Madir, problemado sa anak na di' nagpaparamdam

ni Sister Isabel del Mundo - @Mga kuwento ng buhay at pag-ibig | June 12, 2023

Dear Sister Isabel,

Nais ko humingi ng payo patungkol sa aking anak na itinago ng kanyang sariling ama.

Nasa abroad ako no’ng kinuha siya.

Makalipas ang 24-years, nalaman ko kung nasaan siya. Hinahanap niya rin pala ako, at sa awa ng Diyos, nagkita rin kami. Masaya kami no’ng araw na iyon at nasundan pa ito 3 beses na pagkikita.

Pinakilala ko siya sa kanyang mga kapatid at bigla na lamang siyang bumalik sa kanyang ama at step mom na siyang nagpalaki sa kanya, at sa abroad nanirahan, naging maayos naman ang kanilang kalagayan do’n.

Ang problema ko ay halos tatlong taon na kami ‘di nagkikita at ‘di na rin siya tumutugon sa mga chat at video call ko. Nag-message ako nitong nakaraan, at sumagot naman siya ngunit para ba itong nanlalamig. Nawalan na siya ng interest na makipagkita sa akin at maka-bonding ang kanyang mga kapatid.

Ano ang dapat kong gawin? Nawa’y mapayuhan niyo ako upang kahit paano ay gumaan ang kalooban ko.

Nagpapasalamat,

Lorna ng Cavite

Sa iyo, Lorna,

Marahil ay ayaw niyang masaktan ang kalooban ng kinilala niyang ina na siyang nag-aruga sa kanya mula ng siya’y bata. Marahil ay masaya na siya sa nakalakihan niyang pamilya at wala na sa loob niya na makipag-ugnayan sa iyo bilang biological mother niya. Tiis-tiis lang. Siya rin ang gagawa ng paraan upang magkita kayong muli. Idulog mo ito sa Diyos. Magugulat ka na lang nand’yan na ang iyong anak sa iyong harapan.

Sumasaiyo,

Sister Isabel del Mundo

Ermat, ‘di matanggap ang pagsampal sa kanya ng anak

ni Sister Isabel del Mundo - @Mga kuwento ng buhay at pag-ibig | June 07, 2023

Dear Sister Isabel,

Mayroon akong anak na mabait, magalang at masunurin, ngunit nitong nagdaang mga araw ay naging bugnutin at wala nang respeto sa akin.

25-anyos na siya at may dyowa. Madalas ay pinapapunta niya ang dyowa niya sa bahay at do’n niya na rin pinapatulog. Pinagsabihan ko siya na hindi tama ang kanyang ginagawa dahil hindi pa naman sila kasal. Nagalit ito sa akin at bigla na lamang akong sinampal. Napaluha ako, hindi ko akalaing magagawa niya akong saktan.

Tulungan niyo ako, Sister Isabel. Hindi ko na kaya ang ginagawa ng anak ko sa akin. Ano kaya ang marapat kong gawin?

Nagpapasalamat,

Nanay Donita ng Pangasinan

Sa iyo, Nanay Donita,

Hindi katanggap-tanggap ang ginagawa ng iyong anak sa iyo. Iparehab mo na ‘yan. Malamang ay gumagamit na iyan ng ipinagbabawal na gamot kaya nagawa niyang saktan ang sarili niyang ina. Kumilos ka na agad bago lumala ang lahat. Humingi ka ng tulong sa DSWD o sa mga kinauukulan. Hindi ‘yan kayang gawin ng matinong anak. Lumapit ka rin sa dalubhasang Psychologists o Psychotherapist. Humingi ka ng tulong sa kanila. Gawin mo na agad ang payo ko upang ‘di na humantong sa mas malala pang sitwasyon ang kalagayan mo.

Sumasaiyo,

Sister Isabel del Mundo

Ex-bf na may anak, nakikipagbalikan, ‘di dapat patulan

ni Sister Isabel del Mundo @Mga Kuwento ng Buhay at Pag-ibig | June 5, 2023

Dear Sister Isabel,

Balak namin ng dyowa ko na magpakasal ngayong 2023. Kaya lang ay parang hindi pa ko handa, kasi mayroon akong ex na gustong bumalik at niyayaya rin ako nito ng kasal. Mahal ko ito, kaya lang ay inagaw siya ng iba at nagkaanak siya ro’n. Ngayon ay biyudo na ang ex ko, at handa na raw itong pakasalan ako.

Samantala, ang dyowa ko ay binata at ramdam kong mahal din ako nito.

Nagdadalawang isip tuloy ako kung sino sa kanila ang pakakasalan ko.

Bagama’t mas mahal ko ngayon ang ex-boyfriend ko, kaysa sa dyowa ko. Sister Isabel, sino kaya sa dalawa ang pakakasalan ko, pareho silang may trabaho at stable na ang kalagayan. Sana ay matulungan niyo ako sa pagpapasya.

Nagpapasalamat

Celia ng Bulacan

Sa iyo, Celia,

Ang maipapayo ko sa iyo ay hindi lang puso ang dapat gamitin mo sa pagpapasya. Gamitin mo rin ang iyong isip. Ang sabi mo ay mahal mo ang ex-boyfriend mo pero inagaw siya ng ibang babae rati. Sa puntong ‘yan, nagpapatunay lamang na hindi ka niya talaga mahal. May mahina siyang kalooban at hindi kayang magpasya sa sarili niya. At ngayon ay nagbabalik siya sa iyo para pakasalan ka? Makabubuting huwag mo na siyang patulan. Luluha ka lang sa piling niya.

Ang dapat mong pakasalan ay ang dyowa mo ngayon. Bukod sa binata, handa pa itong iharap ka sa altar. Sa palagay ko naman ay mahal mo rin siya. Bigla lang sumingit ‘yung dati mong boyfriend. Ipanatag mo ang iyong isipan, ihanda ang iyong sarili sa bagong buhay na haharapin kasama ang iyong dyowa. Hangad ko ang kaligayahan at habambuhay na kasaganaan at kapanatagan sa inyong pagsasama. Huwag ng magdalawang isip pa. Pakasalan mo na ang iyong dyowa.

Sumasaiyo,

Sister Isabel del Mundo