61 na sa mga naturukan ng Sinovac, sumama ang pakiramdam

ni Mary Gutierrez Almirañez | March 6, 2021

Animnapu’t isa na ang nakaranas ng sintomas at sumama ang pakiramdam sa mahigit 13,639 katao na nabakunahan ng Sinovac COVID-19-vaccines simula noong ika-1 ng Marso, ayon kay Department of Health (DOH) Undersecretary Maria Rosario Vergeire.

Batay sa ulat, lahat sila ay ligtas na pinauwi sa kanilang tahanan dahil karaniwang epekto lamang daw ang mga naranasan nila o ‘mild adverse event’.

Tinatayang 700 katao ang nabakunahan nang magsimula ang rollout. Sa mga sumunod na araw ay nadagdagan ito ng 3,000 hanggang 4,000 katao at patuloy itong tumataas.

Giit pa ni Vergeire, "We expect na tataas pa ang update, lalung-lalo na po at meron na ho tayong ibibigay sa kanila na option because AstraZeneca vaccines are here already."

Sinimulan na ring gamitin ang bakunang AstraZeneca sa Ospital ng Parañaque II kaninang umaga. Nakahanda naman ang ospital sa mga posibleng tatamaan ng ‘adverse event’.

40 naturukan ng Sinovac, nakaranas ng sintomas

ni Lolet Abania | March 4, 2021

Tinatayang nasa 40 ang naitalang nakaranas ng mild adverse events following immunization (AEFI) sa isinasagawang pagbabakuna ng gobyerno gamit ang Sinovac vaccine ng China, ayon sa Food and Drug Administration (FDA).

Sa isang interview ngayong Huwebes kay FDA Chief Eric Domingo, ang mga nasabing kaso ay nakaranas lamang ng mild symptoms gaya ng pananakit sa bahagi ng injection site.

“As of yesterday, ang nabakunahan ay marami-rami na rin, ilang libo na rin at nakatanggap kami ng reports ng mga 40 people who experienced mild signs and symptoms after immunization,” ani Domingo.

“Wala pa po tayong nakitang severe (AEFI). Ang severe po kasi, ‘yung talagang kailangang maospital, so as of kahapon ng hapon, wala pang nai-report sa atin. Karamihan talaga, ‘yung mga regular lamang,” dagdag niya.

Noong Martes, inanunsiyo ng Department of Health (DOH) na ang gobyerno ang siyang mananagot para sa AEFI habang ang COVID-19 vaccines ay patuloy pa ring dinedebelop at dahil sa binigyan ng emergency use authorization.

Sinimulan ang vaccination program sa bansa noong Lunes mula sa 600,000 Sinovac doses ng China.

Samantala, binanggit ni Vaccine Czar Carlito Galvez, Jr. sa interview ngayong Huwebes na ang 1 milyon doses ng COVID-19 vaccines mula sa Sinovac na binibili ng Pilipinas ay darating sa ikatlong linggo ng Marso.

“'Yung 1 million more or less sa third week ng March. Maybe March 21 onwards...Asahan natin na March 21 to 30, darating na po ‘yung 1 million,” ani Galvez.

Govt. offc'ls. na 'di frontliner, nagpabakuna, yari sa DOH

ni Mary Gutierrez Almirañez | March 4, 2021

Iimbestigahan ng Department of Health (DOH) ang mga nabakunahan ng Sinovac COVID-19 vaccine kahapon, Marso 3, na hindi prayoridad sa isinasagawang rollout ng pamahalaan.

Kabilang sa mga nagpaturok na wala sa prayoridad ay sina DILG Under Secretary Jonathan Malaya, MMDA Chief of Staff Michael Salalima, Pasay City Vice Mayor Boyet Del Rosario at Manila Vice Mayor Honey Lacuna.

Ayon pa kay DOH Secretary Francisco Duque III, "Aalamin natin, papa-investigate natin. 'Yun ang gagawin natin to find out kasi nga lagi ko namang sinasabi na ang bakuna nga natin, para sa healthcare workers. Kinakailangang 3.4 million doses, eh, 600,000 lang ‘yung dumating. So, 17% lang. So, kulang."

Iginiit naman ni DILG Under Secretary Jonathan Malaya na frontliner din naman siya. Sinabihan umano siya ng mga doktor sa Pasay City General Hospital na magpabakuna kaya kaagad siyang sumang-ayon para maging ehemplo at mahikayat ang publiko na huwag matakot sa bakuna.

Matatandaang gusto rin sanang magpabakuna ni Marikina Mayor Marcy Teodoro ngunit tinanggihan siyang bakunahan ng mga doktor sapagkat hindi siya frontliner at wala siya sa listahan ng mga prayoridad. Gayundin ang nangyari kay Spokesperson Harry Roque noong ninais niyang magpabakuna ngunit tinanggihan siyang bakunahan ng National Immunization Technical Advisory Group (NITAG).

Bukod sa mga healthcare workers na top priority ay pinapayagan din ng DOH na mabakunahan ang tatlo nilang benepisyaryo na nasa listahan. Katulad ni Quezon Province Representative Helen Tan na beneficiary ng anak niyang doktor sa Veterans Memorial Medical Center.

Maliban sa kanila, tatlong opisyal ng pamahalaan lamang ang pinayagan ni Pangulong Duterte na magpabakuna kabilang sina Vaccine Czar Secretary Carlito Galvez Jr., NTF Deputy Chief Implementer Secretary Vince Dizon at MMDA Chairman Benhur Abalos para mapaigting ang kumpiyansa ng publiko. Kaugnay nito, gusto ng Malacañang na may maparusahan sa mga lumabag.