Binigay na ang lahat… Bebot, binlock nang walang dahilan ni BF

ni Sister Isabel del Mundo - @Mga kuwento ng buhay at pag-ibig | Marso 24, 2024

Dear Sister Isabel,

May boyfriend ko online, sa Facebook lang kami nagkakilala. Nainlab ako nang husto sa kanya, kaya tinulungan ko siyang makatapos ng pag-aaral, kahit na ‘di pa kami nagkikita ng personal.  Awa ng Diyos, natapos niya ang kanyang pag-aaral. Dahil sa sobrang pagmamahal ko sa kanya, binilhan ko rin siya ng kotse. Narito ako ngayon sa Korea habang nasa Pilipinas naman siya. Ang sabi niya, babawi raw siya once na nakapagtrabaho na siya. Subalit, biglang naputol ang aming komunikasyon. Ang sabi ko pa naman ay uuwi na ‘ko sa ‘Pinas para makapagpakasal na kami. 

Sister Isabel, hindi ko na siya ma-contact at binlock niya na rin ako. Labis akong nalungkot dahil nagtiwala ako sa kanya. Ka-vibes niya na rin ang mga kapatid ko at minsan ay natutulog din siya roon sa bahay namin. Hindi rin nila mahanap ang boyfriend ko at hindi na rin umano ito nagpapakita sa kanila. 

Ano kaya ang gagawin ko? Mahal na mahal ko siya. Hihintayin ko ang payo n’yo.

Nagpapasalamat,

Geraldine ng Pampanga

Sa iyo, Geraldine,

Nakikisimpatya ako sa sinapit mo. Nawa’y magsilbing leksyon sa iyo ang nangyari sa buhay mo. Huwag ka na muling magtitiwala sa lalaking hindi mo pa naman nakikita ng personal. Maging matalino ka sa pagpili ng dyowa at huwag basta-basta gamitin ang puso. Gamitin mo rin ang isip at talino mo para hindi ka na muling maiwanan sa ere. Kunsabagay, nand’yan na ‘yan, biktima ka na. I-report n’yo sa pulis at ipahanap sa NBI ang kinaroroonan ng taong iyan. Idemanda mo para mabawi mo ang mga binigay mo sa kanya, pinagpaguran mo ‘yan sa Korea.

Kung ‘di man niya maibalik, pagdusahan niya sa bilangguan ang nagawa niyang kasalanan sa iyo. 

Umaasa akong hindi na mauulit ang kamaliang nagawa mo sa buhay mo. Huwag kang maging bulag sa pag-ibig. Makatagpo ka nawa ng totoong magmamahal sa iyo. Hanggang dito na lang, hindi masamang maging mabait, ngunit dapat ilagay sa tama.

Sumasaiyo,

Sister Isabel del Mundo

Akala’y naka-jackpot sa napangasawa… Bebot, problemado sa mister na mama’s boy

ni Sister Isabel del Mundo - @Mga kuwento ng buhay at pag-ibig | Marso 20, 2024

Dear Sister Isabel,

Kumusta kayo? Nawa’y lagi kayong masaya at ligtas sa lahat ng problema. 

Sa takot kong tumandang dalaga, nag-asawa pa rin ako sa edad na 32. Maraming nanliligaw sa akin, kaya lang sobrang pihikan ko, pero pumayag din akong magpakasal sa lalaking akala ko si Mr. Right. Akala ko siya na ang karapat-dapat na mahalin. Pogi, may kaya sa buhay, mabait at mapagmahal. Subalit nang magsama kami sa iisang bubong, doon ko natuklasan na isa pala siyang batugan at mama's boy.

Nakadepende siya lagi sa mama niya at ayaw niyang magtrabaho kahit na may sarili na siyang pamilya. 

Wala rin kaming sariling bahay, kung kaya nakikitira lang kami sa bahay nila. Nang isilang ko ‘yung beybi namin, akala ko magiging responsableng ama at asawa na siya, pero hindi pa rin pala. 

Gradweyt siya ng kolehiyo at matalino. Kung tutuusin, kayang-kaya niyang makatagpo ng magandang trabaho, pero ayaw niyang gawin. Sa sobrang inis ko, iniwan ko siya at lumayas ako dala ang beybi namin. Umuwi ako sa pamilya ko, tinanggap naman ako ng mga magulang ko dahil nauunawaan nila ang buhay ko sa piling ng aking biyenan at asawang batugan. 

