Paninira at pag-iimbento ng kuwento ni workmate, gusto nang patulan

ni Sister Isabel del Mundo - @Mga kuwento ng buhay at pag-ibig |September 6, 2023

Dear Sister Isabel,

Nawa’y lagi kayong payapa at panatag upang mas marami pa kayong mapayuhan sa mga problemang kanilang kinakaharap.

Nandito ko sa Hongkong nagtatrabaho bilang Overseas Filipino Worker (OFW). Ang problema ko ay tungkol sa ka-workmate ko. Insecure na insecure siya sa akin nang makita niyang type ako ng boss namin. Siya kasi ang dating paborito pero mula nang dumating ako, sa akin na natuon ang atensyon niya.

Tatlo kaming Pinay na nagtatrabaho rito, nagulat ako dahil hindi na nila ko kinikibo na para bang may nagawa akong kasalanan. Nagtaka ako dahil close naman kami at magaan ang loob namin sa isa't isa. Kinausap ko siya ng masinsinan at tinanong ko kung bakit bigla siyang nagbago ng pakikitungo sa akin. Siniraan pala ako ng isa namin kasama at nag-imbento ng masasakit na salita.

Muntik ko na mapatulan ‘yung babaeng naninira sa akin, mabuti na lang ay kinausap ko kung bakit siya nagbago ng pakikitungo sa akin, nang nalaman ko ang dahilan.

Muntik ko nang sabunutan ‘yung babaeng nanira sa akin. Buti na lang napigilan ko ang sarili ko.

Ano kaya ang dapat kong gawin? Kung kakausapin ko siya baka lalo lang magwala at siguradong hindi niya aaminin ang totoo.

Nawa’y mapayuhan n’yo ako Sister Isabel sa dapat kong gawin para matigil na ang paninira niya sa akin. Aabangan ko ang payo n’yo.

Nagpapasalamat,

Heidi ng Hongkong

Sa iyo, Heidi,

Nakakatuwa naman na umabot na hanggang Hongkong ang Bulgar at isa ka sa maraming nagbabasa nito.

Ang maipapayo ko sa iyo, huwag mo na lang patulan ang kasamahan mo na nanira sa iyo. Lalo mo pang pagbutihin ang trabaho mo para lalo ka pang alagaan ng boss mo.

Hayaan mong mamatay siya sa inggit. Titigil din ‘yan kapag nakita niya na walang epekto sa iyo ang paninira niya, at lalo ka pang hahangaan ng boss n’yo dahil sa husay at galing mo sa pagtatrabaho.

Sa tuwing magkasama kayo r’yan, kumanta ka na lang nang kumanta habang nagwo-work kayo o kaya naman, magsipag ka pa. Ang mga taong naninira ay ‘di nagtatagumpay, at hindi

pinagpapala ng Diyos. Ipagdasal mo na lang na mamulat siya sa katotohanan na ang paninira sa kapwa ay hindi pinapatnubayan, at hindi kailanman magtatagumpay.

Umaasa akong magbabago din ang ugali niya, at nawa’y magising siya sa katotohanan na pinagpapala ang mabubuting tao, at ang masasama ay pinaparusahan habambuhay.

Sumasaiyo,

Sister Isabel del Mundo

Biyudang na-inlab sa lalaking may asawa’t anak, takot mabuking ni no. 1

ni Sister Isabel del Mundo - @Mga kuwento ng buhay at pag-ibig |September 4, 2023

Dear Sister Isabel,

Ang problema ko ay tungkol sa pinsan ko, ulilang lubos na siya kaya napagdesisyunan ng mga magulang ko na kupkupin na lamang siya. 21 years old na ako, habang siya naman ay 23, pareho kaming wala pang dyowa.

Ramdam ko na may pagnanasa siya sa akin, may times na tsinatsansingan niya ko na kunwari ay ‘di niya sinasadya pero halata naman. Nagtapat siya sa akin, mahal na mahal niya raw ako.

Ikamamatay niya umano ‘pag hindi ako ang nakatuluyan niya, nabigla ako sa sinabi niya at kinabahan ng husto. Mula noon ay may takot na ako sa kanya, lagi na akong ninenerbiyos kapag kaming dalawa lang ang tao sa bahay, at hanggang sa nangyari na nga ang kinatatakutan ko, nirape niya ako.

Kami lang ang naiwan sa bahay noong araw na ‘yun. Wala akong nagawa dahil malakas siya, pinuwersa niya ako. Iyak ako nang iyak.

Hindi ko masabi sa magulang ko ang nangyari, pinagbantaan din niya ako na may hindi magandang mangyayari kung magsusumbong ako.

