1.4 M Sinovac vaccine ng China, parating na

ni Lolet Abania | March 16, 2021

Makakatanggap muli ang bansa ng 1.4 milyong doses ng COVID-19 vaccine mula sa Chinese firm na Sinovac Biotech ngayong buwan, ayon kay Vaccine Czar Secretary Carlito Galvez, Jr..

Ayon kay Galvez, kabilang sa mga nasabing doses ang dagdag 400,000 na donasyon ng Chinese government habang ang 1 milyong doses naman ang kinukuha ng pamahalaan.

“Ang exact timeline is ‘yung 400,000 po, baka dumating this coming March. ‘Yun po ang tentative date natin,” ani Galvez sa isang briefing ngayong Martes, kung saan nabanggit din niya na posibleng mai-deliver ito sa March 24.

“‘Yung 1 million na procurement natin, ng Department of Health, ay darating sa [March] 28,” dagdag ng opisyal. Matatandaang natanggap ng Pilipinas ang unang shipment ng COVID-19 vaccines mula sa Sinovac Biotech noong huling linggo ng Pebrero.

Agad na sinimulan ng gobyerno ang COVID-19 vaccination program para sa 600,000 Sinovac doses na donasyon ng Chinese government noong March 1. Nitong March 14, nasa kabuuang 199,704 doses na ang na-administer sa mga health workers at frontliners sa bansa.

Sinovac, pinagdudahan... P-Duterte, niresbakan si Leni

ni Lolet Abania | March 9, 2021

Galit na tinugon ni Pangulong Rodrigo Duterte si Bise-Presidente Leni Robredo dahil sa mga pahayag nito na nagdulot pa ng pagdududa sa publiko tungkol sa Sinovac vaccine na gawa ng China.

"Imbes na magtulong to convince the people, here she comes and making it appear that government has failed in its mandate of securing... Ma'am, hindi ako napikon. Hindi ako mapikon kay (dahil) hindi ko sarili ito," ani Pangulong Duterte sa kanyang weekly Talk To The People briefing para sa COVID-19.

Ayon sa Pangulo, ang mga inilabas na pahayag ni Robredo ay isang lamang "half-truth", kung saan sinabi nitong ang Sinovac vaccine ay nangangailangan ng rekomendasyon mula sa health technology assessment council (HTAC).

Ipinaliwanag naman ni Department of Health (DOH) Secretary Francisco Duque III na hindi na kailangan ng Sinovac vaccine ng pag-apruba ng HTAC dahil ito ay isang donasyon at hindi isang investment.

"Hindi ho kailangan ng recommendation, kasi nakalagay dito [sa Universal Health Care Law] investment, wala naman tayong in-invest, donated 'yun eh. So, EUA [emergency use authorization] lang po ang kinailangan," sabi ni Duque.

Nakasaad sa Section 34 ng Universal Health Care Act, "investments on any health technology or development of any benefit package by the DOH and PhilHealth shall be based on the positive recommendations of the HTA."

Nagbigay ng donasyon ang China ng 600,000 doses ng Sinovac vaccine ng CoronaVac, na dumating sa bansa noong Pebrero 28. Ito ang unang legal na batch ng mga bakuna sa bansa at sinimulan ang vaccinations sa mga ospital sa National Capital Region noong Marso 1.

"Imbes na makatulong ang Vice President, she created confusion, thereby creating doubts and uncertainty in the minds of the people," ani P-Duterte. "'Yan ang ginalitan ko because we are running against time," dagdag ng Pangulo.

Turukan ng COVID vaccine sa mga probinsiya, nag-start na!

ni Mary Gutierrez Almirañez | March 7, 2021

Umarangkada na ang vaccination rollout kontra COVID-19 sa mga ospital mula sa iba’t ibang probinsiya gamit ang bakunang Sinovac ngayong araw, Marso 7.

Batay sa ulat, tinatayang 750 doses ng Sinovac ang dumating sa Occidental Mindoro kung saan mahigit 114 healthcare workers na ang nabakunahan sa pangunguna ni Dr. Rylan Howell Superiano sa Occidental Mindoro Provincial Hospital.

Ayon pa kay Governor Eduardo Gadiano, mahigit P21 milyon ang inilaan nilang budget sa pambili ng bakuna.

Mula sa 318 na healthcare workers ng ospital ay 228 sa kanila ang pumapayag na magpabakuna gamit ang Sinovac.

Kaugnay nito, sinimulan na rin ang pagbabakuna sa Cagayan Valley Medical Center (CVMC) sa Tuguegarao City at si Medical Director Dr. Glenn Mathew Baggao ang unang binakunahan kung saan mahigit 1,500 na empleyado ng CVMC ang nagpalista para maturukan ng Sinovac.

Samantala, sa Sarangani Health Care Facility naman ay si Provincial Health Officer Dr. Arvin Alejandro ang unang nagpabakuna, habang patuloy din ang bakunahan sa Dr. Cornelio P. Martinez Sr. Hospital.

Tinatayang 336 doses ng Sinovac ang nakalaan para sa mga healthcare workers ng Sarangani Province.

Sinimulan na rin ang rollout sa Caraga Regional Hospital sa Surigao City kung saan ang medical specialist head ng Department of Medicine na si Dr. Angel Eugenio Batac ang unang binakunahan at sinundan ng medical specialist II na si Dr. Kenneth Ja-R Alberca.

Bukas ay inaasahang magsisimula na rin ang bakunahan sa San Jose District Hospital ng Occidental Mindoro, ilang ospital sa Oriental Mindoro at iba pang referral hospitals sa Cagayan Valley region.