P500K, naka-register na.. Sim card pang-scam ibinebenta, Chinese arestado

ni BRT | May 21, 2023

Timbog ang isang Chinese national matapos magbenta ng mga pre-registered SIM card na umaabot ng hanggang P500,000 ang halaga at ginagamit para makapang-scam sa Parañaque City.

Nadakip ang suspek ng mga tauhan ng National Bureau of Investigation-Pampanga nang bentahan ang kanilang undercover operative ng pre-registered SIM sa halagang P3,000 hanggang P6,000 na pinapasa sa mga POGO company para magamit sa scam.

Ang mga SIM naman na may espesyal na numero ay umaabot ng hanggang P500,000.

Nakita umano ng mga awtoridad ang assorted SIM cards sa ads sa social media, na ipinagmamalaking pre-registered na.

Nang isalang sa pre-registration ang mga SIM, lumabas na rehistrado na sa ibang pangalan ang 20 SIM cards.

Hindi pa nagbibigay ng pahayag ang nadakip na Tsino.

Nagpaalala ang DICT na huwag kumagat sa mga fixer na nag-aalok irehistro ang SIM kapalit ng bayad.

Libre ang pagpaparehistro ng SIM, at dapat makipag-ugnayan sa telco provider kapag gusto ng special number.

SIM registration, gawing simple

ni BRT | May 1, 2023

Hinikayat ni House Speaker Martin Romualdez ang Department of Communications Technology (DICT) at National Telecommunications Company (NTC) na gawing simple ang SIM registration para makatulong sa milyong katao na hindi pa nakapagrehistro ng kanilang SIM card.

Dapat umanong magsanib-pwersa ang DICT, NTC at ang tatlong telecommunications companies para sa nasabing proseso.

Pinasalamatan naman ni Romualdez si Pangulong Ferdinand Marcos, Jr., sa pagpapalawig ng deadline dahil milyong mga kababayan natin ang hindi pa nakapagrehistro.

Ayon pa sa House leader, dapat tulungan ng Department of Migrant Workers at Department of Foreign Affairs ang DICT, NTC at telcos na sabihan ang mga OFWs at ang kanilang pamilya para sa registration requirement.

Extension, kahit sa July 25 pa.. 'Di rehistradong SIM, wa' na silbi

ni Mylene Alfonso | April 26, 2023

Nagbabala ang Department of Information and Communications Technology (DICT) na posibleng maalis ang ilang serbisyo ng mga unregistered SIM card kabilang ang mga social media sites tulad ng Facebook at TikTok.

Ito ang inihayag ni DICT Sec. Ivan Uy matapos aprubahan ni Pangulong Ferdinand Marcos, Jr., nang 90 araw ang deadline ng SIM card registration.

"We did not put those conditions in the first SIM card registration but because of our observation that people are not taking our deadline seriously, we are now exploring other options to incentivize registration," ayon sa Kalihim.

Sinabi pa ni Uy na nakikipag-usap na ang DICT sa mga telcos hinggil sa proseso ng pagpaparehistro sa panahon ng extension.

"We will observe the rate of registration and after a certain period, we're seeing maybe 30 days or 60 days into registration, we will start deactivating some services on the SIM card," wika ni Uy.

"Let's say after 60 days, you will lose your access to your Facebook accounts or your TikTok accounts. You can still use your phone, you can still call, you can still text and then after a certain period, you will lose your outgoing calls so that way, ramdam n'yo kung ano effect na 'di kayo nagpaparehistro," banta pa ng Kalihim.

Kaugnay nito, kabilang aniya sa mga lugar na mababa ang turnout ng pagpaparehistro ng SIM card ang Dinagat, Siquijor, Camiguin Islands, Tawi-Tawi at Basilan.