Ano ang marapat kong gawin, Sister Isabel, nawa’y matulungan n’yo ko.

Nagpapasalamat,

Beth ng Camarines Sur

Sa iyo, Beth,

Huwag mo nang patagalin pa ang iyong problema, lakasan mo ang iyong loob at sabihin mo na sa iyong magulang kung ano ang totoong nangyari, dahil baka masundan pa ‘yan, at mas masaklap pa kung mabubuntis ka niya. Huwag kang matakot, dahil hindi niya magagawa ‘yun.

Ngayon din ay kausapin mo ang magulang mo at sabihin mo ang lahat ng naganap sa inyo ng pinsan mo noong araw na kayo lang ang naiwan sa bahay. Natitiyak kong mauunawaan ka nila, maaawa sila sa iyo at gagawa sila ng paraan upang matigil na ang kawalang-hiyaan ng pinsan mo.

Anuman ang susunod na mangyayari ay tanggapin mong maluwag sa iyong kalooban at muli kang mamuhay ng normal, ipanatag mo ang iyong isipan.

Umasa kang malulutas lahat ng problema mo sa tulong ng mga magulang mo na tunay na nagmamahal sa iyo bilang anak nila na nasadlak sa mabigat na problema.

Sumasaiyo,

Sister Isabel del Mundo

Galing pa sa kanunu-nunuan… Binata, gustong makuha ang hidden treasure sa minanang bahay

ni Sister Isabel del Mundo - @Mga kuwento ng buhay at pag-ibig | August 30, 2023

Dear Sister Isabel,

Bago ko umpisahan ang aking problema, nais ko munang batiin kayo ng isang mapayapa at masaganang araw. Nawa’y lagi kayong ligtas sa anumang uri ng kapahamakan.

Ang problema ko ay tungkol sa lumang bahay namin na minana ng mother ko sa kanunu-nunuan niya at ito na rin ang minana ko sa mother ko.

Lumang-luma na talaga ito, may nararamdaman ako ritong kakaiba at may naririnig din akong boses ngunit ayaw akong paniwalaan ng mga kapatid ko, guni-guni ko lamang umano ‘yun.

Noong unang panahon ay chapel daw ito, may treasure raw na nakabaon dito. At ramdam ko na totoo ‘yun, kaya pinasuri ko ang bahay sa isang may kaalaman at confirm may treasure nga!

Ang malaking katanungan ngayon ay paano ko ito makukuha?

Ang problema ay walang naniniwala sa akin, at nababaliw na raw siguro ako. Gusto ko kasing iparenovate ang bahay na ‘to at gawin ding house of prayer. Wala naman akong malaking pera para mapaganda muli ang ancestral house na minana ko sa mother ko, kaya gusto ko sanang makuha ‘yung kayaman na nakabaon dito.

Ano kaya ang gagawin ko para makumbinsi ko ang mga kapatid ko na subukan namin kunin ‘yung treasure? Nawa’y matulungan n’yo ako sa problema ko.

Nagpapasalamat,

Paul ng Tarlac

Sa iyo, Paul,

Huwag ka nang makipagsapalaran sa treasure o kayamanan na nakabaon d’yan sa ancestral house n’yo. Magiging mitsa lang ito ng buhay mo o buhay ng mga kapatid mo na tutulong sa iyo sa paghuhukay kung sakali mang paniwalaan ka nila. Ang ibig kong sabihin, mapapahamak lang kayo kung sakaling mayro’n nga. Ang alam ko tungkol d’yan ay may nagbabantay na espiritu. May kailangang magbuwis ng buhay bago makuha ang treasure.

Kailangan din ng matinding ritwal para makuha ang treasure. Huwag ka na lang makipagsapalaran kung ang kapalit naman nito ay sarili mong buhay.

Samantala, puwede mo namang ipagawa ang ancestral house n’yo sa natural na paraan.

Maghousing loan ka o kaya mag-ipon ka. Unti-unti mo itong ipagawa kung maliit pa lang ang iyong pera. Huwag mong biglain ang pagpapagawa kung hindi pa kaya ng budget mo. Mairaraos mo rin ‘yan, kalimutan mo na ang tungkol sa treasure na ‘yan. Malamang sa malamang masira pa ang ulo mo kung ‘yan ang lagi mong iisipin.

Mamuhay ka ng normal, maghanapbuhay ka ayon sa iyong kakayahan, at mag-ipon ka upang mapaayos mo ang iyong bahay, magugulat ka na lamang dahil isang araw naipagawa mo na rin ‘yan ayon sa binabalak mo.

Sumasaiyo,

Sister Isabel del Mundo