ko, tama ang iniisip mo na tanggapin ang pag-ibig ng boyfriend mo at pumayag ka na maikasal sa kanya. May karapatan kang hanapin ang iyong kaligayahan, lalo na ngayong nasa tamang edad ka na para lumagay sa tahimik. 

Nagawa mo na ang role mo sa nanay mo, kaya humayo at hanapin mo naman ang sarili mong kaligayahan. Sa paglayo mo, palagay ko ay matatauhan ang nanay mo at maiisip niya ang mga pagkakamaling ginawa niya sa iyo. 

Sa kabilang dako, manatili ka pa ring mabuting anak. Mahalin at dalawin mo pa rin ang nanay mo. Pinagpapala ng Diyos ang mga anak na mapagmahal sa magulang. Natitiyak kong pagpapalain at magiging masaya ka sa magiging husband mo. 

Hanggang dito na lang, best wishes and advance congratulation sa nalalapit n’yong kasal.

Sumasaiyo,

Sister Isabel del Mundo

Gusto nang pagbuhatan ng kamay... Lolo, punumpuno na sa apo

ni Sister Isabel del Mundo - @Mga kuwento ng buhay at pag-ibig | Marso 4, 2024

Dear Sister Isabel,

Gusto kong humingi ng payo sa inyo tungkol sa aking apo, napakatigas ng ulo niya, nananakit at namamalo siya. Maski ako ay minumura at sinasabihan niya ng kung anu-anong masasakit na salita na hindi ko na kayang sikmurain.

Sasampalin ko sana siya, pero buti na lang ay nakapagpigil ako.

11-anyos na siya. Actually, hindi ko naman talaga siya tunay na apo. Apo siya ng misis ko, bago ko siya mapangasawa ay may anak na siya. Baby pa lang ang anak niya ay iniwan na sila ng karelasyon niya.

Sobrang sutil niya na, hindi ko naman madisiplina dahil may mga magulang pa siya na dapat sana ay nagtuturo sa kanya ng magandang asal. Baka kapag pinangunahan ko ay mainis pa sa akin.

Ano kaya ang gagawin ko para maituwid ko ang pangit na asal ng apo ko?

Nagpapasalamat,

Berting ng Cavite

Sa iyo, Berting,

Makakabuting kausapin mo ang mga magulang niya. Hindi ba nila alam ang inaasal ng kanilang anak? Marahil ay pareho silang busy sa trabaho at pinaubaya na sa inyo ang pag-aaruga sa bata habang sila’y nagtatrabaho. Yamang ganyan ang sitwasyon, may karapatan kang disiplinahin ang itinuturing mong apo hangga’t bata pa siya. Ipaunawa mo na mali ang kanyang ginagawa at imulat mo siya sa mabuting asal. Kung hindi mo kaya, sumangguni ka sa guidance counselor, humingi ka ng payo kung paano disiplinahin ang ganyang klaseng bata.

Tungkol naman sa mga parents niya, sa palagay ko ay mauunawaan nila ang gagawin mo. Sila rin ay paniguradong hirap na hirap na sa inaasal ng anak nila.

Hanggang dito na lang, lakip nito ang aking dalangin na maging okey na ang pag-uugali ng itinuturing mong apo.

Sumasaiyo,

Sister Isabel del Mundo

Handang sagutin lahat ng gastos sa kasal... Madir, excited Makaisang-dibdib ang kapitbahay

ni Sister Isabel del Mundo - @Mga kuwento ng buhay at pag-ibig | Marso 3, 2024

Dear Sister Isabel,

Gusto ko sanang humingi ng payo sa inyo tungkol sa itinitibok ng puso ko.

Nakakahiya man sabihin, pero isa na akong senior citizen at ngayon lang tumibok ang puso ko ng ganito. Nainlab ako sa kapitbahay ko, biyuda na ako at may kalayaan nang umibig. Ngunit ‘yung iniibig ko naman ngayon ay mas bata sa akin.

Wala pang siyang asawa, at mahirap lang ang estado niya sa buhay, kaya nakatitiyak ako na sasabihin lang sa akin ng mga tao ay isang sugar mommy.

Ramdam ko naman na mahal niya rin ako. ‘Yun nga lang ay nag-aalala ako sa sasabihin ng mga tao lalo na ng mga kapitbahay namin na alam na malaki ang agwat ng aming edad. Ang nangyari tuloy, nagkikita kami nang palihim. Gusto na naming ilagay sa ayos ang lahat, kaya nagbabalak kami ngayon na magpakasal kahit ako na ang gumastos sa lahat at balak naming ilantad na ang aming relasyon.

Ano ang masasabi n’yo Sister Isabel? Naguguluhan na kasi ako dahil tutol ang mga anak at kamag-anak ko. Wala akong kakampi. Ano ba ang dapat kong gawin? Hihintayin ko ang payo n’yo.

Nagpapasalamat,

Barbara ng Pasig City

Sa iyo, Barbara,

Kung talagang nagmamahalan kayo, ramdam mo na mahal ka naman ng kapitbahay mo, walang masama kung magpakasal kayo kesa palihim kayong nagkikita dahil nag-aalala kayo sa sasabihin ng mga tao lalo na ng mga kapitbahay n’yo.

Age doesn't matter, kaya sige lang. Kung saan ka maligaya, roon ka. Wala silang pakialam sa iyo lalo na kung bata pa ang mapapangasawa mo at ikaw naman ay biyuda. Walang masama roon, huwag mong intindihin ang sasabihin ng mga tao, ang intindihin mo ay kung paano mo mapapasaya ang sarili mo. Mapalad ka nga dahil sa edad mong ‘yan, may inilaan pa pala ang Diyos na maging kapartner mo habambuhay.

Ituloy n’yo ang binabalak n’yong kasal dahil natitiyak kong lalo kang pagpapalain ng Diyos sa gagawin mo. Ang mahalaga mahal n’yo ang isa’t isa. Hindi pakunwari at walang hidden agenda. Nawa'y naunawaan mo ang ibig kong sabihin, hanggang dito na lang.

Sumasaiyo,

Sister Isabel del Mundo