Tama ba ang ginawa ko, Sister Isabel? Mahal ko siya, pero kung ganyan ang magiging attitude niya habambuhay, baka tuluyang mawala ang pagmamahal ko sa kanya. Nawa’y mapayuhan n’yo ako.

Nagpapasalamat,

Glenda ng Calamba, Laguna

Sa iyo, Glenda,

Dapat lagi kayong nag-uusap ng husband mo. Sabihin mo sa kanya lahat ng hinanakit mo. Maging honest ka sa kanya, baka kasi akala niya kuntento ka na sa buhay mo.

Mainam na ‘yung malinaw kesa malabo. Sabihin mo sa kanya hangga’t ‘di siya naghahanap ng trabaho para sa inyong mag-iina at hindi ka niya ibinubukod ng bahay, hindi ka babalik sa kanya. Hayaan mong maisip niya na ngayong may asawa na siya, alisin na niya ang pagiging mama's boy, at maging responsable ama at asawa na siya. Hindi na siya bata, nagkakaedad na siya at may anak na kayo na naghahanap ng kalinga at pagmamahal ng isang ama. Ipakita niya sa parents niya na kaya niyang mamuhay nang hindi nakadepende sa kayamanan nila.

Sa palagay ko, matatauhan siya kapag kinausap mo siya. Kung talagang mahal ka niya, susundin niya ang gusto mong mangyari. 

Kung hindi naman, mananatili pa rin siya sa bahay nila kapiling ng kanyang pamilya. 

Mas makakabuting d’yan ka na lang muna sa parents mo at ipagdasal na sana matauhan na ang asawa mo. Hanggang dito na lang, pagpalain ka nawa ng Dakilang Kataas-taasan, gayundin ang husband mo at ang inyong kaisa-isang anak. Malagay nawa sa ayos ang pagsasama n’yo.

Sumasaiyo,

Sister Isabel del Mundo

15-anyos na nadale ng BF, madir problemado sa pang-araw-araw na gastusin

ni Sister Isabel del Mundo - @Mga kuwento ng buhay at pag-ibig | Marso 19, 2024

Dear Sister Isabel,

Ang isasangguni ko sa inyo ay tungkol sa aking ampon. Pinaampon siya sa akin ng best friend ko na nabuntis ng kanyang boyfriend, at dahil wala kaming anak ng husband ko, pumayag siya na ampunin namin ang batang iyon. 

Babae ang naturang baby ng best friend ko. Pinag-aral at itinuring namin siyang tunay na anak. Subalit, pagtungtong niya sa edad na 15, nag-asawa na agad. Gustuhin man naming magalit, hindi namin magawa. Wala na rin naman talaga kaming magagawa dahil nadale na siya ng asawa niya ngayon na isa ring menor-de-edad. 

Nandito sila sa puder namin, ‘di ko na alam ang gagawin ko. Kapos na rin ang aming budget. Ang trabaho ng asawa ko ay tricycle driver habang naglalabandera naman ako.

Hay buhay. Ano kaya ang gagawin ko, Sister Isabel? Hindi ko naman sila puwedeng itaboy.

Ano kaya ang maaari kong gawin para kahit papaano ay mabawasan naman ang bigat na nakaatang sa aking balikat? 

Sana ay mapayuhan n’yo ako para gumaan-gaan naman ang pasaning kinakaharap ko sa kasalukuyan.

Nagpapasalamat,

Inday ng Caloocan

Sa iyo, Inday,

Kumapit ka lang sa Diyos at huwag panghinaan ng loob. Ang ibig kong sabihin sa kumapit ka sa Diyos ay humingi ka ng awa at patnubay sa Poong Maykapal. Magdasal at manalangin ka para tulungan ka ng Diyos mairaos ang buhay n’yo. 

God hears, God listen and God cares. Ang mga ibon nga nabubuhay, tayo pa kayang mga tao? Naniniwala akong makakaraos din kayo sa problemang kinakaharap n’yo ngayon. 

Tutulungan ka ng Diyos basta’t manatili kang nananampalataya sa kanya.

Sa kabilang dako, nawa'y magsilbing leksyon ‘yan sa ampon mo na ang pag-aasawa ay hindi biro. Ipaunawa mo sa kanya at sa asawa niya na ang pakikipagtalik ay hindi para sa mga teenager na tulad nila. 

Hanggang dito na lang, nawa’y patnubayan ka ng Diyos, hindi lamang ngayon kundi magpakailanman.

Sumasaiyo,

Sister Isabel del Mundo